Z wudaća: póndźela, 22 awgusta 2016

Sokoł Ralbicy/Hórki – ST Kinspork/Łužnica 2:0 (0:0)

Zestawa domjacych: Ch. Gloxyn – Matka, Domaška, Schultz, Lulak, Šewc, S. Bjeńš, D. Gloxyn, Korjeńk, Wowčerk, Kurjat­ (46. B. Bjeńš)

Ke koparskej hrě witaše Sokoł Ralbicy/Hórki wčera mustwo z Kinsporka/Łužnicy. Te bě swoju prěnju hru doma přećiwo Kumwałdej z 3:0 dobyło, štož bě delanskim koparjam warnowanski signal. Tohodla hru wot spočatka na lochke ramjo njewzachu. Pětr Domaška bě znowa w škiće zasadźeny, dokelž Bosćij Bjeńš zranjenja dla najprjedy raz wospjet na ławce sedźeše. Gabriel Kurjat jako jenički nadběhowar měješe přez cyły prěni połčas swoje ćeže přećiwo sylnemu škitej hosća. Najwjetšu ćežu pak měješe Stanij Šewc, kiž njezamó bul z třoch (!!!) metrow přez liniju sunyć. Přećiwniski wrotar jón hišće z refleksom wotwobara (30.). Hra bě dale bojowniska a wobě mustwje njeměještej žane jasne šansy.

Z wućahom šulerjow z města na swjedźenišćo je Kamjenska Boršć dźensa připołdnju jedyn ze swojich wjerškow dožiwiła. Něhdźe­ 1 200 holcow a hólcow kročeše w dołhim ćahu a je stykane kwětki a chorhoje sobu njesło. Lětsa běchu znowa serbske chorhoje widźeć, kotrež njeseštej mjez druhim Carolin Neitsch z Krěpjec a Anika Nowakec z Łazka (wotlěwa). Foto: Feliks Haza

Dypkownje w 16.30 hodź. su zawčera­wšim w Smječkecach ze sirenu alarm wuwołali.­ A krótko po tym smaleštej z tamnišeje gratownje wohnjowobornej awće z módrej swěcu a ze sirenomaj.

Smječkecy (aha/SN). Přičina alarma bě předstajene zwučowanje składnostnje dźesaćlětneho wobstaća młodźinskeje wohnjoweje wobory Worklečanskeje gmejny, kotrež bě pola Wojerowskeje zasadźenskeje centrale přizjewjene. Dorostowa wohnjowa wobora, jej přisłuša dwanaće čłonow w starobje dźesać do 17 lět – mjez nimi je pjeć holcow – , třitydźensce pod nawodom hłowneho hašenskeho mištra Handrija Kruše zwučuje.

Serbske ewangelske towarstwo 12. dworowy swjedźeń wotměło

Wuježk (RLc/SN). „Wy wuhotujeće mjeztym najrjeńši swjedźeń w tutej kónčinje!“ Tajku chwalbu wězo kóždy zarjadowar rady słyši, tež Mato Krygaŕ a Serbske ewangelske towarstwo, kotrajž zhro­madnje wot lěta 2005 Pawlikec statok we Wuježku­ dwójce wob lěto k małemu ­centrumej kulturneho žiwjenja ewangelskeje serbskeje Hornjeje Łužicy wožiwjataj. Wjace hač sto ludźi wšitkich genera­cijow z Wuježka, Bukečanskeje wosady a z cyłeje Hornjeje Łužicy je so tam so­botu zetkało.

„Wutřěle“ z wótřerěčaka byli

Dubc. Kedźbliwy wobydler přizjewi so sobotu připołdnju pola policije, dokelž bě při hatach w Dubcu pola Rěčic pječa ně­chtó na ptački třělał. Krótke naprašowanje pola rybarja, kiž tamniše haty wobhospodarja, naležnosć spěšnje wujasni. Zo bychu wobstatk rybow škitali, běchu tam alarmowu připrawu instalowali. Z njej wothrawaja w njewobstajnych wotstawkach přez wótřerěčak praskot, kotryž ma rybjacych rubježnikow wućěrić.

Dwě hodźinje zatłusnjeny

Chrjebja. Nimale dwě hodźinje wohnjowi wobornicy wčera připołdnju trjebachu, prjedy hač móžachu zatłusnjeneho šofera z jeho znjezboženeho awta wuchować. Šofer Mercedesa bě mjez Chrjebju a Klětnom na runym puću na lěwy bok jězdnje zajěł a do štoma zrazył. Při tym so wón ćežko zrani.

Smochćicy (CS/SN). Kak móžeš k najwšelakorišim składnosćam za cyrkwje a wosadnicy kwětki stykać, je 15 žonow so­botu w Smochčanskim Domje biskopa Bena nawuknyło. Wone wobdźělichu so na floristiskim kursu, nawjedowanym wot Silvije Jonas z Wojerec. Tajke kursy w Smochćicach mjeztym hižo pjeć lět jónu wob lěto poskićeja, kaž sobudźěłaćerka domu Marja Wjencyna rozłoži.

Cyle w znamjenju zelow steješe wčera zahroda klóštra Marijineje hwězdy w Pančicach-Kukowje, hdźež wotmě so zelowa njedźela. Zahajichu ju z ekumeniskej nutrnosću ze superintendentom Janom Malinkom a Drježdźanskim kanonikom Bennom Schäffelom. Sta wopytowarjow dachu sej zelowy kwěćel požohnować a wužiwachu poskitki 25 wikowarjow a plahowarjow přirodnych wudźěłkow. Hudźbnje wobrubił je­ popoł­dnjo spěwny kwartet PoŠtyrjoch. W bywšej lodowej pincy wote­wrěchu wustajeńcu škleńčerskeho wuměłstwa. Foto: Feliks Haza