Z wudaća: wutora, 29 septembera 2015

Sportowi přećeljo z Kazachstana, Pólskeje, Afghanistana, Tuneziskeje a Hornjeje Łužicy­ su so na 13. integraciskim volleyballowym turněrje zepěranišća sportoweho towarstwa Viktorije Worklecy a Sakskeho krajneho sportoweho zwjazka wobdźělili. Cyłkownje sydom mustwow je we Worklecach štyri hodźiny hrało. Dobył je ho­sćićel Viktoria před TSV Drježdźanami a pólskim sportowym cyłkom. Foto: Křesćan Mikławšk

Rom (B/SN). Proces zbóžnoprajenja Jana Pawoła I., kiž bě lěta 1978 jeničce 33 dnjow jako bamž skutkował, je w rozsudnej fazy. „Positio“, wuznamny spis z datami a z „pócćiwym žiwjenskim skutkom“ Albina­ Lucianija, je dozhotowjeny, kaž z Vatikana rěka.

Za jednotu měšnikow

Vatikan (B/SN). Bamž Franciskus nadźija so, kaž sam praji, bórzomneho wujednanja z tradicionalistiskim bratrowstwom měšnikow swjateho Piusa X. „Dowěrjam tomu, zo namakamy w blišim přichodźe rozrisanja, tworjace zdobom zaso połnu jednotu mjez měšnikami a nawodami bratrowstwa“, piše Franciskus w lisće nastupajo duchowny přihot a přewjedźenje „swjateho lěta miłosće“, kotrež so 8. decembra započnje.

Wopyta ewangelsku cyrkej

Rom (B/SN). Swjaty wótc wopyta 15. nowembra němskorěčnu ewangelsko-luthersku Chrystusowu cyrkej w Romje. Nadrobnosće njejsu dotal znate. Předpředchadnik Franciskusa, Jan Pawoł II., bě 1983 jako prěni bamž wot časa reformacije z Chrystusowej cyrkwju wopytał lutherski Boži dom, tež Benedikt XVI. běše tam hižo z hosćom.

Bamž prěni raz do Afriki

Swojoraznu jězbnu šulu skónčiła je policija w poruhrskim Hagenje. Zastojnikam bě awto napadnyło, kotrež po parkowanišću tam a sam jězdźeše. Njemało pak so dźiwachu, jako wuhladachu 13lětneho za wodźidłom. Pódla njeho sedźeše 38lětny nan, mějo dwaj promilej alko­hola w kreji. 13lětny rjekny, zo jězdźić zwučuje. To wšak je w přitomnosći staršeju dowolene, jeho nan přispomni. Zastojnicy­ běchu hinašeho měnjenja a 38lětneho wobskoržichu.

Wino němskeje jednoty su studenća ze wšěch winowych kónčin kraja zhotowili. Při tym su wina wšitkich 13 plahowanskich kónčin k jednomu změšeli. Je to­ prěni projekt tajkeho razu w Němskej. Předstajić chcedźa wino 3. oktobra w Frankfurće nad Mohanom.

Rozmołwa prezidentow „wužitna“ – diferency přiwšěm wostanu

New York (dpa/SN/K). Generalna zhromadźizna UNO to zmóžnja: Po dwěmaj lětomaj mjelčenja zetkaštaj so prěni raz zaso prezident USA Barack Obama a ruski prezident Wladimir Putin. Jeju rozmołwa traješe 90 mjeńšin, poł hodźiny dlěje, hač bě předwidźane. Putin pohódnoći ju po tym jako „wotewrjenu, jara konstruktiwnu a wužitnu“. Dale wón zwurazni: „Smój wjele zhromadnosćow nadešłoj, je pak tež hišće wjele diferencow.“ Putin poskorži, zo su poćahi z USA tuchwilu chłódne, zo pak njeje to wina Ruskeje. „Smy stajnje zwólniwi, na našim poměrje dźěłać a jón dospołnje wobnowić“, wón wuzběhny.

Załožba ma změnu přewodźeć

Rań (SN/ch). Po woli Zelenych w Sakskej a Braniborskej měła nowa załožba strukturnu změnu we Łužicy po kóncu bru­nicy přewodźeć. Tole stej předsydstwje strony wčera w Ranju (Großräschen) wobzamknyłoj. Łužica je energijowy region a ma to tež wostać, rěka w stejišću. Koncept Zelenych předwidźi, zo měli Sakska a Braniborska, Zwjazk, hórnistwowy saněrar LMBV, regionalne předewzaća kaž tež priwatnicy pjenjezy nowej załožbje­ přewostajić.

Objekt GST ma so předać

Wojerecy (SN/ch). Objekt bywšeje NDRskeje organizacije GST při zwjazkowej dróze B 97 blisko Wojerec ma so předać. Třělerske towarstwo, kotrež płoninu hižo dwaceći lět wotnaja, chce ju nětko kupić. 42 000 kwadratnych metrow wulka ležownosć ma 9 000 eurow płaćić. Bywši towaršnostny dom a bywše hłowne twarjenje dóstanje towarstwo za symbolisku płaćiznu dźesać eurow. Přičina je aktualnje płaćiwy płoninowy wužiwanski plan, předwidźacy tam jenož wosebitu płoninu „wólny čas“. Ležownosć je rukowaćelstwo městu Wojerecam lěta 1996 přepisało. Měšćanska rada chcyše dźensa wo předani rozsudźić.

Berlin (dpa/SN/K). Zwjazkowe knježerstwo je dźensa wobšěrny paket zakonjow nastupajo krizu ćěkancow dla wobzamknyło. Tak zwoprawdźa so dojednanja wjerška Zwjazka z krajemi wo naprawach napřećo ćěkancam a azylowej politice. Tak dóstanu kraje přichodnje za kóždeho požadarja wo azyl měsačnu pawšalu 670 eurow. Dale buchu Albanska, Kosowo a Montenegro jako wěste pochadne kraje zastopnjowane. To zmóžnja, njewitanych migrantow wottam zaso wróćo pósłać. Kabinet wuradźowaše tohorunja wo dodatnym budgeće, kotryž předwidźi za zastaranje ćěkancow přidatne šěsć miliardow eurow. Zwjazkowy sejm ma zakonje ručež móžno schwalić, zo móhli wone hižo wot 1. nowembra płaćić.

Kundus (dpa/SN). Dźeń po zdobyću sewjeroafghaniskeje prowincneje stolicy Kundus přez radikalnoislamskich talibanow je afghaniske knježerstwo ofensiwu zahajiło, zo by město wróćo zdobyło. Prěnje jednotki su hłowne sydło policije kaž tež jastwo w Kundusu wobsadźili. Z njeho běchu talibanojo wčera 600 jatych wuswobodźili. Na ofensiwje přećiwo zběžkarjam wobdźělichu so tež wojerske lětadła USA. Talibanojo běchu Kundus wčera wobsadźili, po tym zo běchu město runočasnje ze wšelakich směrow nadběhowali. Wo móžnych woporach dotal ničo­ znate njeje. Kundus je prěnja prowincna stolicy Afghanistana w rukach talibanow. Zwjazkowa wobora měješe tam hač do lěta 2013 pólne lěhwo.

Wolfsburg (dpa/SN). Awtotwarc Volks­wagen ma hladajo na skandal manipulowaneho wotpłuna dla dołhi a ćežki puć před sobu. Wo tym je nowy šef koncerna VW Matthias Müller přeswědčeny. Nětko dźe wo sprawne a konsekwentne předźěłanje, zo móhła so zhubjena dowěra ludźi poněčim zaso wróćo zdobyć, rjekny Müller wčera wječor wodźacym zastupnikam koncerna we Wolfsburgu.

Madrid (dpa/SN). Španiski ministerski prezident Mariano Rajoy je po njedźelnych wólbach w Katalonskej zwólniwy, z přichodnym knježerstwom regiona rěčeć.­ Jenota kraja pak njesteji při tym k dispoziciji, rjekny konserwatiwny knježerstwowy šef w Madridźe. Přiwisnicy wotpačenja Katalonskeje běchu njedźelu jeno 47,7 procentow hłosow dó­stali, maja pak wjetšinu w parlamenće.

Athen (dpa/SN). Grjekska wot 1. oktobra na šěsć dowolowych kupach kraja tam dotal płaćiwy zniženy nadhódnotowy dawk wotstroni. Potom płaći tež tam nadhódnotowy­ dawk 23 procentow, kaž grjekske medije rozprawjeja. Zwyšić dawk bě jedne ze žadanjow mjezynarodnych pjenjezydawarjow w zwisku z dal­šimi kreditami. Potrjechene su mjez druhim­ kupy Mykonos, Rhodos a Naxos.