Z wudaća: wutora, 23 awgusta 2016

Düsseldorf (dpa/SN). Wikowar awtow, kiž je Audi z manipulowanej software předał, njetrjeba kupcej awta pjenjezy wróćić. Tole je Düsseldorfske krajne sudnistwo dźensa rozsudźiło, wotpokazujo tak skóržbu kupca. Tón bě sej žadał, zo wikowar awtow kupne zrěčenje z nim zběhnje a jemu pjenjezy wupłaći. Wikowar bě jemu porno tomu poskićił software wuměnić. To pak muž nochcyše.

Nowe mejlki Clinton našli

Washington (dpa/SN). W aferje w zwisku z wužiwanjom priwatneho mejloweho konta za słužbne naležnosće něhdyšeje wonkowneje ministerki Hillary Clinton su 15 000 dalšich powěsćow namakali. Zwjazkowa policija FBI je powěsće mjeztym wonkownemu ministerstwu dale posrědkowała. Clinton ma hižo dlěši čas mjerzanja, dokelž je swój čas słužbne a zdźěla tajne informacije přez priwatny server dale pósłała. FBI jej w tym zwisku lochkomyslnosć wumjetuje.

Bosbach hižo njekandiduje

Financowanske zrěčenje za Pücklerowy park podpisane

Mužakow (dpa/SN). Dźěło załožby Wjercha Pücklerowy park Mužakow je hač do lěta 2020 zaručene. Nowe financowanske zrěčenje staj zwjazkowa kulturna statna ministerka Monika Grütters a sakski ministerski prezident Stanisław Tilich (wobaj CDU) wčera podpisałoj. Zrěčenje předwidźi, zo Zwjazk a Sakska kóžde lěto kaž dotal stajnje dobry milion eurow přewostajitej. Pjenjezy trjebaja, zo móhli objekt zachować a dale wobhospodarjeć. Dotalne zrěčenje kónc lěta wuběži.

Wot rubježnikow natočeny film wo jich nadpadźe je policiji w Mönchengladbachu dźěło jara wolóžił. Po tym zo bě wona film skerje připadnje do rukow dóstała, móžeše njeskutk po štyrjoch lětach wujasnić a třoch skućićelow zajeć. Mužojo běchu so swój čas do bydlenja muža zadobyli, z nim chětro hrubje zachadźeli a drohoćinki w hódnoće 60 000 eurow rubili. Film nańdźechu policisća na kompjuteru, kotryž běchu w druhej naležnosći sćazali.

Mać na parkowanišću awtodróhi A 6 zabyli su swójbni z Rumunskeje. Žona bě ze swojim mužom, dźěćimi a přichodnymaj staršimaj po puću do Francoskeje. Jako so z nuznika nawróći, běchu ći tamni hižo wotjěli. Policisća dowjezechu ju do domu bjezdomnych w Heilbronnje k přenocowanju. Krótko na to so swójba přizjewi a je nětko zaso zjednoćena.

Praha (dpa/SN). Čěski ministerski prezident Bohuslav Sobotka žada sej hladajo na krizu ćěkancow dla zhromadnu ar­meju Europskeje unije. Wón nadźija so na nazymskim zetkanju rady EU prěnich konkretnych zawjazkow a namjetow, rjekny socialdemokratiski politikar wčera wulkopósłancam kraja w Praze. Hłowny zaměr wušeho zhromadneho dźěła měł nimo škita wonkownych mjezow EU před „njekontrolujomnymi prudami ludźi“ tež bój přećiwo terorizmej być. Europa dyrbjała so ze „spušćomnym a jednanjakmanym partnerom“ NATO stać. Pozitiwny přikład je Sobotce w tym zwisku kooperacija mjez EU a NATO w boju přećiwo pašowarjam ludźi w Egejskim morju.

Debaty wokoło přichoda Łužicy po wotbagrowanju brunicy mi wuwědomjeja, zo trjebamy skónčnje planowansku wěstotu: Su to přistajeni Vattenfalla runje tak kaž wot šwedskeho předewzaća wotwisne zawody a zdobom wobydlerjo regiona. Předań łužiskeje brunicoweje sparty Vattenfalla pak so dale dliji. Njewěstosć a starosće přiběraja. Mnohe iniciatiwy so hižo z přichodom za brunicu rozestajeja. Škoda jenož, zo činja to zwjetšeho dźěla same za sebje. Měnju z tym komunalnych politi­karjow, wobswětoškitne zwjazki kaž tež politiske strony. Kóždy swój wusmuž wari. Poprawom je hižo dawno trjeba, zo so wšitcy akterojo zhromadnje za blido sy­dnu a swoje ideje hromadu znoša. Njewěm, čehodla so to hišće stało njeje. Snano měnja, zo přewjele kucharjow wusmuž skazy. W tymle padźe pak sej myslu, zo móhli wjacori akterojo sól w poliwce być. Bianka Šeferowa

Berlin (dpa/K/SN). Njesłyšane rozestajenje mjez awtotwarcom Volkswagen a dodawaćelskimaj zawodomaj je skónčene. Po wjacorych njewuspěšnych jednanjach su so dźensa we Wolfsburgu dojednali, zo zawodaj nuznje trěbne dźěle awtow zaso dodawatej. Wobě stronje stej doje­dnanje wobkrućiłoj. Wo nadrobnosćach ničo njewozjewichu. Po informacijach awtotwarca so w potrjechenymaj twornjomaj na to hotuja, awtowe dźěle dale produkować. Tež prašenje krótkodźěła w Emdenje, Wolfsburgu, Kasselu a Zwickauwje je drje tak z blida. Wot dny trajaceho bojkota bě naposledk nimale 30 000 dźěławych potrjechenych.

Istanbul (dpa/K/SN). Lětarstwo turkowskeho wójska je w sewjerosyriskim regionje Manbidsh pozicije teroristiskeje milicy Islamski stat (IS) a syriskich wotdźělow zakazaneje kurdiskeje strony PKK bombardował. Turkowska ma za to, zo je za sobotny atentat na kwasnu hosćinu ze znajmjeńša 54 smjertnymi woporami milica IS zamołwita. Mjez morjenymi je wjele dźěći a młodych ludźi.

Ankara (dpa/K/SN). Napjatych poćahow z Awstriskej po zwrěšćenym pospyće puča­ dla je Turkowska swojeho wulko­pósłanca z Wiena wotwołała. „Smy jeho na ,wuradźowanja‘ do Ankary zwołali“, rjekny turkowski wonkowny minister Mevlüt Çavuşoğlu. Awstriska bě sej mjez druhim žadała z Turkowskej přistupa k EU dale njejednać, dokelž wona doje­d­nane winowatosće njespjelnja.

Berlin (dpa/K/SN). Kanclerka Angela Merkel­ (CDU) namołwja ludźi turkowskeho pochada k loyaliće napřećo němskemu state­j. „Wot turkowskich ludźi, bydlacych hižo dołho w Němskej, wočakujemy wulku měru loyalnosće napřećo našemu krajej“­, wona praji. „Za to spytamy, měć za jich naležnosće wotewrjene wucho a je zro­zumić. A wudźeržujemy tež wuski zwisk ze zwjazkami migrantow.“

Rio de Janeiro. Prěnje olympiske hry we Łaćonskej Americe su wot minjeneje njedźele jenož hišće stawizny. Ale što zwostawa nam w pomjatku? Zawěsće je to tež wulke mnóstwo problemow zwonka sportowych wubědźowanjow. Tele sahachu wot improwizacijow při twarje olympiskeje wsy přez cika-wirus a njefairny domoródny publikum hač ke kriminaliće. K poslednjemu dypkej drje wumyslenu stawiznu rubježneho nadpada na płuwarjow wokoło Američana Ryana Lochty tak spěšnje njezabudźemy. Dalša wulka tema w zwisku z lětu­šimi hrami běše doping. Prašenje, kak z ruskimi atletami wobchadźeć, wosta nimale hač do kónca olympiady ze stron IOC njewotmołwjene.