Slepo (AK/SN). Za přichodny strowotniski centrum w Slepom chce gmejna hišće lětsa prěnje twarske dźěła wupisać. Centrum chcedźa po móžnosći klětu nalěto twarić započeć. Tole zdźěli nawoda twarskeho wotrjada Slepjanskeho zarjadniskeho zjednoćenstwa Steffen Seidlich na zašłym posedźenju gmejnskeje rady. Po jeho słowach tuchwilu dokładny časowy plan zdźěłaja.

Za strowotniski centrum saněruja bywšu Lejnikec wilu při železniskim přechodźe blisko křižowanišća Miłoraska/Wojerowska. Za to chcedźa srědki z tak mjenowaneho Sakskeho fondsa nałožować. To su srědki, kotrež dóstanu kraje z wosebiteho zamóženstwa Zwjazka. „Z tohole fondsa dóstanje gmejna maksimalnje 729 000 eurow“, Seidlich rozłoži. „Z tutej sumu njemóžemy Lejnikec wilu jenož energetisce saněrować, ale móžemy jeje přetwar dospołnje financować.“ W juliju Sakski zwjazk městow a gmejnow po wšěm zdaću rozsudźi, hač móže gmejna pjenjezy za strowotniski centrum wužiwać.