Chłódźak woheń zawinił
Budyšin. K hašenju wołachu sobotu popołdnju wobornikow do wjaceswójbneho domu na Budyskej Weinertowej. Tam bě w kuchni bydlenja woheń wudyrił. Přičina bě po wšěm zdaću skóncowany chłódźak. 31lětna wobydlerka a jeje dwě dźěsći w tym času doma njeběchu. Dóstawši so z woknom do kuchnje móžachu wobornicy a płomjenja skónčnje podusyć. Kaž policija zdźěli, nasta dohromady něhdźe 10 000 eurow škody.
Choćebuz. Wosebitu wustajeńcu Choćebuskeho Serbskeho muzeja „Zachowane drohotnosće“ wotewru srjedu, 28. septembra, w 19 hodź. w Choćebuskim měšćanskim muzeju na Dwórnišćowej 22. K wotewrjenju porěči Steffen Krestin. Wo hudźbne wobrubjenje postara so duwo Słowjanske barwy. Zajimcy su wutrobnje přeprošeni.
Štó chce sobu hrać?
Budyšin. Němsko-Serbske ludowe dźiwadło pyta za swoju nowu inscenaciju „Wir sind keine Barbaren“ Phillippa Löhle sobuskutkowacych za wobydlerski chór. Za to přewjedu srjedu, 28. septembra, w 19 hodź. we hłownym domje dźiwadła casting (jewišćowy zachod na Seminarskej). Wosebje wjesela so nad muskimi zajimcami. Premjera budźe 26. nowembra. Hłownu rólu změjetaj mjez druhim Marian Bulank a Měrko Brankačk. Wot spočatka oktobra budu proby. Wone wotměja so spočatnje dwójce wob tydźeń a stajnje sobotu dopołdnja, w premjernym tydźenju kóždy wječor.
Młodźinski centrum nadpadnyli
Choćebuz. Pozdatni prawicarjo su sobotu Choćebuski młodźinski centrum Chekov nadpadnyli. Něhdźe 20 muži centrum nadběhowaše a jednu wosobu zrani. Za čas nadpada su tam absolwenća medicinskeje fachoweje šule swjećili. Policija je mjeztym někotrych skućićelow identifikowała, kaž ze zdźělenki centruma wuchadźa.
Wjace wudawkow hač dochodow
Wiesbaden. Komunam w Němskej su w prěnjej połojcy lěta nimale tři miliardy eurow w kasach pobrachowali. „Wudawki spěšnišo přiběrachu hač dochody“ zdźěli rěčnik Zwjazkoweho statistiskeho zarjada dźensa w Wiesbadenje. Tak su komuny 110,1 miliardu eurow dóstali, zdobom pak 113,0 miliardow eurow wudali. Hłownje wina su socialne wudawki.
Na mjeno so dojednać
Praha. Nutřkowny dwór, tak mjenowana piazzetta mjez twarjenjemi Narodneho dźiwadła w čěskej stolicy, móhł přichodnje mjeno bywšeho prezidenta Václava Havela nosyć. Wo formje pomjenowanja pak so topografiska magistratna komisija a měšćanscy radźićeljo dotal wadźa: Ći jedni chcyli „Havelowe naměsto“, tamni „Naměsto Václava Havela“.
Rowno (SN/at). Ze zhromadnym swjedźenskim zarjadowanjom su čłonojo Rownjanskeje Domowinskeje skupiny a sobustawojo towarstwa Njepilic dwór pjatk wječor na Njepilic statoku w Rownom na 70 lět Domowinskeho skutkowanja we wsy zhladowali a 250. narodniny wuznamneho wjesnjana Hanza Njepile swjećili. Předsyda Domowiny Dawid Statnik přirunowaše w swojim postrowje prócowanja wo serbsku rěč Hanza Njepile z hižo wotemrětej drjewjanopołobšćinu we Wendlandźe. Skupinarjow wón namołwi, zo bychu „kluč za přichod dale kruće w horšći dźerželi“.
Štwórć lětstotka hižo angažujetej so Sakski krajny kuratorij we wjesnym rumje (SLK) a Miłočanski Křesćansko-socialny kubłanski skutk (CSB) na dobro wobydlerjow. Na dźensnišej jubilejnej róčnicy je tole wulka ličba hosći hódnoćiła.
Pančicy-Kukow (SN/MiR). Na Čerwjenej žurli Pančičansko-Kukowskeho klóštra Marijineje hwězdy njezwosta ani městna, jako abatisa Philippa Kraft přitomnych, zastupjerjow krajneje a komunalneje politiki, hospodarstwa, kultury a kubłanja, witaše. Wšitcy rěčnicy dopominachu na žiwu dobu załoženja SLK a CSB a na jeju historiski wuznam. Zawjazanje wšitkich generacijow su runje tak hódnoćili kaž nadawk, wjesny rum wožiwić a so wo kubłanske naroki starać.
Zły Komorow (SN/CoR). Ze swjedźenjom „Wir sind 70! Das Fest“ je Złokomorowske Nowe jewišćo sobotu nowu hrajnu dobu zahajiło. Z čerwjenym přestrjencom, škleńcu sekta a błyskotacymi so kamerami witachu přihladowarjow we wupředatym domje. Woni dyrbjachu so po kruchu „Bornholmska dróha“, kotryž wotewrjenje mjezy 9. nowembra 1989 na tamnišim NDRskim přechodźe wobjednawa, mjez dalšimi třomi předstajenjemi rozsudźić, doniž nóc z hudźbnym a rejwanskim balom njewuklinča.
Wuspěšnu prapremjeru dožiwi w nadawku Noweho jewišća spisana hra „Birkenbiegen“ z Choćebuza pochadźaceho dramatikarja Olivera Bukowskeho, kotruž pokaza NSLDź klětu pod titulom „Za brězami“ jako hłownu serbskorěčnu inscenaciju. Tekstowa kolaža „Złokomorowski puć“ a kruch „Phantom“ Lutza Hübnera běštej dalšej poskitkaj. Wustajeńca, zestajena wot Hansa-Petera Rößigera, rysuje puć Noweho jewišća wot załoženja jako měšćanske dźiwadło 1946 přez Dźiwadło hórnikow hač do dźensnišeho.