Berlin (SN/mb). Po zakonju wo inwesticijach we wuhlowych rewěrach měješe zwjazkowe ministerstwo za hospodarstwo a energiju hač do kónca junija prěni raz „hospodarsku dynamiku w rewěrach na wědomostnym zakładźe“ ewaluować. Zo njejsu nadawk zdypkom zdokonjeli, je koło politikarjow Lěwicy z wuhlowych rewěrow cyłeje Němskeje kritizowało. Zapósłancy – mjez druhim Antonia Mertsching ze sakskeho a Anke Schwarzenberg z braniborskeho krajneho sejma – sej žadaja, zo by knježerstwowa politika wobydlerjow bóle do procesa změny strukturow zapřijała. Dalši dypk w poziciskej papjerje lěwicarjow je koncentrowanje spěchowanja na industrijne zawody, kotrež naslědnje dźěłaja a swojim přistajenym mzdu po tarifje płaća. W sakskej Łužicy njeje po měnjenju awtorow najwjetše wužadanje, nowe dźěłowe městna wutworić, ale kwalifikowanych sobudźěłaćerjow přiwabić, wšako budźe we wokrjesomaj Budyšin a Zhorjelc hač do 2030 najskerje 50 000 dźěławych mjenje. Hač měło so we Łužicy runja porynskemu rewěrej wudobywanje brunicy hižo 2030 zakónčić, w papjerje njesteji.

Raguhn-Jeßnitz (dpa/SN). Zepěrajo so na cyłoněmski trend je AfD znowa komunalne wólby we wuchodnej Němskej za sebje rozsudźiła. Kandidat AfD Hannes Loth je wčerawše wólby měšćanosty w městačku Raguhn-Jeßnitz w Saksko-Anhaltskej dobył, tydźeń po tym, zo su w durinskim Sonnebergu prěni króć krajneho radu AfD wuzwolili. Politikarjo Lěwicy a Zelenych reagowachu starosćiwje. AfD ma wólby za „signal, zo je strona wuwiće na wuchodźe Němskeje skrućiła“.

Mjenje pjenjez za dźěći

Berlin (dpa/SN). K financowanju planowaneho zakładneho zawěsćenja dźěći su po słowach zwjazkoweho financneho ministra Christiana Lindnera za lěto 2025 „najprjedy raz“ dwě miliardźe eurow zaplanowali. „Zwjazkowe knježerstwo pak nima hišće žadyn koncept a tak tež žane dokładne trochowanje kóštow“, rjekny politikar FDP nowinarjam. Planowana suma je wo tójšto niša hač dwanaće miliardow eurow, kotrež bě sej swójbna ministerka Lisa Paus (Zeleni) žadała.

Israel nadběhuje Palestinjanow

Paris (dpa/SN). Po dny trajacych nje­měrach so zdawa, jako by žołma namocy na dróhach Francoskeje poněčim zaso woćichła. Minjenu nóc je policija po informacijach nutřkowneho ministerstwa 49 ludźi zajała, jasnje mjenje hač dny do toho. W někotrych městach, kaž w Lyonje, je drje zaso k namócnosćam dóšło. Hladajo na razne njeměry minjenych nocow ze sta palacymi so awtami a twarjenjemi a zdźěla wjace hač tysac zajatymi demonstrantami, bě nóc na póndźelu po wšěm kraju poměrnje měrna.

Nutřkowny minister Gérald Darmanin je tež zašłu nóc masiwnu prezencu policije wukazał. Po wšěm kraju bě 45 000 zastojnikow zasadźenych, tež tónkróć zaso z pancerowanymi jězdźidłami. Po informacijach medijow mějachu policisća ­přikaz, konsekwentnje wustupować a namócnych demonstrantow zajeć. Po smjerći 17lětneho přez kulku policista při wobchadnej kontroli minjenu wutoru je Francoska masiwnu žołmu namocy dožiwiła. Wospjet dóńdźe k wurubjowanju wobchodow, k zapalerstwu a namócnym konfrontacijam mjez policistami a randalěrowacymi.

Berlin (dpa/SN). Hišće tutón tydźeń chcedźa w zwjazkowym sejmje nowy zakoń nastupajo tepjenja wobzamknyć. Zazběh procesa bě dźensniše słyšenje we wuběrku sejma za klimu a energiju. Słowa jimali su so tam mjez druhim ­zastupnicy rjemjesła, imobilijoweje branše, zastaranskeho hospodarstwa a škita přetrjebarjow. Wuběrk ma doporučenja zdźěłać, kotrež chcedźa zapósłancam k wothłosowanju předpołožić.

Koaliciscy partnerojo SPD, Zeleni a FDP běchu so měsacy dołho nastupajo změny zakonja wadźili. Dojednali so na to su, zo smědźa přichodnje jenož hišće nowe tepjenja zatwarić, kotrež znajmjeńša 65 procentow swojeje energije z wobnowjomnych žórłow bjeru. Wot 2024 płaći to najprjedy raz za nowotwarske kónčiny. Nimo toho dyrbja komuny ­wotpowědne planowanje ćopłoty hač do lěta 2028 předpołožić. Předsyda wuběrka Klaus Ernst (Lěwica) kritizowaše, zo je čas přihota za zapósłancow pře­krótki. Wón šwikaše „pobrachowacu ­česćownosć“ parlamentej napřećo.