Z wudaća: wutora, 09 februara 2016

Tež na Kulowskej wyšej šuli „Korla Awgust Kocor“ knježachu posledni dźeń prěnjeho šulskeho połlěta nory. Napjatosć bě takrjec dwójna. Šulerjo čakachu najprjedy na połlětne wuswědčenja a po tym započa so póstniska zabawa. W swojich kostimach podachu so do póstnisce wupyšeneje sportownje. Pod mócnym přikleskom zaćahny šulerska póstniska garda w nowych kostimach ze swojim princowskim porom do hale. Princ Florian-Dubrjenkski w swojej narěči 290 norow wyšeje šule a 45 norow 4. lětnika Krabatoweje zakładneje šule postrowi. Z derje přihotowanym programom šulske nory na to oficialny Kulowski princowski por ze wšitkimi kapičkowymi bratrami, pažemi a maršalom tejele sezony witachu. Jim a wšitkim dalšim noram předstaji šulska rejwanska skupina nowonastudowanu reju. Po tym knježeše prawa póstniska zabawa, doniž so šulerjo do zasłuženych prózdnin njepo­dachu. Achim Nowak

Wuskutki hejsowanja

Kulow. Zo so póstniske hejsowanje z wodźenjom awta njeznjese, dyrbješe njedźelu rano šoferka VWja w Kulowje spó­znać. Wona bě na žonjacych póstnicach po wšěm zdaću alkoholej derje přirě­čowała, štož pak ju njewotdźerža, so w 3 hodź. do awta sydnyć. Jako ju policisća kontrolowachu, zwěsćichu pola 24lětneje 1,22 promilow alkohola w kreji. Jězbnu dowolnosć młodeje žony sej zastojnicy tuž hnydom wobchowachu.

Najrjeńše słónčne wjedro wčera připołdnju znowa tysacy ludźi do Kulowa zwabi, zo bychu sej w mjeztym hižo 310. sezonje róžowopóndźelny ćah wobhladali.

Kulow (aha/SN). Něhdźe 30 swjedźenskich wozow a dalše žónske skupiny su wčera w Kulowje tež serbsce připowědźili. Wo to postarał je so Tomaš Lipič, kotryž mjeztym wosom lět radźe jědnaćoch přisłuša. Dobra nalada knježeše po cyłym městačku, a mnozy Kulowsku póst­nisku­ hymnu sobu spěwachu, štož su tež njeličomni móhli w zdalenišich kónčinach sobu dožiwić. Wšako je telewizijny sćelak MDR wčera po wosom lětach znowa z Kulowa live wusyłał. Dźesać lět mjeztym tomu je, zo na čole klawnojo ze swojimi křudami praskajo so wo prózdny puć staraja. Hnydom pjeć princowskich porow so w ćahu prezentowaše.

Načolnik a druhi tabulki jako hosćej w Pančicach – to běše wužadanje za Marijine hwědźički. Jako předposlednje chcychu so tak droho kaž móžno předać. Trenar Ralf Wachsmann zastupuje měnjenje, zo móže we wobwodnej lize kóždy kóždeho porazyć. Na kóncu rozsudźi přeco kondicija hrajerkow.

Marijina hwězda – OSC Lubij 0:3 (21:25, 19:25, 15:25)

Hižo w Lubiju běchu prěnje rozestajenje z 0:3 přěhrali. Tež tónraz dźěše wěc „do cholowow“. Na spočatku kóždeje sadźby hišće sobu dźeržachu. Tola OSC ćišć zesylni. To bě za Marijine hwězdźički zahubne.

Marijina hwězda – VV Schönbach 2:3 (25:21, 17:25, 27:25, 11:25, 9:15)

Aktualny načolnik ze Schönbacha je skerje po słodźe Marijinych hwězdźičkow. W prěnjej hrě nazymu běchu přećiwnika z 3:1 přewinyli. Tehdy pobrachowaše hłowna nadběhowarka Schönbacha. Do Pančic přijědźechu z kompletnym mustwom. Tola tež to njepomhaše. Domjacy hrajachu kaž lědma hdy do toho. Dobyće bě zasłužene.

SC Großschweidnitz-Lubij II

– ST Marijina hwězda 3:4 (1:0)

Zestawa hosći: Schmidt (75. Matik) – Wróbl, Czapik, Łušćanski, Lipič – Hawš, Škoda (59. Sbjeznie), Pakoßnick, Langer (62. Bejmak) – Peschmann (75. Hübner), Jurš

K poslednjej přihotowanskej hrě za druhu połseriju sezony 2015/16 po­dachu so klóšterscy koparjo do Lubija. Tam nastupichu přećiwo rezerwje SC Großschweidnitz-Lubij. Wona hraje tež we wokrjesnej lize. Hosćićel zahaji hru z wysokim tempom a wrotar Oliver Schmidt dyrbješe swoje kmanosće hižo sčasom pokazać. Po spěšnje wuwjedźenym wólnym kopje nasta 1:0 (14.). Přeco zaso nadběhowaše domjacy Do Carmo Martinson wrota Schmidta, kiž pak wosta při tři stoprocentnych šansach dobyćer. W prěnim połčasu mějachu Pančičanscy koparjo jenož mało šansy, to pak so w druhim změni.

Wurunanje 1:1 (55.) přez Dawida Jurša bě Richard Hawš přihotował. Nawjedowanje 1:2 (63.) poradźi so zaso Juršej z hłowu a 1:3 (70.) docpě wospjet wón po wuběrnej přihrawce Jakuba Pakoßnicka. krótko do kónca poradźi so hosćom po konteru 2:3 (86.). K 2:4 (89.) trjechi Jakub Pakoßnick a w 92. min. 3:4 zaso hosćićelej, po tym zo běchu hosćo w škiće njekoncentrowani. Tobias Nowak

Budissa Budyšin

– Hornja Łužica Neugersdorf 1:1 (0:1)

Zestawa domjacych: Jakubov – Kolan, Klippel (10. Pfanne), Patka, Čermák, Hoßmang, Reher, Heineccius (73. Rosendo), Kral, Hansch, Walther

Zestawa hosći: Flückinger – Petrick, Wolf, Dittrich (82. Sobe), Krawčik (66. Nemec), Temel, Banaskiewicz, Merkel, De Freitas Costa, da Silva (73. Huth), Kusić

Z wulkej napjatosću wočakowany hornjołužiski koparski derby w regionalnej lize sewjerowuchod wuhraštej cyłkaj z Budyšina a Neugersdorfa pjatk wječor w Budyšinje pod swětłomjetakami na Młynkec łuce. Byrnjež wjedro chětro špatne było, namaka 1 100 přihladowarjow puć do stadiona. Woni widźachu 90 mjeńšin napjatu kopańcu.

Hosćo mějachu w prěnim połčasu snadne lěpšiny. Po 10 mjeńšinach pak dyrbješe Christoph Klippel, stratega w škiće Budissy, hrajnišćo zranjenja dla wopušćić. Na to nastachu pola trenarja Tomaša Henčla přidatne starosće. Potom sta so hosćićelej w srjedźnym polu tež hišće fatalny zmylk, kotryž wjedźeše k 0:1 (45.). Flanku Filipa Kusića zhłójčkowa Maxim Banaskiewicz do wrotow Budissy. To bě wězo chětro njezbožowne, krótko do połčasa.

Vatikan (B/SN). Bamž Franciskus poda so 31. oktobra do Šwedskeje. Tam chce wón z nawodami Lutheroweho swětoweho zwjazka w Lundźe nawjedować ekumeniske wopominanske zarjadowanje k 500. róčnicy reformacije.

Myće nohow tež za žónske

Vatikan (B/SN). Bamž Franciskus změni za swětowu cyrkej oficialnje ritual myća nohow zeleny štwórtk. W přichodźe smědźa so tež žónskim a nic jenož mužam noze na Božej mši myć. Franciskus sam je hižo žónskim noze mył, bamžojo před nim běchu k tomu po tradiciji dwanaće měšnikow wuzwolili.

Putin přeprošuje Židow

Moskwa (B/SN). Ruski prezident Wladimir Putin je Židam w Europje poskićił, do Ruskeje wupućować. Nawodnistwo Europskeho židowskeho kongresa bě na rozmołwje w Krjemlu rozprawjało, zo je strach mjez europskimi Židami wulki před teroristami a radikalnymi prawicarskimi mocami. Ze Sowjetskeho zwjazka su Židźa emigrowali, nětko móžeja so woni zaso do Ruskeje nawróćić, dokelž je Putin fazu antisemitizma zakónčił.

Křesćenjo přimaja so bróni