Z wudaća: póndźela, 25 julija 2016

Křesćan Krawc z Hrubjelčic wotmołwja Witej Meškankej z Berlina na jeho Zapósłane w SN z 20. julija, poćahujo so na politiku NATO we wuchodoeuropskich krajach:

Što wšo přećiwo njekrasnikej Putinej rěči a scyła přećiwo za wojerskimi rozestajenjemi hłódnej Ruskej, mi nětk hakle tak prawje swita, hdyž čitam w rubrice Zapósłane komentar z Berlina. Wottam ma komentator wězo wyšu runinu hladanja hač ja w zabytej łužiskej wjesce za horami. Tu wšak njejedna so jenož wo komentar, ale je to rjećaz wotkrywanjow za tych kaž mje, kotřiž dyrbja wšitke te fakty mjenowane dóstać, zo bychu skónčnje dopóznali, kajki tón Putin a jeho Ruska woprawdźe staj.

We wobłuku lětnich koncertow w Małowjelkowskej sotrowni bě tam sobotu wječor jazzowy z bubnarjom Günterom „Baby“ Sommerom a saksofonistom Hartmutom Dorschnerom. Dźakowano rjanemu wjedru móžeštaj wonaj na rejwanišću pod hołym njebjom hudźić. K wjeselu publikuma staj wobaj porjadnje improwizowałoj. Foto: Carmen Schumann

Na lětušim, wot časa přewróta kóždolětnje přewjedźenym wjesnym swjedźenju móžachu so organizatorojo jónu nad spodobnym lětnim wjedrom a wosebje přiběracej ličbu wopytowarjow na wšěch třoch dnjach hač do wčerawšeje njedźele wjeselić.

Sulšecy (aha/SN). Wjesny předstejićel Jurij Brösan hódnoćeše, zo su wšitcy čłonojo wjesneho kluba, ale wosebje tež ně- hdźe 50 čłonow wopřijacy młodźinski klub ze swojim hakle lětsa wuzwolenym předsydu Feliksom Šěnom bytostnje k poradźenju swjedźenja přinošowali.

K zazběhej wubědźowaše so pjatk dźesać wohnjowobornych cyłkow w hašenju. Wuměnjenje bě, zo běchu wšitcy wobdźělnicy starši hač 40 lět. Jako najlěpši wopokazachu so Kobličenjo před hosćićelskimi Sulšečanami a wobornikami z Brěžkow.

Hač do wčerawšeje njedźele wotmě so w Budyskim Kamjentnym domje prózdninski lětni camp, kotryž mjenowachu „Düsterwald“. Wobdźělili běchu so na nim dźěći a młodostni w starobje dźesać do 18 lět.

Budyšin (SN/mwe). „To je wšeje česće hódne, zo skići Budyski sociokulturny centrum prózdninarjam tajke wulkotne dožiwjenje. Nimo toho, zo njetrjebaja za zastaranje a přenocowanje ničo płaćić, nazhonjeja woni tule tež přewšo hódny kulturny a kubłanski poskitk“, podšmórnje Malte Rogacki. Drježdźanjan bě jako hudźbny docent jedyn z nawodow sydom dźěłarničkow. Wobdźěliło bě so na zarjadowanju 37 holcow a hólcow přewažnje z Budyskeho wokrjesa. Třo z nich běchu ćěkancy, kotřiž w Budyšinje bydla. Financowany bu projekt ze zwjazkoweho programa „Kultura zesylnja“.

Něhdźe 1 400 wopytowarjam so wjace hač 6 500 swěčkow błyšćiło

Pančicy-Kukow (SN/mwe). Krasny miły wječor je sobotu w klóšterskej zahrodźe w Pančicach-Kukowje něhdźe 1 400 ludźi na zarjadowanju „W swětle 1 000 swěčkow“ dožiwiło. Sobudźěłaćerjo Miłočanskeho Křesćansko-socialneho kubłanskeho skutka (CSB) běchu tam wjace hač 6 500 swěčkow nastajili, tak zo so wšitko jenož tak błyšćeše. Nimo zajimcow z Budyskeho­ a Zhorjelskeho wokrjesa, z Drježdźanskich a Braniborskich kónčin wužiwachu tež dowolnicy z łužiskeje jězoriny wopyt klóšterskeje zahrody za jónkrótny a njezapomnity wulět.

Wotměnjawe prózdniny

Kamjenc. W Kamjenskej Lessingowej bibliotece je wšědnje wot 10 do 12 hodź. lětni program. Jutře zetkaja tam dźěći mnicha Franciskusa, srjedu móža so w kołwrótnych hrach pospytać, štwórtk přijědźe spisowaćelka Birgit Richter a pjatk so tydźeń z „hłupakom“ skónči.

Wojerecy. 30 a 31. julija su dźěći w starobje wot pjeć lět na Wojerowski hród přeprošene. Wot 10 do 13 hodź. móža wone pod nawodom po hrodźe dundać.

Młodostny šofera slepił

Budyšin. W Budyšinje je młodostny sobotu wječor mjez křižowanišćom a Lawskimi hrjebjemi šofera z laserowym pointerom slepił. 15lětny dyrbi so nětko wohroženja wobchada dla zamołwić. Pointer je policija nablaku sćazała.

Warnuja před dźiwinu

Žuricy. Minjeny pjatk je na dróze mjez Žuricami a Porchowom dźiwje swinjo do mopeda běžało, na čož jeho wodźer pa­dny a so ćežko zrani.

Chróšćanski farar Měrćin Deleńk je wčera pola Smječkec, poboku putniskeje dróhi njedaloko „kupjelow“, z wěriwymi Šołćic kapałku poswjećił. Ponowjenje bě z Wu­dworja pochadźacy Jurij Šołta do nadawka dał. Dźensa blisko Münstera bydlacy 90lětny čuje so ze swojimi prjedownikami jara zwjazany. Foto: Feliks Haza

Wojerecy/ Budyšin (SN). Twarskich dźěłow dla je we Wojerecach wot dźensnišeho hač do šwórtka Pestalozzijowa hasa jenož połojčnje wobjězdźomna. W Budyšinje wostanje Słonoboršćanska dróha po wšěm zdaću hač do 30. julija pod Jordanowym mostom kładźenja medijow dla zawrjena. Dokelž wotměwa so na Budyskim Třělnišću wot dźensnišeho hač do 8. awgusta festiwal skakanskich hrodow, su tam parkowanske městna wobmjezowane.

Kałaty dorost w zwěrjencu

Wojerecy (SN). We Wojerowskim zwěrjencu stej so wčera jěžowcaj narodźiłoj. Hižo w měrcu měještej jeju staršej Walter a Lina dorost. Běłowopušate zwěrjata słušeja k družinje hrymzakow z juhowuchodneje Europy, Indiskeje a Bliskeho wuchoda. Swojich twjerdych a dołhich kałačow dla maja wone jenož mało njepřećelow.