Warnuje před zwrěšćenjom reformy
Berlin (dpa/SN). Do zetkanja nutřkownych ministrow Europskeje unije k azylowej politice je zwjazkowa ministerka za nutřkowne naležnosće Nancy Faeser nuznosć trěbnych reformow potwjerdźiła a před negatiwnymi sćěhami warnowała, dyrbjało-li zetkanje zwrěšćić. „Njejsmy w 1990tych lětach po wójnje na Balkanje fungowacy system natwarić móhli a tež po wulkim hibanju ćěkancow ze Syriskeje 2015 nic“, rjekny politikarka SPD nowinarjam. Nětko je wažne, skónčnje wuslědki docpěć, wona rjekny.
Na zetkanju nutřkownych ministrow w Luxemburgu chcychu dźensa znowa spytać, wulku reformu europskeho prawa na azyl nastorčić. Na blidźe ležachu wjacore naćiski. Žro noworjadowanja je razniše wobchadźenje z ćěkancami, kotřiž nimaja žanu šansu na prawo trajneho přebywanja w Europje. Jich próstwy wo azyl chcedźa hižo na wonkownych mjezach EU wobdźěłać a potrjechenych migrantow spěšnje zaso wotsunyć. Tomu spjećuja so předewšěm čłonojo Zelenych a SPD w Němskej a druhich krajach.
Biskop za radikalnu změnu
38. Němski ewangelski cyrkwinski zjězd w Nürnbergu zahajeny
Nürnberg (dpa/SN). Z Božej słužbu su w Nürnbergu 38. Němski ewangelski cyrkwinski zjězd zahajili. Zwjazkowy prezident Frank-Walter Steinmeier je w swojej narěči wobdźělnikow k jednoće namołwjał, zo móhli klimowej krizy zadźěwać. Wažne je, spěšnje jednać a po móžnosći wjele ludźi sobu wzać, rjekny wón wčera po zahajacej Božej słužbje. Tole dźe pak jenož zhromadnje. „Rozumju njesćerpnosć, haj zadwělowanosć mnohich młodych ludźi nastupajo škit klimy, dokelž steji jich přichod na hračkach. Dyrbimy pak puće namakać, po kotrychž móžemy zhromadnje kročić a dyrbimy tež słabšim składnosć dać, něšto z toho zdobyć“, zwjazkowy prezident rjekny. Křesćenjo su stajnje wjele k solidariće přinošowali. Cyrkwje jako městno rozmołwy su nětko a w přichodźe nuznje trěbne, wón rjekny.
Zwada popłatkow dla
Drježdźany (dpa/SN). We wobłuku sakskeje knježerstwoweje koalicije CDU, Zelenych a SPD jewi so njeměr nastupajo dojednanje koaliciskeho zrěčenja, kotrež njeje statne knježerstwo přesadźiło.
Po wobzamknjenju z lěta 2019 chcychu gmejny Sakskeje wot winowatosće wuswobodźić, sej wot potrjechenych wobydlerjow ekstremnje wysoke popłatki za wutwar dróhow žadać, je-li gmejna w etatowym nuzowym połoženju. Wukazanje popłatkow je poprawom dobrowólna naležnosć komunow. Tójšto gmejnow je popłatki mjeztym wotstroniło.
We wjacorych zwjazkowych krajach, mjez druhim w Braniborskej, Mecklenburgsko-Předpomorskej, Saksko-Anhaltskej a Durinskej su tutón wjele diskutowany komunalny popłatk mjeztym dospołnje wotstronili. Na tutón kročel pak njejsu so tři koaliciske strony Sakskeje dojednać móhli. Jenož winowatosć, sej w etatowych nuzowych padach pjenjez žadać, chcychu wotstronić. Po informacijach nowinarjow pak njeje sakske statne knježerstwo tute rjadowanje dotal přeco hišće wotstroniło, dokelž njeje „juristiske pruwowanje“ hišće wotzamknjene.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (08.06.23)
Starodawny són spjelniła je sej bywša wučerka francošćiny Evelyn Haupt při wopyće francoskeho prezidenta Emmanuela Macrona a zwjazkoweho kanclera Olafa Scholza (SPD) w Podstupimje. Wona bě jeno za to z Hannovera přijěła a prošeše wobeju politikarjow wo zhromadny foto, jako wobaj po Nowym torhošću dźěštaj. Macron a Scholz njedaštaj so dołho prosyć a so za selfie zestupištaj.
Na wšě 23 dźiwich swini je so wčera dopołdnja do parka w sewjerorynsko-westfalskim Hagenje zabłudźiło. Při tym jednaše so wo dwě rancy z młodźatami, město zdźěla. Park su zawrěli. Šulerjo bliskeje šule njesmědźachu twarjenje wopušćić. Hajnicy črjódu swini z parka do bliskeho lěsa přewodźachu. Hakle w nalěću běchu dźiwje swinje w Hagenje njeměr zbudźili, jako so do bydlenja zadobychu a je dospołnje zapusćichu.
Štó budźe nas 2035 lěkować?
Stara ludnosć Sakskeje trjeba wjac młodych lěkarjow – Köpping bilancuje
Drježdźany (SN/mb). „Wěmy, zo je wosebje situacija dokoławokoło zastaranja ludnosće z domjacymi lěkarjemi we wjesnych kónčinach Sakskeje napjata“, praješe wčera sakska socialna ministerka Petra Köpping (SPD). We Łužicy njeje Běłowodźanski region w dosahacej měrje zastarany. Po cyłym kraju je tuchwilu 452 praksow njewobsadźenych, 2 597 domjacych lěkarjow dźěła w Sakskej, woni su přerěznje 54 lět stari. Před štyrjomi lětami je socialne ministerstwo w Drježdźanach na dźewjeć stronach „plan 20 dypkow za naslědne zaručenje mediciniskeho zastaranja hač do 2030, kotrež potrjebje w Sakskej wotpowěduje“ napisało. Ze starobnym přerězkom 47 lět je sakska ludnosć dwě lěće starša hač wobydlerstwo Němskeje, štož zwisuje z wotpućowanjom młodźiny po přewróće a tehdomnišim njejapkim spadom ličby porodow. Jenož někotre serbske gmejny kaž Ralbicy-Róžant na prěnim městnje maja hišće młodu ludnosć kaž sakski teritorij na kóncu NDR.
Bamž nuznje operowany
Rom (dpa/SN). Bamža Franciskusa dyrbjachu dźensa nuznje operować. Lěkarjo w Romje su brjušnicu 86lětneho pod dospołnej narkozu wotewrěli, kaž Swjaty stoł zdźěla. Po tym dyrbi wótc katolskeje cyrkwje něšto dnjow w chorowni wostać. Bamž bě minjene dny stajnje zaso na bolosće w brjuše skoržił. Při přepytowanju w chorowni su łamk našli. Naposledk běchu bamža 2021 schorjenja črjewa dla operować dyrbjeli.
Cigarety město mjasa namakali
Frankfurt n. W. (dpa/SN). Na wšě 900 000 ilegalnych cigaretow su cłownicy na awtodróze 12 sćazali. Cigarety běchu jako posyłka mjasa deklarowane. Nakładne awto běchu z mobilnym röntgenowym nastrojom přepytowali. Awto transportowaše kartony, w kotrychž bě pječa stajnje dwanaće kilogramow mjasa. Město toho bě w kóždej tyzy 6 000 cigaretow. Cyłkownje dźesać paletow „mjasa“ na awće steješe. Dawkowu škodu wobliča cłownicy na 200 000 eurow.
Dalše Mardery Ukrainje
Nižozemski ministerski prezident Mark Rutte (naprawo) je wčera ...
Kijew a Moskwa dawatej sej mjezsobu winu
Kijew (dpa/SN). Ukrainu njemóže po słowach prezidenta Wolodymyra Zelenskeho rozbuchnjena murja spjateho jězora nad rěku Dnipro na juhu kraja při wróćodobyću wobsadźenych kónčin zadźeržeć. „Wot ruskich teroristow zawinowana katastrofa we wodowej milinarni Kachowska Ukrainu njehaći“, rjekny Zelenskyj wčera wječor w swojim wšědnym widejowym poselstwje. Po jeho měnjenje rozbuchnjenje murje spjateho jězora tomu słuži, ukrainsku přećiwnu ofensiwu znjemóžnić.
Před Bjezstrašnostnej radu UNO w New Yorku stej sej Moskwa a Kijew mjezsobu winu za zničenu murju spjateho jězora Kachowka dawałoj. Ukrainski wulkopósłanc pola UNO Serhij Kislizia rěčeše wčera na krótkodobnje zwołanej nuznej konferency wo „akće ekologiskeho a technologiskeho terorizma“. Rozbuchnjenje je dalši přikład „ludomordarstwa Ruskeje na Ukrainjanach“. Ruski wulkopósłanc Wasili Nebensja porno tomu rjekny, zo je njeskutk „zaměrna sabotaža Kijewa“, kiž ma so jako wójnske złóstnistwo zastopnjować. Kijew je spjaty jězor za „njepředstajomne złóstnistwo znjewužiwał“, zastupnik Ruskeje rjekny.
Ewangelski zjězd zahajeny
Nürnberg (dpa/SN). Ze swjatočnej Božej słužbu so dźensa w Nürnbergu 38. němski ewangelski cyrkwinski dźeń zahajili. Swjedźenske zarjadowanje wotmě so na Hłownym torhošću druheho najwjetšeho města Bayerskeje před kulisu Kejžorskeho hrodu a w susodstwje wobeju protestantiskeju cyrkwjow Swj. Lorenza a Swj. Sebalda. Hač do njedźele wočakuja wopytowarjow, zo bychu zhromadnje wěru pohłubšili a wo aktualnych politiskich temach diskutowali. Swoje wobdźělenje připrajili su politikarjo Zwjazka a zwjazkowych krajow. Zwjazkowy prezident Frank-Walter Steinmeier chcyše dźensa wječor wobdźělnikow zjězda postrowić. Sobotu wočakuja zwjazkoweho kanclera Olafa Scholza (SPD). Hosćo w Nürnbergu su nimo toho zwjazkowa wonkowny ministerka Annalena Baerbock a hospodarski minister Robert Habeck (wobaj Zelenaj) kaž tež bayerski ministerski prezident Markus Söder (CSU).
