Drježdźanska lijernja zhotowja figury za Budysku šćežku bajow
Drježdźany/Budyšin (CS/SN). 26. junija chcedźa w Budyšinje šćežku bajow wotewrić. Přikład za tónle projekt su figury palčikow w pólskim Wrócławju, kotrež su pola turistow jara woblubowane. Nětko ma sprjewine město podobny magnet za wopytowarjow dóstać. Hdźe šćežka dokładnje powjedźe, ma hišće małe potajnstwo wostać. Jasne pak hižo je, zo nasta dźewjeć bronzowych figurow a připrawja dźesać taflow z rozjasnjenjemi w serbšćinje a němčinje a w pismje za slepych kaž tež z QR-codami. Dźesać taflow a jenož dźewjeć figurow tohodla, dokelž ryćerja Dučmana na studni na Hłownym torhošću sobu zapřijeja.
