Z wudaća: srjeda, 19 oktobera 2016

Złyčin (JoS/SN). Tysacy wopytowarjow je minjeny kónc tydźenja rybarski swjedźeń při Balakec haće w Złyčinje přiwabił. Tam woni sobu dožiwichu, kak rybarjo wjacore razy wulki sak přez wodu ćahachu, zo bychu dohromady něhdźe dźesać tonow karpow, šćukow a dalšich družin rybow zwućahali. Cyłkownje 20 pomocnikow bě cyły dźeń na nohach, woni stejachu hač k brjuchej w zymnej wodźe a za blidami ryby po wulkosći rjadowachu.

Uwe Ringpfeil, senioršef Stróžanskeho hatarstwa, kotryž tohorunja Balakec hat w Złyčinje wobhospodarja, je z ry­bjacym lětom spokojom. „Smy wšak hišće wosrjedź wułójenja hatow. Dotal pak je wuslědk dosć porjadny.“ Po jeho słowach ryby lětsa trochu mjenje waža hač zwučene. To pak zwisuje z wusadźenymi rybičkami, kotrež běchu tak a tak hižo trochu mjeńše, rozłoži Uwe Ringpfeil. Wulke mnóstwo rybow pak snadnišu wahu naruna.

Cyłkownje 55 metrow dołhi a hač do 1,80 metrow šěroki přistawny móst nastawa tuchwilu při Budyskim spjatym jězoru sewjernje Ocean-Beach-bary. Tomu přizamknje so hišće 60 kwadratnych metrow wulka platforma. Tam budu čołmiki přistawjeć a ludźo so po mosćiku wuchodźować móc. Za tónle projekt je měšćanska rada 242 000 eurow přizwoliła. Kaž z měšćanskeho zarjadnistwa dale rěka, budźe so přistawnišćo zjawnje wužiwać hodźeć. Foto: SN/Maćij Bulank

„Reja na deponiji“

Wolfen. Na 5. filmowych dnjach we Wolfenje, kotrež so wot 19. do 23. oktobra wotměwaja, pokaza so mjez druhim film DEFA „Tanz auf der Kippe“ z lěta 1991 po noweli „Augenoperation“ („Wšitko, štož ja widźu“) Jurja Kocha. Je to tragiska stawizna młodźenca, kotryž chce w kóždym nastupanju sprawnje jednać a kiž pod towaršnostnymi strukturami a normami časa zwrěšći.

Fachowa konferenca

Oelsnitz/V. Přechody zhromadnje zrjadować je wulki zaměr pomjeznych regionow. Z tutej temu zaběraja so fachowcy na konferency dźensa we vogtlandskim Oelsnitzu. Mjez nimi stej tež nawodnica Budyskeho Rěčneho centruma WITAJ dr. Beata Brězanowa a wědomostna sobudźěłaćerka za rěčny marketing a wědomostne dźěło Jadwiga Kaulfürstowa.

Biskopja w Betlehemje

Rěčicy/Sprjowje/Łaz (SN/JaW). Za aktiwne serbskorěčne turistiske poskitki nimaja a njewidźa zamołwići we Łazowskej gmejnje tuchwilu potencial. Tole zwěsćichu čłonojo Zwjazka za serbski kulturny turizm na swojej wčerawšej ekskursiji po srjedźnej Łužicy. „Dyrbimy Łazowsku gmejnu w tym nastupanju nuznje podpěrać, zo njebychmy region jako serbsko- turistiski zhubili“, zwurazni předsyda zwjazka Marko Kowar. Zdobom poruči wón, jako titul w regionalnym planje sej zapisać za ćežišćo serbsku rěč a kulturu. We Łazu wopyta zwjazk Dom Zejlerja a Smo­lerja, Zejlerjowy pomnik a cyrkej.

Přirunać móžachu čłonojo zwjazka wuwiće turistiskeho zwičnjenja a serbski podźěl zašłych lět na Rěčičanskim Erlichtec dworje. „Wjele změniło so njeje. Nastupajo serbskosć su tam runje tak słabje nastajene kaž před dwaceći lětami“, rjekny Kowar. Za pozitiwne ma wón pokazki na Serbow a hdźe móža so zajimcy na­drobnišo informować.

Někotre jězory maja wuběrnu kwalitu wody

Wojerecy (SN/BŠe). „Tak mnohostronska kaž je Łužiska jězorina, tak monhostronske su tež projekty zaměroweho zwjazka Łužiska jězorina Sakska“, zdźěli jednaćel zwjazka Daniel Just. W zašłych lětach su runje we wobłuku zakładneje turistiskeje infrastruktury mnoho inwestowali a tak zwiski polěpšili.

Budyšin/Chrósćicy (SN/MiR). Něhdźe 200 zajimcow je so za prěnju fachowu konferencu 2plus pod hesłom „Perspektiwy pytać“ přizjewiło. Ta wotměje so tule sobotu w Chróšćanskej Jednoće. Dalekubłanske zarjadowanje měri so wosebje na wučerjow kaž tež kubłarjow. Informacije móžeja woni po tym jako wšědny dźěłowy grat wužiwać.

Budyšin (SN). W Ludowym nakładnistwje Domowina je wušła nowa zběrka Benedikta Dyrlicha „Zlět zelenych wuchačkow“. Čitar namaka w njej lyriku a prozu serbskeho basnika a publicista. Dalšu powabliwosć zběrki wučinjeja ilustracije Drježdźanskeje wuměłče Fee Vogler. Dyrlich wotkrywa rjanosć a wjelebarbnosć žiwjenja. Zadobywaja so pak tež dajace sony. Wón wjedźe čitarja do Slepoho, Delan, Drježdźan a do dalokeho swěta.

Wot 11. oktobra přebywaše Smjerdźečanska rejwanska skupina zhromadnje z hudźbnikami na turneji w Indiskej. Dźensa připołdnju su so z New Delhija do Łužicy nawróćili.

Smjerdźaca/New Delhi (SN/JaW). Z njeličomnymi pisanymi zaćišćemi su so dźensa připołdnju čłonojo Serbskeje rejwanskeje skupiny Smjerdźaca a hudźbnicy Tomasz Nawka, Steffen Kostorž, Syman Handrik kaž tež Marta Hantušec a jeje bratr Jurij z indiskeho New Delhija do Łužicy nawróćili. To zdźěli dźensa čłon skupiny Stefan Cuška, kotryž bě so jako rejwar na jězbje wobdźělił.

Wot 11. oktobra běchu so rejwarki a rejwarjo kuklturneho ćělesa kaž tež hudźbnicy na mjezynarodnym folklornym a etniskim festiwalu w Indiskej wobdźělili. Woni zastupowachu tam Serbow a běchu tež wot Domowiny na njón delegowani. Serbscy kulturnicy běchu jedna z mnohich narodnych mjeńšinow z wšelakich krajow.

Budyšin (SN/MiR). Projekt Sołobiki, kotryž je spěwarka a hudźbna pedagogowka Tanja Donatec jako partnerka Serbskeho ludoweho ansambla koncipowała a hižo wjacore lěta wuspěšnje přewjedowława, so dale wjedźe. Ideja zhromadneho spěwanja wšelakich generacijow we wjacorych rěčach, mjez druhim serbsce, je wobstatk wosebiteho wuradźowanja. Cyłotna tema dwudnjoweho nadregionalneho zetkanja pjatk a sobotu w Budyskej Röhrscheidtowej bašće je kulturne kubłanje na wsach. Na wuradźowanju předstaja koncepciju modularizowaneho modeloweho předewzaća na wsach. Załožba uniwersity Hildesheim kaž tež Institut za kulturnu politiku stej nastupajo koncepcionelne planowanje nawjedowacej. Zapřijate do projekta su zwjazkowe kraje Braniborska, Hessenska a Sakska. Koncepcija ma so, podpěrana wot Zwjazka kaž tež Sakskeho kultusoweho ministerstwa, w běhu přichodnych třoch lět přesadźić. Wobdźělnicy chcedźa wo tym wuradźować, kak hodźa so hižo wobstejace abo nowe ideje optimalnje za wožiwjenje husto jenož mało wobydlenych kónčinow zwoprawdźić.

Berlin (dpa/SN). Zwjazkowe knježerstwo je dźensa wuhibki za miliardy eurow wobpřijace zrěčenje k wotstronjenju atomowych wotpadkow stajiło. Kabinet schwali naćisk, po kotrymž maja ener­gijowe koncerny Vattenfall, Eon, RWE a EnBW hač do lěta 2022 něhdźe 23,5 miliardow eurow statnemu fondsej přepokazać, kotryž ma składowanje jadrowych wotpadkow rjadować. Potom bychu koncerny wot dalšich kóštow za atomowe wotpadki wuswobodźene byli.

K ISS wotlećeli

Baikonur (dpa/SN). Třo kosmonawća su so dźensa na puć k mjezynarodnej swětnišćowej staciji ISS podali. Raketa typa Sojus wotleća rano z kazachskeho swětnišćoweho dwórnišća Baikonur. W njej staj ruskaj kosmonawtaj Sergej Ryškow a Andrej Borisenko kaž tež jeju kolega z USA, Robert Shane Kimbrough. Poprawom chcychu hižo 23. septembra wotlećeć. Techniskeho defekta dla pak dyrbjachu start přestorčić. Kosmonawća maja 155 dnjow w swětnišćowej staciji wostać.

Francoscy policisća protestuja