Z wudaća: pjatk, 21 oktobera 2016

Budyšin (SN/at). Lětuše swójbne popoł­dnjo Budyskeje župy „Jan Arnošt Smoler“ wotměje so 12. nowembra w Rakečanskej Pawołskej šuli. Termin je chětro bliski. Tohodla njejsu čłonojo župneho předsydstwa na swojim wuradźowanju wčera w Budyskim Serbskim domje jenož dalše wjerški župneje dźěławosće hač do kónca lěta rozjimali, ale so dokładnišo z programom swójbneho popołdnja zaběrali. Kaž rěčnica Domowiny za Budysku kónčinu Sonja Hrjehorjowa zdźěli, budźe znowa wotměnjawy poskitk. Na přikład změja dźěći na jednotliwych stacijach składnosć, spěw nawuknyć, sej nawušniki paslić abo widejowu hru wo Krabaće dožiwić. Popołdnjo wuklinči, z klankodźiwadłowym kruchom.

Čłonojo župneho předsydstwa su tež wo projektach w pěstowarnjach a na zakładnych šulach rěčeli. Regionalna rěčnica měła z wšelakimi pěstowarnjemi kontakt nawjazać z tym, zo by tam bajki čitała. Nimo toho planowachu přitomni hižo adwentne zarjadowanje a dorěčachu sej prěnje ideje za klětuši dźěłowy plan.

Z 18. lětstotka pochadźaca kładźita cyrkej w Sprjowjach, najstarša cyłeje Łužicy, dóstanje tuchwilu nowu třěchu z drjewjanych šindźelow. Nimo toho chcedźa w twarjenju tež přećiwo drjewotočerjam (Holzwurm) zakročić. Přichodnu wutoru Drježdźanska firma přećiwo čerwam płun zasadźi. Do toho změja póndźelu wot 16 hodź. dźeń wotewrjeneje kapałki, hdźež budu so zajimcy wo planowanej naprawje informować móc. Foto: Joachim Rjela

Kak móhli město Wojerecy a wokolne gmejny přichodnje sylnišo hromadźe dźěłać, bě jenička tema wčerawšeho wurjadneho posedźenja Wojerowskeje měšćanskeje rady.

Wojerecy (AK/SN). Město Wojerecy trjeba sylne wokolne gmejny. A wokolne gmejny trjebaja sylne město Wojerecy. Tole je hłowne wuprajenje wčerawšeho wurjadneho posedźenja Wojerowskeje měšćanskeje rady. Frakcije SPD, CDU, Lěwicy a Swobodnych wolerjow běchu zhromadnje próstwu wo tajki termin stajili.­

Gmejnje přidatne srědki za wonkowne připrawy zapowědźili

Chrósćicy (JK/SN). Wšitko druhe hač spokojom běchu Chróšćanscy gmejnscy radźićeljo na swojej wčerawšej zhromadźiznje. Wulke brjušebolenje načini jim nowa, hakle njedawno wotewrjena pěstowarnja „Chróšćan kołć“. Zo bychu wonkowne wuhotowanje wokoło pěstowarnje k wotewrjenju dokónčić móhli a při tym za rostliny trěbne wjedrowe wobstejnosće wobkedźbowali, běchu so přidatnych srědkow nadźijejo rozsudźili, přepodać nadawk firmje z najpřijomnišim poskitkom. Tež tón pak ležeše nad planowanymi wudawkami. Tohodla zapoda gmejna próstwu wo přidatne 200 000 eurow, kotrež pak jej njepřizwolichu. Hakle wčera dóstachu to pisomnje zdźělene. Nětko ma gmejna hoberski problem. Wčera najprjedy raz oficialnje wobzamknychu, přepodać nadawk za wonkowne wuhotowanje, po tym zo běchu wjesnjanostu Marka Klimana (CDU) a radźićela Jana Wjeselu do toho społnomócnili, hladajo na počas nadawk wudać.

Zaso raz bě wčera popołdnju křižowanišćo pola Kamjeneje do směra na Wulku Dubrawu městnosć ćežkeho wobchadneho njezboža. Něhdźe w 14.30 hodź. zrazyštej tam wosobowej awće do so. Jedne z jězdźidłow zajědźe při tym na polo. Jeho ćežko zranjeneho wodźerja dyrbjachu wohnjowi wobornicy z ćežkej techniku wuswobodźić. Tež šoferka tamneho awta so zrani. Wobeju dowjezechu do chorownje. Něhdźe dwě hodźinje dóńdźe k wulkim wobchadnym poćežowanjam. Foto: Christian Essler

Štrus jenož kołp był

Ćisk. K njewšědnemu zasadźenju wołachu policiju wčera rano w Ćisku. Tam přizjewichu so sobudźěłaćerjo zawoda na Industrijnej hasy a měnjachu, zo běchu tam štrusa wuhladali. Jako wobsadka policajskeho awta přijědźe, wukopa so po­zdatny afriski ptak jako młody kołp, kiž bě tam po wšěm zdaću mylnje přizemił. Někajki strach znajmjeńša z tohole ptaka njewuchadźeše.

Dźěłowu rozprawu za minjenu wólbnu periodu 2013, 2014 a 2015 poda njedawno na wólbnej zhromadźiznje Njewotwisneho senioroweho zwjazka Budyskeho wokrjesa před 18 delegatami předsyda Ernst Brunner posledni raz. 83lětny chce po dźesać lětach čestnohamtsku funkciju złožić. Koncentrować chce so jenož hišće na 60 čłonow sylnu Njeswačansku skupinu, kotraž so tydźensce zetkawa. Byrnjež móžeše w rozprawje wjele pozitiwneho mjenować, je tola zludany, zo so falowacych pjenjez dla njeje móhło na twarjenju na Budyskej Löhrowej, hdźež ma seniorowy zwjazk swój domicil, nastupajo saněrowanja wjace zwoprawdźić. Annett Kluge poda wobšěrnu financnu rozprawu. W slědowacej diskusiji wuzběhny so wažnosć dźěła předsydstwa a přistajenych za seniorow a nuzne wabjenje nowych čłonow, dokelž je ličba zemrětych wulka. Jara pozitiwnje wu­zběhny so tež hižo dwaceći lět trajacy kontakt do čěskeho Jabloneca k tamnišej skupinje seniorow.

Chrósćicy. Na hejsowanje do Chróšćanskeje wjacezaměroweje hale „Jednota“ přeprošuje tamniši młodźinski klub pjatk a sobotu, 28. a 29. oktobra, młodostnych a wšěch tych, kotřiž so młodźi čuja abo su młodźi wostali. Pjatk budźe tam hołk a tołk za nad 30lětnych. Přeprosyli su sej k tomu jednu z najlěpšich partyjowych kapałow Sakskeje, a to skupinu Jolly Jumper z Hornjeje Łužicy, kotraž ma tež serbsku štučku w programje. Zastup za sydom eurow je wot 20 hodź., reje so w 21 hodź. započnu. Sobotu pak w „Jednoće“ mócnje šeri, dokelž wotměje so w Chrósćicach hižo tradicionala helloweenowa party. Wo dobru naladu staraja so wot 21 hodź. wjacori DJjojo. Zastup płaći kaž pjatk sydom eurow. Čłonojo młodźinskeho kluba so na hosći wjesela a so nadźijeja, zo młódši a starši hejsowarjo z bohatym wopytom jich prócu mytuja.

Předpředań za schadźowanku

Berlin (dpa/SN). Po lěta trajacych raznych diskusijach je zwjazkowy sejm dźensa z wjetšinu CDU/CSU a SPD krućiše prawidła za zwjazkowu tajnu słužbu BND schwalił. Nimo toho chcedźa přichodnje parlamentarisku kontrolu wšitkich tajnych słužbow kraja polěpšić. Tak ćehnje zwjazkowe knježerstwo konsekwency ze skandala wobčušlenja přez amerisku tajnu słužbu NSA a ze špionaže BND we wukraju. Opozicija nowy zakoń jako dospołnje njedosahacy wotpokazuje.

Za Schengenske poměry

Berlin (dpa/SN). Europska unija chcyła krok po kroku w Schengenskim rumje zaso pućowanje bjez mjezow zmóžnić. Tole zdźěli zwjazkowa kanclerka Angela Merkel (CDU) minjenu nóc w Brüsselu po zakónčenju wjerškoweho zetkanja EU. „Hdyž njejsu mjezy w dosahacej měrje škitane, dyrbja pomjezne kontrole móžne być“, wona zwurazni. Do toho bě Němska zhromadnje z druhimi krajemi tomu zadźěwała, zo so wjeršk jasnje přećiwo namjeznym kontrolam wupraji.

Pomocnicy w Aleppo čakaja

Badensko-württembergski wobchadny minister Winfried Hermann (Zeleni) je dźensa­ na dworje Stuttgartskeho noweho hrodu přihoty wosebiteho jubileja zahajił: Klětu woswjeća tam 200. róčnicu wunamakanja kolesa. Badenski lěsniski mišter Karl von Drais (1785–1851) bě so w lěću 1817 z tajkim samotwarjenym nastrojom – wotstorkujo so z nohomaj – na prěni kolesowanski wulět w stawiznach podał. Wón jědźeše z Mannheima do Schwetzingena. Foto: dpa/Marijan Murat