Z wudaća: štwórtk, 25 junija 2015

Projektowy tydźeń Worklečanskeje zakładneje šule „Michał Hórnik“ pod hesłom „Wot zorna ke chlěbej“ je zawčerawšim swój wjeršk dožiwił. W sportowej hali předstajichu holcy a hólcy musical, kotryž běchu minjene dny k temje nazwučowali. W nim předstajichu, kelko dźěła je trěbne, prjedy hač wšědny chlěb na blido dó­stawamy. Někotryžkuli hudźbny a dźiwadźelniski talent je tak swoje kmanosće pokazał­, štož wšak bě sobu zaměr projekta. Foto: Feliks Haza

Za dźěłarničku so přizjewić

Smjerdźaca. Hač do jutřišeho pjatka maja šulerjo 5. a 6. lětnika składnosć, so za dźěłarničku bubnarjow w Rěčnym centrumje WITAJ přizjewić. Dźěłarnička wotměje so 3., 4. a 10. julija w Smjerdźacej. Z młodym hudźbnikom Symanom Hejdušku nawuknu šulerjo bubnować. Wjeršk projekta budźe wustup we wobłuku dźěćaceho programa na folklornym festiwalu 11. julija w Chrósćicach. Nimo bubnowanja čaka na wobdźělnikow lěhwowy woheń, při kotrymž sej sami jědź spřihotuja. Wuměnjenja za dźěłarničku žane trěbne njejsu, započatk je lochki­. Zajimcy njech přizjewja so w rěčnym centrumje pod telefonowym čisłom 03591/ 550 400.

Z ministrom diskutować

Budyšin. Pod hesłom „Móžemy so w Němskej hišće wěsći čuć?“ přeproša kandidat CDU za wólby Budyskeho wyšeho měšćanosty Matthias Knaak jutře, pjatk, w 19 hodź. na diskusiju ze zwjazkowym nutřkownym ministrom Thomasom de Maizièrom w Budyskim Kamjentnym domje. Při tym póńdźe wo jězdźidłowu kriminalitu runje tak kaž wo drogowu a wo prašenje dosahaceho wuhotowanja policije. Wobydlerjo su na­mołwjeni sobu diskutować.

Hózk (SN/MWj). Prěni hornjołužiski běh přez zadźěwki Black Bird Run wotměje so 6. septembra w Hózku. Wón powjedźe wobdźělnikow na dohromady dźesać kilometrach po Hózkowskej wokolinje, hdźež čakaja na nich korjenje, błóto, kamjenje a wjele dalšeho. Dwójce dyrbja so běharjo přez parcours předrěć a maja 15 zadźěwkow přewinyć, kotrež rěkaja mjez druhim murja smjerće, chójnina a pawčina. Jedyn ze zadźěwkow je běhej mjeno spožčił, wšako dyrbja wobdźělnicy tež Čorny Halštrow přewinyć.

Ideju za běh trochu hinašeho razu měješe 29lětny Drježdźanjan Thomas Jensch, kiž bě w Hózku wotrostł. Po jeho słowach je Black Bird Run za nazhonitych runje tak kaž za hobbyjowych běharjow mysleny. Přizjewić móža so zajimcy e-mailnje pod , na dnju wubědźowanja tež hišće hač do 11 hodź. na městnje. Běh započnje so w 13 hodź. Startowy pjenjez wučinja 15 eurow. Za přihladowarjow je wopyt darmotny. Dalše informacije pod www.facebook.com/

25.6.–01.7.2015: Ted 2: wšědnje 14:45 hodź. (nimo štw, pó a srj), 17:15 a 20 hodź. | pj 22:30 | so 22:15 hodź. Insidious: Chapter 3: pj 22:30 hodź. Rico, Oskar und das Herzgebreche: wšědnje 17:15 hodź. (nimo nj a pó) | nj 13 hodź. | pj, so, nj a wu 15 hodź. Poltergeist: wšědnje 20 hodź. | pj 22:15 hodź. Jurassic World: wšědnje 14:15 hodź. (nimo štw, pó a srj), 16:45 a 19:30 hodź. | so 22:15 hodź. | w 3 D Pitch Perfect 2: wšědnje 17:30 hodź. Spy – Susan Cooper Undercover: wšědnje 19:30 hodź. (nimo nj a pó) | nj 19:45 hodź. Ostwind 2 – Rückkehr nach Kaltenbach: pj, so, nj a wu 15 hodź. | nj 12:30 hodź. Tinkerbell und die Legende vom Nimmerbiest: nj 12:30 hodź. | w 3 D San Andreas: so 22:30 hodź. | w 3 D Mad Max: pj 22:15 hodź. | w 3 D Honig­ im Kopf: nj 17 hodź. Shaun das Schaf: nj 13 hodź.

Kino-ekstra: A Most Violent Year: pó 17:15 a 20:15 hodź.

Zhorjelc. Policija warnuje wobydlerjow wuraznje před wosebitym wašnjom paduchow awtow. Na terenje Zhorjelskeje policajskeje direkcije je w zašłymaj měsacomaj k wjacorym padam tak mjenowaneho „homejackinga“ dóšło. Při tym so paduši najprjedy do bydlenja zadobudu, wozmu sej tam namakany awtowy kluč a pokradnu na to wotpowědne awto. Zwjetša zadobychu so njeznaći přez zachodne durje, w někotrych padach wone ani zamknjene njeběchu, štož skućićelam „dźěło“ wolóži. Kluč wisaše často direktnje pódla durjow, druhdy ležeše na kamorčku na chódbje. Pokradnyli su paduši zwjetša awta typa Ford, Audi, VW, Škoda a Mercedes. Policija tuž radźi, chěžne a bydlenske durje stajnje zamknjene měć a awtowy kluč w bydlenju po móžnosći do kamora połožić a nic widźomnje ležo wostajić. Podhladnje zadźeržace so wosoby měli wobydlerjo spěšnje policiji přizjewić.

Budyšin (SN). Za zajutřišim, sobotu, je sej Serbski rozhłós něšto wosebite wumyslił, mjenujcy „dźeń serbskeho spěwa“. To chcedźa raz bjezwuwzaćnje jeno serbsku hudźbu we wšěch třoch wusyłanskich hodźinach hrać, wot ranja w šesćich hač do dźewjećich, a to štučki, kotrež sej słucharjo přeja. Tak njech lubowarjo serbskeje hudźby sobotu rano do Serbskeho rozhłosa pod telefonowym čisłom 03591/ 37 400 zazwonja a moderatorej Štefanej Pašce praja, što bychu rady słyšeli a čehodla. W studiju spěw potom po móžnosći spěšnje wupytaja a zahraja. Přez Facebook abo e-mailnje móža sej jón připosłucharjo hižo nětko skazać. Facebookowa­ strona rěka „MDR Serbja“, internetna adresa je www.mdr.de/serbski-program. Serbscy rozhłosownicy su na hudźbne přeća jara wćipni.

Zwjazkowe předsydstwo Domowiny je so na swojim mejskim posedźenju (w nje­zjawnym dźĕlu!) z poslednim „zmĕrcowskim padom“ zabĕrało. Dokelž jedna so při tym wo bytostne prašenje pomĕra zwjazkoweho předsydstwa, z tym oficialneje Domowiny, k demokratiskej zjawnosći a zjawnej a wotewrjenej demokratiji, a dokelž sym sam potrjecheny, chcu so k tomu wuprajić.

Hermsdorfske ST

– SJ Njebjelčicy 1:2 (1:1)

SJ Njebjelčicy

– Arnsdorfski FV 1:1 (1:1)

Zestawa hosći: Hahn – Šołta, Haška, Pawlik, Hrjehor (88. Hoier), Kral, Cyž, Hommel, Dubaw, Lejnart, Čornak (53. Hanuza)

Do poslednjeje hry minjenu njedźelu nastupichu Njebjelčanscy koparjo wutoru tydźenja w Hermsdorfje k nachwa­tanskej partiji, kotruž njeběchu sobotu do toho njewjedra dla přewjedli. Bjez­mała bychu Njebjelčenjo w 7. min. nawjedowali, ale třělwa Čornaka bu na wrotowej liniji wotwobarana. Přez wótry kop do hornjeho třiróžka pak poradźi so Lejnartej we 28. min. 0:1. Krótko do přestawki domjacy přez konter z niskej třělwu wurunachu.

W 2. połčasu hosćo wuhrate šansy k dalšim wrotam njewužichu. Hakle w 83. min. trjechi Cyž z wólnym kopom nisko do delnjeho kuta dobyćerske 1:2.

Zestawa domjacych: Hahn – Šołta, Haška, Pawlik, Hrjehor (71. Čornak), Hanuza, Hommel, Kral (46. Dubaw), Cyž, Lejnart, Ričel (71. Hoier)

Minjenu njedźelu, w poslednjej partiji hrajneho lěta 2014/2015, bě wotpohlad Njebjelčanskeju trenarjow Handrija Kraw­čika a Detlefa Panica, sej tři dypki doma zdźeržeć.

Sokoł Ralbicy/Hórki

– Drohotka Ramnow 4:2 (1:1)

Zestawa domjacych: Gloxyn – Matka, von Köding, Schultz, Bjeńš, Wowčerk, Korjeńk Šołta, Čórlich, Rawš (43. Wałda), Domaška

K poslednjej dypkowej hrě witachu Sokoljo koparjow z Ramnowa. Wobě mu­stwje so w tabulce wjace wulce polěpšić njemóžeštej a chcy­štej tuž ofensiwnje wustupować. Domjacym pobrachowaše pjeć hrajerjow, hosćom sydom. Domaška měješe prěnju móžnosć za Sokoł. Jeho kop pak dźěše snadnje wyše wrotow. Po tym­ mějachu Ramnowčenjo hnydom tři dobre składnosće nawjedowanja. Stajnje pak běše Gloxyn na městnje a za­statkej za­dźě­wa. Trenar Thomas Schultz po­­zbu­dźi swojich hrajerjow, skónčnje wotućić a dwuboje přiwzać. W 20. min. hrajachu hosćo wróćo k wrotarjej. Tón pak bul za­šmjata, Domaška sej jón hrabny a docpě 1:0. Tři mjeńšiny na to móhł Domaška druhe wrota třělić, dokelž bě po přihrawce Korjeńka nadobo sam před wrotarjom. Krótko do přestawki pak Grohmann za hosći wuruna.