Trump před sudnistwom
Mortwi při raketowym nadpadźe
Krywyj Rih (dpa/SN). Při nowych ruskich nadpadach na Ukrainu su po oficialnych informacijach mjez druhim wjaceposchodowy dom w juhowuchodnym wulkoměsće Krywyj Rih trjechili. Znajmjeńša třo wobydlerjo při tym žiwjenje přisadźichu, 25 dalši so zranichu, wojerski guwerner potrjecheneje kónčiny zdźěla. Krywyj Rih, ródne město ukrainskeho prezidenta Wolodymyra Zelenskeho, je „masiwny raketowy nadpad“ dožiwiło. Tři ruske rakety su wottřělili, dalše pak zrazychu do bydlenskeje štwórće.
Wuswobodźenje wjacorych wjeskow na wuchodźe Ukrainy je Zelenskemu wuspěch dotalneje ukrainskeje ofensiwy přećiwo ruskim jednotkam. „Dźak našim wojowarjam za kóždu ukrainsku chorhoj, kotraž so zaso k swojemu prawotnemu městnu we wuswobodźenych kónčinach wróći“, rjekny wón wčera w swojim widejowym poselstwje. „Wojowanja su wobćežne, ale smy wuspěšni – a to je wažne“, wón doda. Ukraina so mjeztym 15 měsacow ruskemu nadpadej wobara, dźakowano tež wojerskej pomocy zapada.
Młodźi darićeljo kreje pytani
Němski čerwjeny křiž kampanju z nowej cilowej skupinu zahajił
Ratingen (dpa/SN). Hdyž chorownje konserwy kreje skazaja, wojuja pacienća častodosć hižo ze smjerću. Tola składy krejnych konserwow běchu naposledk stajnje zaso strašnje prózdne. Zwólniwosć krej darić, hižo wjele lět woteběra. Předewšěm młoda generacija je ćežko docpějomna, fachowcy rjeknu. „Bližimy so kritiskemu dypkej“, warnuje Patric Noha wot Němskeho čerwjeneho křiža. Na Dnju darjenja kreje steja tuž lětsa wosebje młodźi ludźo w srjedźišću. Jich chcedźa z kampanju w socialnych syćach přeswědčić, dokelž njemóžeš krej w medicinje dotal z ničim narunać. „Bjez kreje njebychu wšědnje tysacy ludźi žanu šansu měli, přežiwić“, Nohe potwjerdźi. W lětnikach z mnohimi porodami bě hišće wjele swěrnych, kotřiž darichu štyri, pjeć abo samo šěsć króć wob lěto poł litra kreje. Tola tuta generacije zestarja. Wot měrca je drje starobna mjeza wotstronjena, kiž seniorow wot darowanja kreje wuzamkuje. Tola starši ludźo bědźa so přiběrajcy z chorosćemi, trjebaja medikamenty a so tak jako darićeljo kreje hižo njehodźa.
Nošne rozrisanje trěbne
Porjedźenka
Pola křižerjow so wobhonił
To a tamne (13.06.23)
Britiskeho krosnowarja po fasadach su zajeli, jako spyta, bjez powjaza na 555 metrow wysoki mróčelak w južnokorejskej stolicy Seoulu zalězć. 24lětny krosnowar George King-Thompsom bě so hižo k 72. poschodej předrěł, jako jeho wohnjowa wobora zadźerža. Jeho dowjezechu z liftom technikarjow na třěchu 123 poschodowysokeho Lotte World Towera na juhu města. King-Thompson bě po informacijach hižo chětro wučerpany a ma nětko problemy z policiju. Jemu wumjetuja, zo je bjez dowolnosće wobsedźerja po fasadźe po puću był. Lotte World Tower běchu lěta 2017 wotewrěli.
Sylneho třichanja wosrjedź jězby dla je šofer wosoboweho awta w delnjobayerskim Passauskim wokrjesu z jězdnje zjěł a do płota zrazył. Kaž policija zdźěla, so muž při zražce njedźelu popołdnju snadnje zrani. Wuchowanska słužba dowjeze 79lětneho do chorownje. Na awće nasta škoda 20 000 eurow, porjedźenje płotu płaći znajmjeńša 10 000 eurow.
Dóńt klóštrow
Bonn (B/SN). Ličba klóšterskich wotnožkow w Němskej je so jara pomjeńšiła. Po podaćach Němskeje rjadniskeje konferency za nawodnistwa (DOK) je ličba klóštrow za žony wot 1 627 w lěće 2012 na 964 w lěće 2022 a klóštrow za muži w samsnym času wot 461 na 385 spadnyła. Kónc lěta zastupowaše DOK 10 953 knježnow a 3 349 mnichow.
Z ćežkim dóńtom so rozestajeć
Berlin-Braniborska (B/SN). Sintojo a Romojo bydlachu hač do Druheje swětoweje wójny w katolskej wosadźe arcybiskopstwa Berlin/Zehdenick. Njebuchu pak před deportaciju do koncentraciskich lěhwow škitani. Nětko so wosada a slědźerjo z jich wosudami zaběraja. Při zachodźe do cyrkwje připrawja wopomjatnu taflu. Dotal je to jenička wosada, kotraž so wobšěrnje z dóńtom Sintow a Romow rozestaja a swoje dopóznaća w nabožiny dźěćom spřistupni.
Antisemitizm wuzamknyć
Priwatne armeje porjadować
Moskwa (dpa/SN). Ruske zakitowanske ministerstwo chce wšitke ruske wojerske jednotki dobrowólnych wojowarjow z wukazom pod swoje wojerske rozkaznistwo nuzować. Hač do 1. julija maja wšitke tute jednotki wotpowědne zrěčenje z ministerstwom podpisać, w Moskwje zdźěla. W Ukrainje wojuje mjeztym wjace hač 40 dobrowólnych jednotkow, kotrychž prawniski status chcedźa tak zawěsćić. Šef ruskeje priwatneje armeje Wagner, Jewgenij Prigožin, so spjećuje, tajke zrěčenje z Moskwu podpisać.
Sudniske jednanje přestorčene
Hamburg (dpa/SN). Sudniske jednanje před Hamburgskim krajnym sudnistwom wo skóržbje wotškódnjenja přećiwo zhotowjerjej šćěpiwa přećiwo koronawirusej Biontech dla su přestorčili. Přičina je skóržba prawiznika skoržaceje žony přećiwo sudnikej. Prawiznik sej žada, zo měła komora wo skóržbje jednać a nic jednotliwy sudnik. Žona Biontech wumjetuje, zo je po šćěpjenju wučerpana, mučna a zo njemóže wjace spać. Biontech wumjetowanja wotpokazuje.
Berlusconi 86lětny zemrěł
