Drježdźany (SN/MkWj). Na swojej wukrajnej jězbje je sakski minister za wobswět a ratarstwo Thomas Schmidt (CDU) w Madźarskej wjele podpěry za swoje namjety nazhonił, spěchowansku politiku Europskej unije zjednorić a běrokratiju w tym zwisku pomjeńšić. Tole wuchadźa z nowinskeje zdźělenki ministerstwa w Drježdźanach. Do Madźarskeje přeprosyłoj běštaj Schmidta tamniši ratarski minister dr. Sándor Fazekas a wiceprezident Madźarskeje narodneje zhromadźizny István Jakab. „W rozmołwach běchmy sej přezjedni, zo je w nowej spěchowanskej dobje, kotraž so lěta 2021 zahaji,­ nowozapočatk z mjenje rjadowanjemi a mjenje běrokratiju trěbny“, Thomas Schmidt podšmórny. Jeho madźarski kolega dr. Fazekas přeje sej intensiwniše zwiski mjez Madźarskej a Sakskej. Styki hodźeli so tež na wobswětowu politiku a zežiwjenje rozšěrić. Přeprošenje Schmidta na wopyt Sakskeje je dr. Fazekas přiwzał. Konkretnje pomhać chce Sakska Madźarskej mjez druhim z biologiskimi wodo­čisćenskimi připrawami.

Berlin (dpa/SN). Němska wjedrarnja chce wotnětka nowy a lěpši warnowanski system wužiwać. Z nim móža tež mjeńše kónčiny, kaž gmejny a jednotliwe měšćanske dźěle, před njewjedrami warnować, rozłoži Hans-Joachim Koppert, nawoda wotrjada za wjedrowe prognozy Němskeje wjedrarnje, wčera w Berlinje. Dotal su warnowanja před njewjedrami za 400 wulkowokrjesow wobličili. Nětko móža 10 000 gmejnow cyle dokładnje warnować a alarmować. Wot awgusta ma system tež jako app předležeć.

Přičiny, system warnowanja přestajić, běchu někotrežkuli mjerzanja: „Je so stajnje zaso stawało, zo smy cyły wokrjes před njewjedrom warnowali, štož bě tež prawje. Potrjecheny pak bě na kóncu jeničce dźěl kónčiny. Mnozy čujachu so wopak alarmowani“, Hans-Joachim Koppert rjekny. Přez pjeć lět je wjedrarnja nowy dokładniši system, takrjec meteorologiski zoom, wuwiwała. Warnować chcedźa nětko jenož te kónčiny, kotrež su woprawdźe potrjechene. To płaći tež w zymje za sněh.

Mjedwjedź je so do awta zamknył, a to w małoměstačku njedaloko Denvera w USA. W interneće wozjewjeny widejo pokazuje, kak policisća zwěrjo kedźbliwje z kófroweho ruma na swobodu pušća. Njeje ani tak wulki. Přiwšěm je cyłe awto zapusćił. Samo wodźidło je rozkusane. Wobsedźerka awta chcyše poprawom na dźěło jěć, nětko pak dyrbi najprjedy škody wotstronić. „W awće smjerdźi hórje hač za mokrym psom“, wona praji.

Nic bjez mojeje tobołki! Nimale dwě třećinje žonow Němskej – 59 procentow – bydlenje tak derje kaž ženje bjez ručneje tobołki njewopušća. To je woprašowanje apotekoweho portala wunjesło. Hišće wjace, 72 proc., ma wobsah tobołki za priwatny a druhim napřećo za „absolutnje tabu“. Njezadźiwa tuž, zo by 47 proc. žonow emocionalnje jara trjechiło, by-li so tobołka zhubiła.

Berlin (dpa/K/SN). Ćěkajo do noweje domizny je lětsa po cyłym swěće hižo wjac hač 3 600 ludźi žiwjenje přisadźiło. Mjezynarodna organizacija za migraciju zwěsća za prěnje poł lěta znajmjeńša 3 694 mortwych abo zhubjenych. Porno prěnjemu połlětu 2015 je to přirost wo 18 procentow. Najstrašnišo je přez Srjedźne morjo ćěkać. Tam zatepi so lětsa hižo wjac hač 2 900 ludźi.

Wotum njedowěry přetrała

Mainz (dpa/SN). Porynsko-pfalcska ministerska prezidentka Malu Dreyer je wotum njedowěry opoziciskeje CDU w krajnym sejmje zwrěšćeneje předanje lětanišća Hahn dla přetrała. Politikarka SPD dósta dźensa 52 hłosow. Runje telko hłosow ma tamniša koalicija SPD, FDP a Zelenych. Opozicija bě sej wotum njedowěry žadała, po tym zo bu znate, zo njebudźe lětanišćo dubioznemu chinskemu inwestorej předate. Tón bě falšowane bankowe dokumenty předpołožił. Nimo toho njebě dorěčanu pjenježnu sumu za lětanišćo­ přepokazał.

Obama sćele wojakow