Z wudaća: pjatk, 28 awgusta 2015

Njebjelčanska gmejna chce přichodnje w přiběracej měrje wobnowjomne energije wužiwać. Nimo toho tam rozmysluja, kak móhli zwoprawdźić, zo so kom­una sama z energiju zastara.

Njebjelčicy (HS/SN). Na nowej Njebjelčanskej pěstowarni chce gmejna fotowoltaisku připrawu instalować. Wotpowědne zrěčenje z Lipšćanskej firmu EnergieAutark su radźićeljo na swojim wčerawšim posedźenju wobzamknyli. Jed- naćel předewzaća Hanzo Wylem-Kell bě hižo něšto dnjow do toho ze swojeho wida najkmańšu formu instalacije foto­woltaiskeje připrawy předstajił. Zwjazana z baterijemi ma wona swójske zastaranje pěstowarnje z milinu zaručić. Hdyž kubłanišćo na přikład w připołdnišich hodźinach mjenje miliny přetrjebuje, móža ju do syće wotedać, štož woznamjenja za gme­jnu dochody.

Čorny Chołmc (AK/SN). W srjedźišću wčerawšeho posedźenja Wojerowskeje přirady za serbske naležnosće steješe Čornochołmčanski Krabatowy młyn, hdźež tuchwilu Jurja Brězanowy dom twarja. Wo stawje twarskich dźěłow informowaše předsyda tamnišeho spěchowanskeho towarstwa Tobias Čižik. Lětsa maja třěcha, elektrika a sanitarne rumnosće hotowe być.

Serbska přirada žada sej dołhodobnu financnu wěstotu. „Idealne by institucionelne spěchowanje było“, rjekny předsyda přirady Dirk Nasdala. Z jeho wida ma tež wokrjes zamołwitosć. Dotal spěchuje město Wojerecy Krabatowy młyn lětnje z 20 000 eurami, přichodnje ma to 50 000 eurow być. Towarstwo dyrbi spagat mjez hospodarskim a kulturnym narokom, mjez komercom a idealizmom zmištrować. Zastupowacy předsyda přirady Werner Sroka namjetowaše nošerski zwjazk a rozmyslowaše, hač njehodźi so přidatnych 30 000 eurow města za projektoweho managera zasadźić.