Z wudaća: štwórtk, 19 nowembera 2015

ST Budestecy-Korzym/Šěrachow

– ST 1922 Radwor 3:1 (1:0)

Zestawa hosći: Wróbl – Sćapan, Buša, Henka, Winar, Šram, Zähr, Nuk, Bauer (84. Omram), Mark (90. Wünderlich), Schulze (73. Šěrak)

Wuměnjenja duela runjewon dobre njeběchu. W přědehrě so tak jara dešćowaše, zo trawnik hižo zeleny njeběše. Radworski trenar Pětr Bejmak bě swojich škitarjow wosebje před nadběhowarjomaj přećiwnika warnował. Henka kaž Sćapan měještaj swoju lubu nuzu z nimaj. Prěni dobry domjacy nadběh přez Schaafa a Jenera wjedźeše k 1:0 (10.). Sćapan so na křidle přećiwo Jenerej wobsuny, w pjećmetrowym rumje wothra tón bul k Schaafej, kiž jón jenož hišće přez liniju stłóči. Hosćo so do hry wojowachu a startowachu přeco zaso dobre a spěšne nadběhi. Jedyn tajki zhłójčkowa Winar na łatu. Tež třělwa Marka wrota jenož snadnje misny. Krótko do přestawki dóstachu hosćo hišće jědnatku. Schulze bul tak słabje třěli, zo wrotar lochce wotwobara. W přestawce Radworski trenar swojich chowancow pochwali, dokelž so hrajersce derje pokazowachu. Před wrotami pak žadaše sej wjac koncentracije.

Dóstanu wjac spěchowanja

Berlin/Flensburg. Federalistisku uniju europskich narodnych mjeńšin (FUEN) spěchuje Zwjazk wot klětušeho z poł milionom eurow. Zyšenje wo 400 000 eurow je etatowy wuběrk zwjazkoweho sejma wobzamknył, zdźěli FUEN. Prezident FUEN Hans-Heinrich Hansen ma to za wysoke hódnoćenje mjeńšin a za wuslědk prócowanjow mnohich podpěraćelow.

Rozsud přestorčili

Radwor. Na posedźenju zawčerawšim su Radworscy gmejnscy radźićeljo rozsud wo zjednoćenju stawnistwow na teritoriju gmejny do jednotneho w Malešecach přestorčili. Wobzamknychu ponowjenje dróhi při Lodowej pincy w Lutobču. Dale počesćichu štyrjoch kameradow wohnjoweje wobory z rjadom pomocnikow při wulkej wodźe 2013.

Informuja tež wo Serbach

Serbscy studenća změja zajutřišim zaso swój wulki dźeń, hdyž wotměje so w Budyskej měšćanskej hali „Króna“ 141. schadźowanka. Cordula Ratajczakowa je so pola režisera Jakuba Wowčerja wo stawje přihotow wobhoniła.

Schadźowanka 2015 budźe zhromadnje z Maksimilanom Kralom – runja Wam Radworčanom – Waš debit jako režiser. Mataj wšitko pod kontrolu?

J. Wowčer: Nadźijam so, smój so dosć napinałoj, při čimž nazhonichmoj wjele pomocy. Hač so wšitko tak poradźi, kaž sej to myslimoj, budźemy sobotu widźeć.

W digitalnej socialnej syći rěči so, zo staj přinošk šulerjow Budyskeho Serbskeho gymnazija wotpokazałoj, kotryž so z azylowej tematiku zaběra. Jeli to trjechi, čehodla?

Wokrjesni społnomócnjeni za naležnosće Serbow w Lubinje wuradźowali

Lubin (SN/at). Tematice rozšěrjenje serbskeho sydlenskeho ruma kaž tež zarjadniska a strukturna a reforma w Braniborskeje stej wuradźowanje społnomócnjenych za serbske naležnosće delnjołužiskich wokrjesow Sprjewja-Nysa, Hornje Błóta-Łužica, Dubja-Błóta kaž tež města Choćebuza wčera w Lubinje postajałoj.

Budyšin (SN/JaW). Zwjazkowe předsydstwo Domowiny chce na swojim jutřišim wuradźowanju w Budyšinje mjez druhim chětro aktualnu azylowu temu načeć. Dokładnje chcedźa stejišćo třěšneho zwjazka k tomu wothłosować a schwalić.

W naćisku wobzamknjenja wupraja so Zwjazk Łužiskich Serbow cyle jasnje za pomoc ćěkancam. „Jako Serbja smy hordźi na swoju tradicionalnu hospodliwosć a rólu jako kulturny a rěčny móst mjez ludami. Tohodla je za ćěkancow tež městno na serbskich a dwurěčnych wsach“, rěka w naćisku stejišća. Zdobom wupraja so třěšny zwjazk za decentralne zaměstnjenje požadarjow azyla a přeje sej wot wšitkich wobydlerjow kaž tež komunalnych politikarjow wotewrjenosć a zo bychu nachwilnych abo nowych sobuwobydlerjow bjez předsudkow witali. Wot krajneje a zwjazkoweje politiki pak wočakuje Domowina jasne praktiske signale za hodźace so koncepty integracije mjez druhim we wobłukomaj rěč a dźěłowe wiki.

Budyšin (SN/MiR). Młody muž ze strachoćiwymaj wočomoj, z nachribjetnikom na chribjeće stupi do šulskeje rjadownje. „Wzmiće swoje stólcy, zestajejće je před taflu, wzmiće wšitko sobu, maće minutu chwile.“ Šulerjo 9. lětnika Budyskeje Serbskeje wyšeje šule to činja. Někotři hladaja spłóšiwje, druzy zaso smějo so, ale strachoćiwje, a dalši reaguja z tym, zo napominanje spěšnje sćěhuja.

Drježdźany (SN/JaW). Hajko Kozel je zaso čłon Sakskeho krajneho sejma. Z tym ma Lěwica po lěće přestawki znowa serbskeho zapósłanca, zdźěli frakcija Lěwicy medijam. Kozel je dźensa při zawjazanju pre- zidentej sejma dr. Matthiasej Rößlerej tež serbsce wotmołwił, wón SN wobkrući.

„Samozrozumliwje budu so, kaž hižo w zašłosći, tež přichodnje za zajimy serbskeho ludu zasadźeć. Při tym chcył so předewšěm ćežam přewzaća kóštow za šulerkski transport dźěćom ze serbskich swójbow wěnować, kotrychž starši su so ze zajima za maćernorěčnu wučbu hinak rozsudźili, hač wot krajneho rady předwidźane“, rjekny Kozel w zdźělence. Zdobom chce wón docpěć, zo so financowanje Załožby za serbski lud dynamizuje.

Hajko Kozel bě so za nawrót do sejma rozsudźił, po tym zo běchu zapósłanču Annekatrin Klepsch za kulturnu měšćanostku Drježdźan wuzwolili, na čož wona swój mandat złoži. Špatneho městna na krajnej lisćinje Lěwicy dla njedocpě Kozel při lońšich wólbach skok do Sakskeho krajneho sejma.

W Indiskej nima 774 milionow ludźi přeco hišće porjadny nuznik. Bychu-li so tući w rynku nastupili, by tutón hač na měsačk sahał. To wozjewi swětowa pomocna organizacija Water Aid k dźensnišemu swětowemu dnjej nuznikow. Pobrachowacych nuznikow dla přenjesu so w Indiskej mnohe chorosće. Po zdźělenju organizacije Water Aid wumrje lětnje 140 000 dźěći na sćěhi chorosćow, wuchadźacych z njedosahacych hygieniskich poměrow.

Lochko mějachu so policisća w Hildesheimje při pytanju za paduchom. 31lětny zawostaji njewotpohladnje mjeno a adresu na městnje njeskutka. Po tym zo bě 81lětnu starušku nadpadnył, twochny z kolesom. Při tym zrazy pak do latarnje. Jako padny, wusuny so jemu na njeho adresowany list. Tuž ćěkaše pěši dale. Policija jeho potom doma zaja.

Němska a Europa chutnje wohroženej

Paris/Berlin (dpa/SN/K). Francoska je dźiwajo na to, zo steji widźomnje wosebje we wizěrje radikalno-islamistiskich teroristow, wěstotne zakonje přiwótřiła. Narodna zhromadźizna podlěši wuwzaćny staw wo tři měsacy. W tym času móža so rozpušćić zeskupjenja, zastopnjowane jako wosebje strašne za zjawny porjad. Wčerawše zasahnjenje specialnych mocow přećiwo pasmu wobrónjenych podhladnych w bydlenju Pariskeho předměsta Saint-Denis je prawdźepodobnje dalši atentat znjemóžniło. Wosom wosobow bu zajatych, dwě stej mortwej. Jedna ze žonow so sama mori, jednoho muža zatřělichu, rozprawja dpa. Po njesłyšanym Pariskim atentaće ze 129 smjertnymi woporami je policija po cyłej Francoskej 414 bydlenjow přepytowała, 60 ludźi zajała a 118 wosobow pod domjacy arest stajiła. W Syriskej Francoska teroristisku milicu Islamski stat (IS) tohorunja raznje nadběhuje. Fancoske lětadła su hromadźe z mašinami dalšich krajow nalěty na zepěranišćo IS Al-Rakka přewjedli. W zašłych třoch dnjach bu znajmjeńša 33 ekstemistow morjenych.