Wulka Dubrawa (CK/SN). Swój wohnjowoborny plan chce Wulkodubrawska gmejna dale wjesć a wudospołnić. To je trjeba, zo by spěchowanske srědki za hižo dołho planowanu nowu gratownju w Klukšu dóstała, wobkrući wjesnjanosta Lutz Mörbe (njestronjan) na zašłym posedźenju gmejnskeje rady. Do plana maja so tajke změny zapisać kaž nakup noweho jězdźidła, přidatne městno za hašensku wodu a dalše. Štyri inženjerske běrowy su poskitk wotedali. Wone žadaja sej mjez 6 900 a 10 200 eurami.
Kłobuk přećiwo słóncu a wětrej na hłowje, nachribjetnik, kiž prawje na bjedromaj sedźi, lochku drastu woblečena a z posměwkom na wobliču – takle předstaji so njedawno Monika Gerdesowa, rozhłosowa žurnalistka z Chrósćic, w kruhu Budyskich seniorow katolskeje wosady. Domiznu sej z nohomaj wotkryć je jedyn z jeje zaměrow. Tak předstaji wona kartu Sakskeje a Saksko-Anhaltskeje, na kotrejž su stare Jakubowe puće zarysowane, wjeduce prěki přez Europu hač do španiskeho Santiaga de Compostela. Tam so zdawna row japoštoła Jakuba česćuje. Ale za nju kaž za mnohich druhich putnikow něhdy a dźensa woznamjenja krajinu pěši přeprěčić tohorunja změrowanje a zdobom rozmyslowanje wo žiwjenju a jeho zmysle.
Budyšin. „Wothódnoćace nastajenje napřećo druhim: Na přikładźe Serbow“ rěka němski přednošk dr. Měrćina Wałdy jutře, srjedu, we 18 hodź. w Budyskim Serbskim muzeju. Zastup je darmotny. Zarjadowanje wotměje so we wobłuku lětušich interkulturnych tydźenjow. Zajimcy su wutrobnje přeprošeni.
Wo jatbowych systemach
Budyšin. Nawoda Zhorjelskeho jastwa Frank Hieckel přednošuje jutře, w 19 hodź. w Budyskim wopomnišću wo jatbowych systemach w NDR a wo podźělu Budyšina po puću k prawostatnemu jastwu. Hieckel bě hižo za čas NDR w jastwje dźěłał a je so z tym po přewróće rozestajał. W přednošku wěnuje so wón nimo toho podawkam w Budyskim jastwje w přewrótowym času.
Awtomat rozbuchnyć spytali
Wojerecy. Po wjacorych podobnych padach we Wojerecach su tam njeznaći zawčerawšim rano znowa spytali, cigaretowy awtomat rozbuchnyć. Při młynje bě w 5 hodź. wulki wrjeskot słyšeć. Kaž policija pozdźišo zwěsći, je awtomat detonaciju přetrał, ale bu při tym chětro wobškodźeny. Wěcnu škodu trochuja na něhdźe 3 000 eurow.
Njeswačidło. (LR/SN) Na dźeń wotewrjeneho twarnišća je minjenu sobotu wjednistwo hladanskeje słužby Advita do bywšeje Njeswačanskeje šule přeprosyło. Šulu přetwarjeja na dom z bydlenjemi z wobstajnym hladanjom, z móžnosćemi dnjoweho hladanja a z bydlenjemi za ludźi, kotřiž ćerpja na demencu.
W prědnim dźělu delnjeho poschoda su rumnosće za dnjowe hladanje. Wo něhdźe 30 ludźi móža so tam wšědnje starać. Bydlenja z wobstajnym hladanjom su swětłe a změja tež mjeńše terasy z widom na rjany Njeswačanski park. Pjeć bydlenjow wobsteji z dweju stwow, 18 bydlenjow z jedneje. Kuchnička je w stwě integrowana. Wězo ma kóžde bydlenje k tomu rjanu wulku kupjel a separatny zachod. Wuhotować móže a dyrbi sej wobydler swoje nowe doma po swojich přećach.
FC Energija Choćebuz
– Budissa Budyšin 1:0 (1:0)
Zestawa domjacych: Meyer – Baude, Matuwila, Stein, Schlüter, Kruse, Putze (62. Mamba), Ziegenbein, Viteritti, Weidlich (46. Gehrmann), Förster (62. Svab)
Zestawa hosći: Wohlfeld – Kolan (40. Hänsch), Patka, Klippel, Heppner, Baudis, Pfanne, Milde, J. Müller, Barnickel (72. Šisler), Barth (72. Němec)
Wosebje w kónčnej fazy hry pola Energije Choćebuz stejachu koparjo Budissy Budyšin před wulkej překwapjenku. Ta pak nochcyše so jim poradźić. Nimale bychu woni wulkemu faworitej w domjacym stadionje dypkaj wotewzali. Mustwo z Hornjeje Łužicy bě tež po zažnym zastatku, kotryž docpě Fabio Viteritti z rjanej třělwu do kuta (10.), dale do sebje wěriło. Hižo w prěnim połčasu běchu prěnje akcenty hosći widźeć. Bohužel pak je so kapitan Martin Kolan zranił (40.).
Biskopičanski FV II
– SJ Chrósćicy 1:2 (1:1)
Zestawa hosći: Králíček – Schulze (46. Šiman), Cyž, Sentivan, Šafář, Dórnik, Młynk (64. Hillman), Runt (89. Dehn), Domaška, Gries, Věchet
Po štyrjoch poražkach dyrbjachu za koparjow Chróšćanskeje SJ w Biskopicach skónčnje dypki sydać. Domjacy, kotřiž běchu swój kader z wosom hrajerjemi prěnjeho mustwa zesylnili, steja a stejachu runja Chróšćanam w pincy tabulki. Biskopičenjo mějachu z wólnym kopom prěnju strašnu třělwu. Králíček pak bě na straži a zwjertny bul wyše łaty. Róžk zhłójčkowa hosćićel nimo wrotow. Mjeńšinje pozdźišo přeběža domjace lěwe křidło Chróšćansku defensiwu, ale Dórnik třělwu w poslednim wokomiku na wrotowej liniji wotpopadny. Po spěšnym konteru poradźi so Biskopičanam nawjedowanje (36.). Jich nadběhowar Bartosz Szymanski trjechi nisko do čorneho. Mjerzace to wrota, krótko do přestawki pak čěska dwójka Runt/Šafář zasłužbnje wuruna. Runt zběhny wólny kop mudrje wot wrotow preč. Šafář sej po kulowatu kožu doběža a třěli z wótreho kuta do saka k 1:1 (42.).
SJ Njebjelčicy
– Hermsdorfske ST 1:1 (0:1)
Zestawa domjacych: Wićaz – Pawlik, Hommel, Haška, Hoelzel, Cyž, Lejnart, Šołta (50. Kubaš), Čornak, Korjeńk (56. Zeller), Janca
Při najlěpšich wonkownych wuměnjenjach wotměchu koparjo Njebjelčanskeje SJ na domjacym trawniku dypkowu partiju přećiwo postupnikej z Hermsdorfa. Přiwisnicy kaž tež přewodźerjo aktiwnych ličachu z třomi dypkami za domjacych. Štož pak so tu publikumej poskići, bě wšo druhe hač porjadna kopańca. Spočatnje nastachu dosć dobre šansy, ale nichtó z nazhonitych Njebjelčanow njebě kmany na wrota přećiwnika třělić. Tak wosta jenički strašny kop Gabriela Čornaka w 25. min. najlěpša akcija prěnjeho połčasa. Čornak pak trjechi jenož do łaty. Tak dóńdźe, kaž hižo někotři na kromje hrajnišća připowědźichu, w 45. min. k nawjedowanju hosći.
Regionalna koparska liga
Lok Lipsk – FC Viktoria 2:2 (0:2)
RB Lipsk II – Schönberg 4:1 (1:0)
Energija Choćebuz – Budissa 1:0 (1:0)
1. Jena 8 22 : 1 24
2. RB Lipsk II 8 12 : 7 17
3. Hertha BSC II 8 13 : 10 16
4. Energija Choćebuz 8 11 : 5 15
5. BFC Dynamo 8 17 : 7 14
6. Lok Lipsk 8 13 : 8 14
7. Babelsberg 03 8 16 : 13 14
8. FC Viktoria 8 17 : 8 13
9. Berlinski AK 8 10 : 11 12
10. Nordhausen 8 11 : 14 10
11. Schönberg 8 11 : 16 10
12. Neugersdorf 8 13 : 11 9
13. Fürstenwalde 8 7 : 14 9
14. Auerbach 8 6 : 14 8
15. Budissa Budyšin 8 8 : 14 4