Z wudaća: póndźela, 25 julija 2016

Wo pišćeletwarcu Johannu Lanzy z Kamjenca referowaše wčera wječor nawodnica Kamjenskich měšćanskich zběrkow dr. Sylke Kaufmann w sakralnym muzeju w něhdyšej Serbskej cyrkwi swj. Hany. Z přednoškom spřistupni wona mnohim zajimcam zbliska a zda­loka wosebitu wustajeńcu, kotraž traje tam hač do 25. septembra.

Wjazońca (JaW/SN). Specialisća krajneho kriminalneho zarjada přepytuja chemikalije, kotrež běchu zastojnicy wčera w by­dlenju 51lětneho muža we Wjazońcy namakali. Kaž rěčnik policajskeje direkcije w Zhorjelcu Tobias Sprunk na naprašowanje zdźěli, „z nich žadyn strach njewuchadźa. To je spěšnotest na městnje wunjesł. Wo čo so dokładnje jedna, pak hišće njewěmy.“

Wčera wječor je 51lětny z dotal nje­znatych přičin po wšěm zdaću z woknom na štwórtym poschodźe skočił. Žiwjenjastrašnje zranjeneho dowjezechu z helikopterom do chorownje. Policija njemóžeše tuž hišće žane nadrobnosće k přičinam njezboža rjec. Jasne dotal je, zo bě muž sam. Při přepytanju bydlenja namakachu chemikalije a njeznate srědki w blešach kaž tež noticy, kotrež móhli na twar bombow pokazować. „Hač tomu tak je, dyrbimy hišće zwěsćić“, rjekny Sprunk. Namakanki zawinichu wulkozasadźenje wohnjoweje wobory. Nimale sto kameradow bě zasadźenych. Dalšich wobydlerjow dyrbjachu nachwilnje přeměstnić. Woni móžachu so hakle dźensa do swojich bydlenjow wróćić.

Montreal (dpa/SN). Swětowa antidopingowa agentura WADA reaguje přesłapjena na rozsud Mjezynarodneho olympiskeho komiteja (IOC), najebać dopingowe skandale ruskemu mustwu wobdźělenje na olympiskich hrach w Rio de Janeiru dowolić. Kaž prezident WADA Craig Reedie informowaše, je najnowša rozprawa wotkryła, zo je doping w ruskej systematiskeho raza a wot statnych or­ganow podpěrany. IOC bě wčera pod nawodom němskeho prezidenta Thomasa Bacha rozsudźiła, Rusku z hrow njewuzamknyć. Mustwo smě so pod krutymi kontrolemi wobdźělić.

Wójsko w kraju zasadźić?

Berlin (dpa/SN). Po najnowšich namócnosćach minjenych dnjow w Němskej je debata wo tym wudyriła, hač měła so Zwjazkowa wobora w boju přećiwo terorizmej tež w Němskej zasadźić. Nutřkowny fachowc CSU Stephan Mayer je tónle namjet dźensa w sćelaku ARD podpěrał. Politikar SPD Johannes Kahrs to porno tomu wotpokaza. Wójsko njeje za tajke nadawki ani wukubłane ani wuhotowane, rjekny Kahrs w rozhłosu.

Wobdźělnicy CSD nadpadnjeni

Istanbul (dpa/K/SN). Po kopicy swojowólnych naprawow po wozjewjenju wu- wzaćneho stawa je so prezident Recep Tayyip Erdoğan dźensa w přitomnosći premiera Binalija Yıldırıma z nawodu opozicije Kemalom Kılıçdarogluwom zetkał. Hłowa stata podźakowa so za rozsudnu poziciju opozicije přećiwo pučistam. Nimo toho je Erdoğan z wobdźělnikami zetkanja podawki zašłych dnjow pohódnoćił. Přeprošenaj njejstaj byłoj předsydaj prokurdiskeje HDP. Wonaj běštaj pospyt puča tohorunja zasudźiłoj, Erdoğanej pak wumjetowałoj, zo znjewužiwa wón podawk za to, wurisać politiskich přećiwnikow a wobmjezować demokratiske swobody.

Philadelphia (dpa/SN). Bjezposrědnje do zahajenja zjězda demokratiskeje strony USA je Debbie Wassermann Schultz swój wotstup jako předsydka připowědźiła. Hłowna přičina su wjacore wozjewjene mejlki, kotrež na to pokazuja, zo bě předsydstwo strony w předwólbach wo prezidentskeho kandidata wot wšeho spočatka poboku Hillary Clinton stało. Jej skónčnje podležany riwala Bernie Sanders bě so wospjet hóršił, zo nima podpěru předsydstwa strony a zo je nutřkostronska procedura na dobro Clinton manipulowana. Róla stronskeho předsydy w USA runa so zastojnstwu generalneho sekretara w Němskej. Wólby prezidenta budu 8. nowembra.

Tři krawne njeskutki so w Bayerskej w krótkim času stali

Mnichow (dpa/K/SN). Bayerska je rozbudźena – tři krawne njeskutki za sobu: Po nadpadźe ćěkanca ze sekeru dźens tydźenja na ludźi w regionalnym ćahu pola Würzburga a po žałostnym amoku pjatk wječor z dźesać mortwymi dóńdźe wčera wokoło 22 hodź. w Ansbachu k bombowemu atentatej, kotryž je sej dwanaće zranjenych žadał. Pozdatny skućićel je 27lětny Syričan. Wón měješe wotpohlad, dóstać so na hudźbny festiwal, na kotrymž bě na wšěch 2 500 wopytowarjow, štož pak so jemu bjez zastupjenki njeporadźi. Tohodla je bombu prjedy zapnył a při tym sam zahinył. Motiw jeho njeskutka njeje dotal znaty. Bayerski nutřkowny minister Joachim Herrmann (CSU) njewuzamkny wšak islamistiski pozadk. Na nowinarskej konferency w Ansbachu wón nimo toho zdźěli, zo jedna so pola skućićela wo muža, kiž bě před lětomaj do Němskeje přišoł. Azyl wón njedósta, smědźeše pak přiwšěm wostać. Policajski prezident Nürnberga Roman Feringer k tomu doda, zo je Syričan drogowych a wudrěwanskich deliktow dla policiji znaty był. Za namócneho pak jeho njemějachu.

Z awtom maćerje je sej wčera 13lětny w durinskim Unterwellenbornje wulećał, ale bórze do štoma prasnył. Jězba skónči so njejapcy w lěwej křiwicy, jako so młody šofer tež hišće z mobilnym telefonom zaběraše. Nimo toho steješe pachoł pod wliwom alkohola. Při zražce so wón na zbožo jenož lochko zrani. Mać jeho na městnje njezboža wotewza a staraše so wo to, zo awto wotwleku.

Wša próca bě na kóncu tola podarmotna: Třo mužojo su w bayerskim Weidenje něhdźe tysac prózdnych blešow z wulkowobchoda pokradnyli a we wjacorych wulkich měchach wottransportowali. Ze swojimi hoberskimi wačokami wšak trójka wobsadce policajskeho awta napadny. Po krótkim přesćěhanju zastojnicy pakostnikow dosahnychu. Prózdne bleše běchu 232 eurow hódne. Policija přepytuje nětko padustwa dla.

Berlin (dpa/SN). Knježerstwo zwjazkoweje kanclerki Angele Merkel (CDU) je so indirektnje wot wuprajenjow kandidata republikanow za zastojnstwo prezidenta USA Donalda Trumpa nastupajo solidaritu w NATO distancowało. Rěčnik knježerstwa Steffen Seibert rjekny w Berlinje: „Zwjazkowe knježerstwo wuznawa so zasadnje k artiklej 5 zrěčenja NATO. To je centralne přilubjenje solidarity w aliancy, kotrež nas zwjazuje a nawodźa. Kolektiwne zakitowanje wostanje hłowny nadawk NATO.“ Seibert na to pokaza, zo su tele přilubjenje na wjeršku NATO we Waršawje před tydźenjomaj hišće raz potwjerdźili. Trump bě w rozmołwje z New York Times rjekł, zo chcył jako prezident USA w padźe ruskeho nadpada na baltiske staty najprjedy pruwować, hač su tele staty swoje winowatosće napřećo USA spjelnili. Hakle potom chcył rozsudźić, hač USA nadpadnjenym krajam pomhaja.

Podawki w Mnichowje minjeny pjatk su zaso raz dopokazali, zo su moderne komunikaciske srědki, kotrež dźensa wšitcy wužiwamy, wulki dar a zdobom kwakla. Kaž z wětřikom rozšěrjachu so informacije, kotrež běchu zdźěla wěrne a zdźěla nic. Štož bě spočatnje skupina třoch z wulkimi třělbami wobrónjenych teroristow, bě na kóncu jenički skućićel z pistolu. Informacije wo třěleńcy wosrjedź města wopokazachu so runje tak jako wopačne kaž wo braću zastajencow. Na kóncu potepi so Mnichow w chaosu, wobchadne srědki hižo njejězdźachu a nichtó njewědźeše, što so poprawom stawa. To dyrbješe dźensa samo nutřkowny minister Thomas de Maizière (CDU) ludźi namołwić, žane wopačnosće njerozšěrjeć, zo njebychu dźěło policije njetrjebawši haćili. Mam jara mało nadźije, zo ludźo na njeho słuchaja. Přejara dźě wšitcy wot tuteje techniki mjeztym wotwisujemy. Marko Wjeńka

Znaty basketballist Dirk Nowitzki (2. wotlěwa) je dźensa předewzaće Bauerfeind w durinskim Zeulenroda-Triebesu wopytał. Předewzaće, kotrež zhotowja medicinske pomocne srědki, je nowy sponsor Nowitzkeho. Wopyt sławneho sportowca bě sobudźěłaćerjam firmy wulke dožiwjenje. Na spočatku dyrbješe wón husty spalěr přiwisnikow přeńć. Foto: dpa/Michael Reichel