Z wudaća: póndźela, 22 awgusta 2016

Janšojske towarstwa a wšitcy dalši pomocnicy su so jako dobri hosćićeljo Festiwala serbskeje kultury w Delnjej Łužicy wopokazali. Atmosfera bě přijomna, swójbna. Wulki swjedźenski ćah z nimale 50 wobrazami a pisane programy kulturnych ćělesow z Delnjeje, srjedźneje a Hornjeje Łužicy dožiwić je so wudaniło. Rozsud předsydstwa župy Delnja Łužica za Janšojce njebě jenož tohodla prawy, dokelž su tamniši Domowinjenjo tónle swjatk namjetowali, ale dokelž je nawjes z wysokimi štomami idealne městno za swjedźenjowanje pod awgustowskim słóncom. Swjedźenska mila z Němsko-Serbskim domizniskim muzejom, cyrkwju a farskim statokom na jeje jednym kóncu a nawsu z wulkim jewišćom a Młynkec statokom na tamnym kóncu bě wuběrna. Škoda, zo njejsu na wulkich dróhach do Janšojc­ bóle za festiwal wabili, jenički stejak w Turjeju bě přemało mjez Choćebuzom a Janšojcami. Axel Arlt

Skoro ze wšěmi europskimi krajemi jedna wo palacych prašenjach

Berlin (dpa/K/SN). Němska kanclerka Angela Merkel (CDU) so po swojim dowolu do dźěła runjewon wala. A to z překipjacym programom pućowanja po cyłym rjedźe europskich krajow. „Najmócniša žona Europy“ ma za swój nadawk, wróćo zdobyć dowěru europskeje ludnosće, zadźěwać hrožacemu rozpadej EU a dowobarać tu a tam přiběracemu nacionalizmej. Eksperća maja za to, zo dźe nic naposledk tež wo politiski wosud kanclerki. Jenož hdyž so jej poradźi, na přikład hromadźe z partnerami naležnosć ćěkancow skónčnje do horšće dóstać abo z partnerami po móžnosći krizu Syriskeje dla a wěstotnu situaciju zmištrować, móže wona zaso přirost akceptancy wočakować.

Swoju marathonsku misiju zahaji Angela­ Merkel dźensa ze zetkanjom z francoskim prezidentom Françoisom Hollandeom a italskim ministerskim prezidentom Mattejom Renzijom. Na italskej kupje Ventotene njedaloko Neapela a na lětadłonošaku Garibaldi před pobrjohom je wjeršk trójki wo tym wuradźował, kak dale postupować po wotumje Britow za brexit.

Rio de Janeiro. Z pisanym programom rejow a spěwow zakónčichu so wčera w Rio de Janeiru 28. olympiske lětnje hry. Čestny nadawk chorhojnika spožčichu zamołwići němskeho olympiskeho zwjazka kanutej Sebastianej Brendelej. Jako dwójce krónowany olympiski dobyćer běše wón zdobom najwuspěšniši němski sportowc w Brazilskej. Sobotu bě sej swoje druhe złoto zwěsćił, a to zhromadnje z Janom Vandreyjom na distancy 1 000 metrow. Hišće samsny dźeń běchu sej němscy kanuća tři dalše medalje wubědźili. Tak wjesłowaše tež muska kajakowa­ štwórka k złotu, žónski kwartet k slěbru a solist Ronald Rauhe k bronzy.

Z tajkim wuspěchom njemóža němscy lochkoatleća za sebje wabić. Po špatnych wukonach wulkich faworitow, kaž Davida Storla, Chistiny Schwanitz a dalšich, wšak postara so mjetar hlebije Thomas­ Röhler wo zjednanliwy wukónc. Wulkotna dalokosć z 90,30 metrami wunjese­ 24lětnemu Durinčanej zaso raz němske złoto w tutej sportowej družinje po Klausu Wolfermannje, kiž bě 1972 w Mnichowje dobył.

Bratislava (SŽ/K). W Słowakskej je so koalicija štyrjoch stron pukła: Po tym zo bě pjeć ze sydom zapósłancow małeje sobu knježaceje strony Siet’ (Syć) z hněwa frakciju wopušćiło a so stronje madźarskeje mjeńšiny Most-Híd přidružiło, je před­syda strony Siet’ a minister za wobchad Roman­ Brecely premierej Robertej Ficej swój wotstup zdźělił. Ministerski prezident wšak bórze po tym wozjewi, „zo dowjedźe nowa struktura politiskich mocow k aktiwnišej formaciji knježerstwoweje koalicije“. W tym zwisku Fico zdźěli, zo změje přichodna trojokoalicija Smer-SD, Most-Híd a SNS podpěru 81 ze 150 zapósłancow sejma. Šef Mosta-Híd Béla Bugár­ připowědźi, zo předsydstwo strony prawdźepodobnje dotalnemu statnemu sekretarej Árpádej Érsekej zastojnstwo ministra za wobchad dowěri. Hakle lěta 2014 załožena Siet’ bě wot wšeho spo­čatka „njewěsty patron“. Docpěwši při wólbach 2015 dźesać sydłow běchu hižo krótko po tym třo zapósłancy z njespokojnosće stronje božemje prajili. Nět sedźitaj­ hišće dwaj za nju w sejmje.

ST Haselbachtal – SJ Njebjelčicy 0:1 (0:0)

Zestawa hosći: D. Ričel – Hrjehor, Deleńk, Haška, Cyž, Hanuza, Hommel, Janca­ (62. Šołta), Hoelzel, Čornak (62. T. Kubaš), Lejnart (87. Korjeńk)

Swoju prěnju dypkowu hru w sezonje mějachu Njebjelčanscy koparjo w Haselbachtalu. Tamniše towarstwo wotmě runočasnje k dypkowej hrě přez cyły kónc tydźenja sportowy swjedźeń. Mjez druhim hraješe tam mustwo oldijow Dy­nama Drježdźany. Hač na Daniela Krala a Floriana Ričela běchu w rjadach Njebjelčanow wšitcy pódla. Po přihotowanskim času a testowych partijach chcychu chowancy trenarskeje dwójki Panic/Krawčik najprjedy raz z wěsteho škita sem nadběhować. Wot wšeho spočatka wuwi so spěšna a dospołnje wotewrjena hra. Domjacy mějachu při tym husto kontrolu, a Njebjelčenjo su jeno ćežko swój hrajny rytmus našli. Wrotar Ričel dyrbješe wjacekróć swoje kmanosće pokazać­ a strašne nadběhi wotwobarać. Najlěpšu šansu za hosći měješe Čornak. W 27. min. bě wón sam před wrotarjom, kotrehož pak njemóžeše přewinyć.

Na wubědźowanju Powerserb sobotu w Radworju běchu mjez druhim móc, zmužitosć, wušiknosć a teamowy duch prašane. Jeno zhromadnje móžachu sportowe cyłki nadawki zmištrować. Tónkróć wjerćeše so wšitko wokoło Asterixa,­ Obelixa a wězo Romjanow.

Awtor dźensa Michał Nuk

Zaso su olympiske hry nimo. Wězo sym kaž kóždy raz hodźiny před telewizorom abo live-streamom sydał a so nad medaljemi a wurjadnymi wukonami sportowcow wjeselił – mjez druhim nad złotej medalju rodźeneho Lubijčana Christiana Reitza w třělenju z pistolu. Přiwšěm su hry w Rio de Janeiru we mni kopicu prašenjow zawostajili. Ženje do toho njejsym fairnosć a olympiske moto „Pódla być je wšitko“ bóle parował, ženje njejsym nad zmysłom wuhotowanja olympiady a z tym zwisowacymi wopo­rami za ludnosć, přirodu a infrastrukturu bóle dwělował hač lětsa. Štóž je rozprawnistwo w minjenych měsacach trochu dokładnišo­ slědował, tomu je wědome, zo so doping mjeztym po cyłym swěće w nimale wšitkich sportowych družinach kaž hydra rozpřestrěwa, přećiwo kotremuž je bój nimale bjezwuhladny. A hdyž stanje so prašenje za wobšudnistwom w sporće z politikumom kaž w padźe Ruskeje, dyrbiš so chutnje prašeć, kotry mjezynarodny abo narodny sportowy zwjazk so scyła hišće­ za čistych sportowcow zasadźa.