Z wudaća: póndźela, 26 septembera 2016

Swojeju staršeju ze spanskeje stwy wuzamknył­ je 13 měsacow stary hólčk w Magdeburgu. Jemu bě so minjeny pjatk poradźiło swoje łóžko přestorčić a mjez łožo staršeju a durje sunyć. Durje hodźachu so jenož hišće škałbu wote­wrěć. Bjezradnaj staršej wołaštaj na to wohnjowu woboru, kotraž durje wusadźi. Kak je hólčk łóžko přestorčić móhł, bě tež wobornikam wulke hódančko.

Z črjewami swojeho zemrěteho mandźelskeho je Marokkočanka do Graza přilećała, zo by je tam na móžne zajědojćenje přepytować dała. Při kontroli wuhladachu zastojnicy „najkurioznišu namakanku minjenych lět na lětanišću“. Žona rozkładźe, zo bě jeje mandźelski po operaciji w Marokku zemrěł. Nětko chce wona dopokazać, zo bu wón zajědojćeny. Kaž medije rozprawjeja, wšak njeje naležnosć chłostajomna.

Banja Luka (dpa/SN). Z rekordnym wuslědkom 99,8 procentow su so Južni Serbja w Bosniskej-Hercegowinje wustawowemu sudnistwu spjećowali. Tole rozprawjeja zamołwite zarjady po wuličenju wustawu ranjaceho referenduma. Po tym chcedźa w serbiskich kónčinach woswjećeny­ narodny swjatk wobchować. Wustawowe sudnistwo Bosniskeje-Hercegowiny bě serbiski narodny swjatk kaž tež referendum wo nim zakazało. USA a EU běchu podarmo spytali, lu­dowemu wothłosowanju zadźěwać. Washington a Brüssel widźitej w nim dalšu kročel, wotpačić serbiski dźěl kraja w tutym balkanskim staće. W najhóršim padźe móhło k nowej wójnje dóńć.

Erkelenz (SN/BŠe). 50 organizacijow, zwjazkarstwow a wobydlerskich iniciatiwow žada sej wot zwjazkeho knježerstwa zahajić skónčnje wustup brunicoweho zmilinjenja. Kónc tydźenja běchu so jich zastupjerjo w Erkelenzu zetkali a wotpowědny program pod hesłom „Erkelenzer Appell“ zestajeli a wozjewili. Mjez podpisarjemi běchu tež łužiscy wobdźělnicy, kaž Renej Šuster z přirodoškitneho zwjazka Zelena liga Choćebuz. Přičina zetkanja bě dźesaćlětne wobstaće akciskeho zwjazka „Přichod město brunicy“.

Kulturny program z wosom serbskimi towarstwami a dalšimi jednotliwcami, k tomu słódnu wječer z regionalnymi wudźěłkami kaž tež reje z dujerskej hudźbu a młodej­ serbskej kapału dožiwichu zajimcy sobotu w Chróšćanskej „Jednoće“. A za to njetrjebachu scyła wjele płaćić. W předpředani płaćeše zastupny lisćik runje šěsć, při wječornej kasy wosom eurow. To je za telko poskitka snadny fenk! Po wšěm zdaću pak to tón abo tamny Serb hinak widźi, hewak by sobotu wječor w „Jednoće“ wjac ludźi było. Tajkele spodobne wjesne zarjadowanje je předewšěm sobuskutkowacym kulturnych cyłkow wulkotna składnosć tróšku zhromadnje swjećić. Mnozy z nich běchu swojich partnerow abo partnerki sobu přinjesli. Wjacori pak so ze wšelkich přičin po programje zaso na dompuć nastajichu­. Škoda, wšako tajke něšto kaž na Chróšćanskej župnej ker­mušce tak často­ nimaš. Janek Wowčer

Wuspěšny dźeń rěče susoda na Zhorjelskim Staroměšćanskim mosće

Zhorjelc (AK/SN). Rěč hrajkanja, paslenja, rejwanja a spěwanja dźěći přez mjezy zwjazuje. To je so na mjeztym pjatym dnju rěče susoda minjeny pjatk w Zhorjelcu zaso raz wopokazało. Hižo druhi króć zarjadowachu swjedźeń rěče susoda na Staroměšćanskim mosće. Něhdźe sto dźěći z němskich, pólskich a čěskich pěstowarnjow a šulow so tam zhromadźi. „Dźěći pokazuja swoje ideje w zhromadnym kulturnym programje. Po tymle puću nastawaja mjezsobne zetkanja“, podšmórny dr. Regina Gellrich, městopředsydka towarstwa TriLingo. Wona bě swjedźeń z wjacorymi partnerami, mjez druhim ze Zhorjelskim towarstwom Kulturne mosty, organizowała.

Na wčerawšim swjedźenskim zarjadowanju Interkulturnych tydźenjow pod hesłom „Wšelakorosć město jednorosće“ w Budyskim Němsko-Serbskim ludowym dźiwadle su wopytowarjo zajimawy a pisany program dožiwili.

Dobre přeća je dźensa dopołdnja we Wětrowje serbski žurnalist Manfred Laduš (srjedźa) k jubilejnym­ 75. narodninam přijał. Nimo Ludoweho nakładnistwa Domowina­ a redakcije Serbskich Nowin, hdźež bě wón wjacore lětdźesatki skutkował, gratu­lowachu jemu bywši kolegojo, mjez druhim Alfons Wićaz (naprawo), a zastu­pjerjo serbskich towarstwow, mjez nimi Borbora Felberowa (2. wotlěwa) za Domowinu­, prof. dr. Dietrich Šołta (2. wotprawa) a Jurij Łušćanski (nalěwo) za Maćicu­ Serbsku. Foto: SN/Maćij Bulank

Berlin/Budyšin (SN). Serbske Nowiny su tež lětuše wubědźowanje Zwjazka žurnalistow Němskeje (DJV) „Fotografojo maja mjeno“ dobyli. Kaž piše DJV w nowinskej zdźělence, zdoby sej naš wječornik ze 100 procentami dokładnje podatych mjenow fotografow 1. městno a tak „dotal njeznaty rekord po cyłej Němskej“. Na dalšich městnach slědowaštej, to­horunja z dobrymi wuslědkami, BILD (wudaće Lipsk) z 90 procentami a Neues Deutschland z 88 procentami prawych podaćow. Wuhódnoćił bě kruh fotowych žurnalistow DJV wudaće dźenikow w Němskej z 8. septembra 2016.

Po lońšim dobyću zamóchu Serbske Nowiny swój wukon samo wo šěsć procentnych dypkow stopnjować, kaž bě to šefredaktor SN Janek Wowčer na mytowanju lětsa w měrcu připowědźił. „Dobry přikład Serbskich Nowin dopokazuje, zo je wobkedźbowanje prawow mjenow fotografow móžne a zwoprawdźomne“, po­twjerdźi zwjazkowy předsyda DJV Frank Überall. „Namołwjamy tuž znowa wšitkich wudawaćelow a šefredakcije, korektne podawanje mjenow fotografow w swojich agendach cyle horjeka zaměstnić.“

Kamjenska župa znowa kulturnu kermušku swjećiła

Chrósćicy (SN/JaW). Z někotrymi překwapjenkami a nowosćemi wabješe župa „Michał Hórnik“ hosći na kermušu so­botu do Chróšćanskeje „Jednoty“. Ně­hdźe 200 ludźi bě přišło, byrnjež so ze zarjadowanjemi tón dźeń znowa kopiło, kaž županka Zala Cyžowa při witanju přispomni.

Jedna z překwapjenkow bě, zo je prěni serbski dudlowar Beno Nowak wšitkich při zachodźe witał, hrajo znate serbske pěsnički. To pak njeběše jenička nowosć. K wječeri njesydachu pomfritki, rězk abo gulaš, ale słódne regionalne wudźěłki ze swinjorězanja, twaroh změšany z lanym wolijom, pomazki, butra a kisałe kórki. Kóždy hósć smědźeše so po swojej woli posłužować, štož sej mnozy jako dobru ideju pohosćenja chwalachu.

Z prawom smětaj Dinarjec mandźelskaj na nowy a přijomny areal na swojej ležownosći hordaj być. Wjele ludźi je so tam wčera rozhladowało. Foto: Jan Kral

Nowoslicy (JK/SN). Njeje lěpšeje mó­ž­nosće, swójske předewzaće abo nowosć wobchoda zajimcam předstajić hač z tym, zo daš jim a móžnym přichodnym kupcam na dnju wotewrjenych duri za kulisy pohladać. Tak přichwata wčera nahladna ličba zajimcow. Mjez nimi běchu tež swěrni přećeljo a wužiwarjo posłužbow znateho a připóznateho Dinarjec předewzaća w Nowoslicach. Andreja a Ludwig Dinarjec staj z prawom hordaj na to, štož běštaj zhromadnje z tójšto pomocnikami na nohi stajiłoj. Nimo pjeć hóstnych stwow za dwě wosobje, kotrež su zdźěla tež za zbrašenych wužiwajomne, je to rjana a přijomna zahroda, hdźež móža so dowolnicy a hosćo runje tak kaž wopytowarjo najwšelakorišich zarjadowanjow wokřewić a při rjanym haćiku w přijomnych křesłach sedźeć. Wo tym so mnozy z wčerawšich hosći sami­ přeswědčichu. Hóstne stwy su po najno­wšim standardźe wuhotowane, ničo njepobrachuje a wonkowny ambiente wabi k přebywanju.