Z wudaća: štwórtk, 20 oktobera 2016

Zhibadło swojeho kolena zhubił je 16lětny młodostny při wobchadnym njezbožu ze swojim mopedom – a ma je mjeztym zaso wróćo. Policisća běchu za zhibadłom pytali a je na městnje njezboža w přirowje tež woprawdźe namakali. Do toho bě młody muž při jězbje na dźěło z mopedom do napřećo přijěduceho awta prasnył a so ćežko zranił. W chorowni zwěsćichu, zo zhibadło pobra­chuje. Te su mužej mjeztym zaso zasadźili. Šeflěkar njeje tajke něšto po swójskim wuprajenju hišće nihdy dožiwił.

Wo toaletowu papjeru prosyła je zakładna šula w španiskim Yepesu swojich šulerjow. Za to njeje w etaće pječa dosć pjenjez. Španiske medije wo tutym padźe mjeztym rozprawjeja, po tym zo běchu so rozhorjeni starši na nje wobroćili. Mjeztym je gmejna připowědźiła, zo kóšty za nuznikowu papjeru přewozmje.

Wojerecy (MFü/SN). Wuwićowy koncept města Wojerec bě hłowna tema wčerawšeje wobydlerskeje hodźiny frakcije Swobodnych wolerjow měšćanskeho parlamenta. Hłowny nastork bě wažny termin: Přichodny tydźeń chce měšćanska rada wobzamknyć, koncept měšćanskeho wuwića zjawnosći předpołožić. Tak maja wobydlerjo hišće raz składnosć, so intesiwnje z tym zaběrać. Dotal su w měsće wo wjacorych tajkich konceptach debatowali. Mjeztym knježi mjez wobydlerjemi wulka njejasnosć, hladajo na wulki spektrum namjetow.

Runje dwaj wobydlerjej běštaj wčerawše přeprošenje frakcije do jeje Wojerowskeho běrowa sćěhowałoj. Detlef Degner, kiž bě na minjenym forumje wo wuwiću města hižo naležnje sobu diskutował, pokaza wčera hišće raz na to, zo wusměrjeja so dotalne koncepty jenož na powšitkowne negatiwne wuwiće. „Čitam jenož wo dalšim wottorhanju bydlenjow“, wón rjekny. Tamny zajimc, Heinz Schmidt, bě zadźiwany, zo je wobdźělenje wobydlerjow faktisce zakónčene. Wón by sej dalše rozmołwy z ludźimi wo wuwiću města přał. Koncept, kiž nětko předleži, chcył wón „zasadnje wotpokazać“.

Kulturny konwent Hornja Łužica-Delnjošleska zestaja so z wokrjesneju radow Budyšin a Zhorjelc a z direktora Załožby za serbski lud kaž tež z mnohich poradźowacych čłonow. Z tym móže so nowy direktor hnydom gratu přimać. A to je Jan Budar na wčerawšim zeńdźenju w Połčnicy wjackróć činił. Wón jimaše so słowa, na serbske aspekty pokazujo. Tak w naležnosći nakupa zwukoweje a wobswětlenskeje techniki za Mortkowsku twjerdźiznu. Jan Budar pokaza na trěbnu podpěru. „Twjerdźizna wuwiwa so na wosebite zarjadnišćo za region. A SLA wotkrywa sej tam wosebite hrajnišćo.“ Tak hódnoći to tež Zhorjelski wokrjesny rada Bernd Lange (CDU). Přiwšěm, jasne dyrbi być, štó je próstwystajer. Jenož tak hodźi so prawje wotwažować. Tole zwěsćić je cyle lochko. Podłožki próstwystajerja měli na wuradźowanju předležeć, čemuž wčera po zdaću tak njebě. Milenka Rječcyna

W čěskim Liberecu bě hač do kónca septembra wustajeńca serbskeje narodneje drasty k wobłukej „Kwas we Łužicy“. Eksponaty pochadźachu z Róžeńčanskeho drastoweho fundusa. Sobuawtorka wustajeńcy Monika Cyžowa měješe interview z Liberecskej nowinu, kotryž je nětko­ w najnowšim wudaću měsačnika Česko-lužický věstník wozjewjeny. Knjeni Cyžowa w čěskej rěči powědaše, kak běchu spočatk 1990tych lět z natwarom fundusa započeli. Wustaji, zo serbscy młodostni a dźěći rady narodnu drastu noša, k tomu rejuja. Měnješe, „zo su skoro wšitcy Łužiscy Serbja muzikanća abo w někajkim ansamblu spěwaja“.

Wutrobne zbožopřeća z trójnej „Sławu“ k swojim šěsćdźesaćinam je Borbora Felberowa, wjelelětna nowinska rěčnica a wosobinska referentka předsydy Domowiny kaž tež předsydka Domowinskeje skupiny Komorow pola Rakec, dźensa w Budyšinje přijimała. Mjez gratulantami ze zarjada Domowiny, serbskich institucijow a towarstwow kaž tež medijowych partnerow, kotřiž dźakowachu so za spomóžne zhromadne dźěło, bě tež předsyda Maćicy Serbskeje Jurij Łušćanski. Foto: Janek Wowčer