Wałbrzych (dpa/SN). W Pólskej so wojacy tele dny na to hotuja, při pytanju za tak mjenowanym „złotym ćahom“ z časa Druheje swětoweje wójny pomhać. Pioněrske jednotki přepytuja kónčinu, w kotrejž běchu wólnočasni slědźerjo za ćahom pytali, schowanym pječa w podzemskim tunlowym systemje. „Chcemy předewšěm wuzamknyć, zo su w zemi strašne maćizny schowane, kaž na přikład miny“, rjekny Tomasz Smolarz, nawoda delnjošleskeho regionalneho zarjadnistwa, wčera nowinarjam. Dźěła po- dłu železniskeje čary mjez Wrócławjom a Wałbrzychom traja prawdźepodobnje cyły tydźeń. Hdy ma so konkretne pytanje za ćahom započeć, hišće njewědźa.
W awgusće běštaj mužej, Polak a Němc, zdźěliłoj, zo staj němski pancerowany ćah w tunlu namakałoj. Dopokazać tole dotal njemóžeštaj. Wot njeju předpołoženy radarowy wobraz, kotryž ma ćah pokazać, njeje po měnjenju fachowcow jasny dosć. Najebać to je w kónčinje hotowa hysterija wudyriła, dokelž tukaja na to, zo je w ćahu 300 tonow złota.
Drježdźany (kl/SN). Budyska Domowinska župa „Jan Arnošt Smoler“ je minjenu sobotu swoju lětušu kubłansku jězbu přewjedła. Dohromady 46 čłonow jednotliwych skupin a towarstwow župy poda so do Drježdźan. Prěnja stacija w sakskej stolicy bě Dwórska cyrkej. Tam zhonichu wobdźělnicy wo stawiznach Božeho domu, wo kralowskim dworje a wo najwjetšim wołtarnym wobrazu Němskeje.
Jan Brězan z Drježdźan, kiž bě Domowinjanow z Łužicy witał, rozprawješe jim wo stawiznach města a wo serbskim žiwjenju w Drježdźanach. Wobdźělnicy zhonichu, zo maja tam ekumenisku skupinu. Štyri króć wob lěto swjeća zhromadnu nutrnosć, dwójce ewangelsku a dwójce katolsku, a to w cyrkwi swjateho Józefa. W Dwórskej cyrkwi je kapała serbskeho biskopa, swjateho Bena, a tam je tež jeho mitra widźeć. Dale zhonichu skupinarjo wo zbóžnym Alojsu Andrickim, kiž je w Drježdźanach jako kapłan spomóžnje skutkował.
DJV zasudźa nadpad
Berlin. Zwjazk žurnalistow Němskeje (DJV) namóc přećiwo žurnalistam na wčerawšej demonstraciji Pegidy w Drježdźanach zasudźa. „To je wohrožaca situacija“, praji rěčnik DJV Hendrik Zörner powěsćerni dpa. Wčera wječor běchu njeznaći přiwisnicy „Patriotiskich Europjanow přećiwo islamizowanju nawječora“ jednomu žurnalistej z pjasću do mjezwoča bili a dalšeho kopali.
Woža kontejnery do Němskeje
Praha. Čěska republika je „wulkomóc“ na polu produkcije kontejnerow, kotrež hodźa so jako bydlenske module zestajeć. Lětnje twarja zawody kraja 25 000 eksemplarow. 90 procentow z nich woža do Němskeje. Tuchwilneje žołmy ćěkancow dla su tajke bydlenske kontejnery jara požadane – je pak wobćežne, jich produkciju dale rozšěrić.
Nowe wjednistwo
Budyšin (apa/SN). Wulke hibanje knježeše wčera popołdnju w sportowej hali Serbskeho šulskeho a zetkawanskeho centruma w Budyšinje. We wobłuku 6. interkulturneho tydźenja přeprosy Budyski wokrjesny sportowy zwjazk na zhromadny integratiwny turněr „VoBaFu“ za ćěkancow a domoródnych. „Chcemy młodostnym ze sportowym turněrom trochu wotměny we wšědnym dnju poskićić“, rozłoži 23lětna koordinatorka za sportowu młodźinu Gabriela Große, „ze zarjadowanjom, kotrež ma wučić fairplay, chcemy docpěć integraciju, tolerancu a zrozumjenje za demokratiju.“ Wobdźělnicy móžachu so jako mustwo w disciplinach wolejbul, basketbul kaž tež kopańca wubědźować. Mjez sportowcami běchu požadarjo azyla z Kamjenca, Wojerec, Radeberga a Budyšina kaž tež skupinka Serbow. Hry běchu napjate, a za čas horcych bojow bě tón abo tamny na fairplay abo prawu techniku pozabył.
Budyšin (SN/mwe). 29 300 sakskich šulerkow a šulerjow je so na lětušim akciskim dnju „genialsocial“ wobdźěliło. Mjez nimi běchu holcy a hólcy z hornjołužiskich šulow, kaž z Wojerowskeho ewangelskeho gymnazija Johanneum kaž tež z Budyskich a Kamjenskich gymnazijow a šulow, lědma pak ze serbskich kubłanišćow. Dźěłali su jedyn dźeń pola pjekarjow, kaž w Róžeńće pola Maika Šołty, w zawodach, w agrarnych drustwach, institucijach runje taž kaž pola ludźi doma abo w pěstowarnjach.
Tak móžachu šulerjo z 268 sakskich kubłanišćow na 11. akciskim dnju „genialsocial – twoje dźěło přećiwo chudobje“ 590 000 eurow nazběrać. Pjenjezy nětko na štyri wuzwolene projekty rozdźěla. W Nepalskej chorowni Amppipal chcedźa nowe chorobne awto kupić, w keniaskim regionje Kakamega trjebaja nuznje 1 500 porjadnych hlinjanych kachli. W filipinskej prowincy Leyte čakaja njesćerpnje na lěpše zastaranje z wodu a hygienu w sto šulach, a nic naposledk słuža pjenjezy z akciskeho dnja „genialsocial“ nałožowanju tradicionalneje mediciny na nomadiskim sewjeru Tibeta.
Choćebuz (AW/SN). 32 twórbow łužiskich komponistow a dalše – klasiskeje kaž filmoweje hudźby – zaklinča we wobłuku 42. Choćebuskeje hudźbneje nazymy. Wona zahaji so štwórtk, 1. oktobra, w delnjołužiskej stolicy.
Federalistiska unija europskich narodnych mjeńšin přihotuje personalne změny na čole organizacije, wšako wólbna doba wuběži, a na klětušim kongresu we Wrócławju budu wólby.
Flensburg/Budyšin (SN/at). Klětuši kongres Federalistiskeje unije europskich narodnych mjeńšin (FUEN) budźe w pólskim Wrócławju. Delnjošleska metropola je zhromadnje z baskiskim městom San Sebastiánom europska kulturna stolica 2016. Najebać bohaty kulturny poskitk na kromje kongresa maja wobdźělnicy wo přichodnej zestawje dźěłowych gremijow rozsudźić.
„Wólbna perioda so klětu zakónči. Na delegatnej konferency wotměja so potom turnusowe nowowólby prezidenta a wiceprezidentow. W tymle zwisku je sej prezidij FUEN na swojim njedawnym posedźenju w Flensburgu wuwědomił, zo rjad staršich ludźi za funkciju znowa k dispoziciji njeje“, rjekny tuchwilny wiceprezident FUEN a jednaćel Domowiny Bjarnat Cyž našemu wječornikej.
Drježdźany (SN). Składnostnje akciskeho dnja kubłanja Drježdźanskeje rjemjeslniskeje komory minjenu sobotu wuznamjenichu třiceći zawodow komorneho wobwoda, kotrež so hižo wjele lět wuspěšnje zaměrnemu a na wysokim niwowje stejacemu powołanskemu wukubłanju wěnuja. Předsyda rjemjeslniskeje komory dr. Jörg Dittrich chwaleše dobre dźěło wuzwolenych zawodow: „W boju wo dobry dorost hraje kwalita wukubłanja centralnu rólu. Tohodla wuznamjenjamy zawody, kotrež pokazuja, kak porjadne wukubłanje běži, a kotrež kmane technologije do wukubłanja zapřijimaja.“
Mjez wuznamjenjenymi zawodami su tři Budyske. Nimo předewzaća energie bautzen eG, kotryž wukubłuje elektronikarjow, stej to MAN Truck & Bus Deutschland GmbH a Bau Cooperation GmbH za wukubłanje mechanikarjow respektiwnje murjerjow. Tež Biskopičanski optikar Michael Plüschke bu za dobre a wuspěšne wukubłanje optikarjow počesćeny, runje tak Lubijska blidarska mišterka Ines Briesowsky-Graf, kotraž dobry blidarski dorost wukubłuje.