Po poradźenej sezonje 2015/2016 z wotzamknjenjom na třećim městnje we wokrjesnej wyšej lize a z dobyćom wokrjesneho pokala su so tež koparjo Sokoła Ralbicy/Hórki do hrajneje doby 2016/2017 podali. Po poražce 1:5 w krajnym pokalnym kole přećiwo ST Hornjemu krajej Sprjewja docpěchu woni njerozsudne 1:1 w prěnjej dypkowej hrě na Horach.
Na trenarskej poziciji so w prěnim mustwje ničo změniło njeje. Thomas Schulze ze Spalow koparjow Sokoła dale trenuje, jemu poboku je dale mustwowy nawoda Maik Brězan. Mustwo same pak ma wotchadaj a nowopřichadaj. Křesćan Bejmak je do Radworja šoł, Dirk Šołta hraje nětko za delnjołužiske koparske towarstwo Wacker 09 Choćebuz-Strobice. Cyłk hraje w braniborskej krajnej lize juh. Dirk Šołta dźě w Choćebuzu bydli a tam tež dźěła. Woběmaj hrajerjomaj na tutym městnje hišće raz dźak a připóznaće za jeju wukony w delanskim koparskim mustwje. Přichadaj Sokoła staj Marcel Wowčerk ze Šunowa, kiž je wot młodźiny A Budissy Budyšin přišoł a Denny Gloxyn z Ralbic. Tež wón bě něšto lět pola Budissy. Wobaj staj fleksibelnje zasadźomnaj.
Regionalna koparska liga
1. Jena 4 8 :0 12
2. Lok Lipsk 4 8 :3 10
3. Nordhausen 4 9 :2 9
4. BFC Dynamo 4 10 :3 7
5. Hertha BSC II 4 5 :4 7
6. RB Lipsk II 4 5 :5 7
7. FC Viktoria Berlin 4 6 :3 6
8. Babelsberg 03 4 7 :8 6
9. Auerbach 4 4 :6 6
10. Berlinski AK 4 3 :5 5
11. Fürstenwalde 4 3 :6 5
12. Schönberg 3 5 :4 4
13. Energija Choćebuz 3 2 :2 3
14. Neugersdorf 4 7 :8 3
15. Meuselwitz 4 0 :3 2
16. Budissa Budyšin 4 2 :5 1
17. Neustrelitz 4 1 :8 1
18. Luckenwalde 4 1 :11 1
Drježdźany (B/SN). Drježdźanski Ekumeniski informaciski centrum je z Annu Groschwitz přistajił referentku za křesćansku iniciatiwu „Hinak rosć“. 32lětna socialna pedagogowka chce z modelowymi wosadami wokoło Drježdźan hromadźe dźěłać. „Zo mamy naše wašnje žiwjenja změnić, zmóžnjejo přichodnym generacijam a našim bratram a sotram po cyłym swěće dobre zhromadne skutkowanje a žiwjenje, njeje dawno hižo žane potajnstwo“, wona rjekny.
Ženje hišće telko ćěkancow
Tilich do Nižozemskeje
Drježdźany. Němsko-nižozemske temy a europska politika steja w srjedźišću jězby prezidenta Zwjazkoweje rady Stanisława Tilicha (CDU) do Nižozemskeje. Na wopyće zajutřišim a pjatk chce so sakski ministerski prezident z wodźacymi politikarjemi zetkać, wón dźensa w Drježdźanach připowědźi. Tež w europskim policajskim zarjedźe jeho wočakuja.
Praktikum wědomostnikam
Drježdźany. Z pilotowym projektom chcedźa wotnožki Fraunhoferskeho instituta w Sakskej z domizny ćeknjenym wědomostnikam šansu skićić. Program „Integracija“ wopřijima třiměsačny praktikum, wukubłanje abo časowje wobmjezowane přistajenje za připóznatych požadarjow azyla, dźensa zdźělichu. Dotal su 16 požadarjam azyla praktikum abo dźěło zmóžnili, zwjetša Syričanam.
Rybarjo wuradźuja
Miłoćicy (HS/SN). 10. mjezynarodna rězbarska a kamjenjećesarska dźěłarnička wotměwa so wot wčerawšeho w Miłočanskej skale. Dwanaće wuměłcow ze štyrjoch krajow, kaž staj to na přikład Milan Brothánek z Čěskeje abo Neli Christowa z Bołharskeje, běchu čłonojo Njebjelčanskeho towarstwa Kamjenjak z 30 přizjewjenych wuzwolili. Wobdźěleni su tohorunja třo Serbja, mjez nimi Alojs Šołta ze Žuric. W nalěću běchu wupisanje za jubilejne zarjadowanje do interneta stajili. Z požadanjemi z dźewjeć krajow, samo z Azije, Južneje Ameriki bě so towarstwowa jury kritisce zaběrała a na to přeprošenja wotpósłała. Sympozij spěchujetej hłownje kulturny konwent Hornja Łužica-Delnja Šleska a euroregion Nysa. Poprawom za loni planowanu dźesatu dźěłarničku dyrbjachu pobrachowaceje financneje podpěry dla wotprajić.
Festiwal serbskeje kultury wotmě so minjeny kónc tydźenja w Janšojcach. Mnozy zajimcy z Delnjeje, srjedźneje a Hornjeje Łužicy sej tam wulećachu. Woprašachmy někotrych za jich zaćišćom.
Jurij Špitank ze Zejic, předsyda TCM: Do Janšojc sym so hłownje priwatnje podał, dokelž jako Hornjoserb Delnju Łužicu přemało znaju. Cyrkej bě na kemšach derje wopytana, mnohe žony běchu narodnu drastu woblečene a kemšerjo su kěrluše z nowych ewangelskich spěwarskich „Tyca“ sobu zanošowali. To su rjane spěwy. Tajki wopyt je zdobom dobra přiležnosć, z Delnjej Łužicu dalše styki nawjazać.
Wolfgang Kotisek z Brězowki, nawoda Slepjanskeho folklorneho ansambla: Je rjenje, so z druhimi kulturnymi ćělesami tu na festiwalu zetkać. Derje zdobom je, zo so ludźom žiwe tradicije předstajeja. Hač w Delnjej abo Hornjej Łužicy – wšudźe, hdźež so tajke zarjadowanja wotměwaja, smy jako ansambl rady pódla. To je wosebje młodostnym pohon.
Přichod Łužicy je tuchwilu tema mnohich zjednoćenstwow a zastupjerjow regiona. Nětko su tež wobswětoškitne organizacije swoju pomoc poskićili a komunalnym politikarjam zjawny list napisali.
Nowe Město n. S. (SN/BŠe). Zastupjerjow komunow, iniciatiwow a towarstwow we Łužicy zjednoća jedna zhromadna starosć: Kak ma přichod Łužicy po wudobywanju brunicy wupadać? Zašły tydźeń rozprawjachu SN wo rozmołwje, kotruž změje zjednoćenstwo komunalnych politikarjow Łužiske koło ze zwjazkowym hospodarskim ministrom Sigmarom Gabrielom (SPD). Tam chcedźa wo tymle centralnym dypku wuradźować. Dźewjeć wobswětoškitnych organizacijow je nětko reagowało a list napisało, w kotrymž Łužiske koło kritizuja. „Wone nima legitimaciju, Łužičanow zastupować a za nich rěčeć. Dotal njejsu z tohole kruha žane do přichoda pokazowace koncepty a ideje wušli“, rěka w lisće. Tak wuprajeja so organizacije za to, z wjacorymi akterami wo přichodźe Łužicy rěčeć.
Budyšin (SN). Twarska branša w Budyskim wokrjesu skići hišće 32 swobodnych wukubłanskich městnow, kotrež su na dźěłowej agenturje přizjewjene. To zdźěli wuchodosakske industrijne dźěłarnistwo twar–ratarstwo–wobswět (IG BAU). Po cyłej Sakskej je samo hišće 330 wučomniskich městnow w twarskim hospodarstwje njewobsadźenych.
„Wučomnicy na twarje słušeja k tym wukubłancam, kotřiž najwjace zasłužeja. W prěnim lěće dóstanješ jako twarski wučomnik 675 eurow wob měsac. W třećim lěće móže přichodny muler, dróhotwarc abo ćěsla hižo 1 120 eurow brutto měć“, wabi wobwodny předsyda dźěłarnistwa Peter Schubert. „Wukubłanske lěto je so runje započało. Štóž so nětko chětře za twarstwo rozsudźi, ma šansu, wukubłanje krótkodobnje zahajić.“
IG BAU namołwja twarske předewzaća w Budyskim wokrjesu, při wuzwolenju dorosta jenož na censury njehladać. 20 požadarjow je so tule dotal podarmo wo wukubłanske městno w twarskej branši prócowało po cyłej Sakskej 150.