Z wudaća: pjatk, 02 decembera 2016

Budyšin (CS/SN). Zabawnu hodźinku su wopytowarjo poslednjeho literarneho wječora lěta wčera w Budyskej Smolerjec kniharni dožiwili. Berlinjanaj, kotrajž so 20 lět znajetaj, staj tudy nětko na přeprošenje Mětškec swójby prěni raz přećelam literatury wo swojim pytanju za korjenjemi słowow rozprawjałoj. A wčerawši wopytowarjo zhoichu tójšto noweho.

Mjeztym zo so Frank-Rainer Schurich w prěnim dźělu z rěču politiki rozestaješe, wobswětli Christian Stappenbeck w druhim dźělu zarjadowanja k wjeselu při­posłucharjow słowa, kotrež ze serbšćiny a druhich słowjanskich rěčow pochadźeja. Mnohe wopřijeća njejsu dźensa jako słowjanske požčonki hižo spóznajomne. Wězo bě Stappenbeckej wopyt hosćenca „Wjelbik“ dobra składnosć, wo pochadźe tohole słowa rozmyslować. Při tym wón zwěsći, zo bě w tym padźe němske wopřijeće „Gewölbe“ ze zakładom. Hinak je to pola „Kretscham“, wjesneho hosćenca, kotryž ma swój rěčny zakład w słowjanskej „korčmje“.

Z Merkel diskutować

Jena. Zwjazkowu kanclerku Angelu Merkel (CDU) wočakuja dźensa wječor w Jenje. Tam chce wona na regionalnej konferency z čłonami CDU Durinskeje, Sakskeje, Saksko-Anhaltskeje, Braniborskeje a Berlina wo aktualnych politiskich temach wuradźować. Při tym póńdźe tež wo politiku ćěkancam napřećo a wo rentu. Wočakuja sta wobdźělnikow, ale tež přećiwnych demonstrantow.

Hosćenc „Juwel“ wuznamjenjeny

Korzym. Hosćencej „Juwel“ w Korzymje su požadanu „hwězdu“ spožčili a dom zdobom do lisćiny wusahowacych gurmejowych hosćencow „Guide Michelin“ 2017 přiwzali. Dom z kuchinskim šefom Philippom Liebischom na čole je prěni počesćeny hosćenc w Sakskej, kotryž je zwonka wulkoměstow. Fachowcy wuznamjenichu 292 hosćencow kraja.

Wjace piwa eksportowali

Pod hesłom „Patoržicy blisko“ je Serbski ludowy ansambl wčera na adwentny koncert z mjezynarodnymi zynkami přeprosył. Zaklinčeli su twórby Detlefa Kobjele, Jana Cyža, Jana Bulanka a Bjarnata Krawca, ale tež pólske a jendźelske hodowne spěwy. Dalšej předstajeni tohole koncerta na žurli SLA w Budyšinje budźetej 18. a 23. decembra. Foto: SN/Maćij Bulank

Marko Wjeńka

Debata wo wjelkach je dobry přikład, kak móža emocije čłowjeka putać a wodźić a kak ćežko potom je, někoho z wěcownymi argumentami přeswědčić. Tež w našim wječorniku tajku diskusiju stajnje zaso mamy. Tydźenja wotmě so Budyšinje samo demonstracija z něhdźe 200 wobdźělnikami přećiwo wjelčemu managementej. Zas a zaso pisaja wjes­nja­nosća listy zamołwitym ministerstwam a žadaja sej hinašu politiku nastupajo wjelki.

Spytam sej předstajić, kak bych sam reagował, bych-li jako wowčer rano na pastwu přišoł a zwěsćić dyrbjał, zo su wjelki w nocy moje wowcy zakusali a zdźě­la zežrali. A što drje bych rjekł, bychu-li mi potom we wjelčim běrowje rozkładli, zo wjelk tajke něšto ze złeje wole nječini, ale zo jedna po swojim instinkće, kotryž jemu kaza swoje młodźata zežiwić. A naposledk bychu mi snano hišće wumjetowali, zo njejsym wowcy dosahajcy z płotom škitał.

Budyski Kamjentny dom koncept mobilneho dźěła předstajił

Budyšin (SN/BŠe). Rozestajenja na Budyskich Žitnych wikach žadaja sej spěšne jednanje. Kamjentny dom je koncept zdźěłał, kotryž su nětko na konferency pod hesłom „mobilne młodźinske dźěło w Budyšinje“ ze zastupjerjemi města, Kamjentneho­ domu, Budyskeje šulskeje social­neje słužby, ewangelsko-luther­skeje wosady Budyšin-Strowotna studnja a ewangelskeje wosady swj. Pětra (tiK), zwjazka Carity Hornja Łužica kaž tež wokrjesneho zwjazka Dźěłaćerskeho dobroćelstwa rozjimali.

Budyšin (SN/CoR). Lěto po tym zo je linguistka Sara Mičkec redakciju Rozhlada přewzała, chce wona wot klětušeho wuhotowanje serbskeho kulturneho časopisa změnić.

„Njeńdźe wo to, zwučene wobličo dospołnje na hłowu stajić a čitarjow wottrašić. Sym z wuhotowarku Aileen Burkhart, kotraž bě so hižo wo nowy layout Serbskich Nowin starała, wuradźowała. Zwěsćichmoj někotre dostatki, kotrež je wona z nowym naćiskom wurunała“, powěda šefredaktorka Rozhlada. Konkretnje potrjechja změny na přikład družinu a wulkosć pisma, rozrjadowanje stron kaž tež zasadźenje wobrazow.

Z nowym layoutom su zdobom techniske wuměnjenja za to date, zo hodźi so časopis přichodnje tež jako e-paper internetnje abonować. Na te wašnje budu wšitke přinoški inkluziwnje wobrazowy material tež online čitajomne. „Wobličo Rozhlada so jenož njewomłodźi, ale wotpowědujemy tež zwučenosćam tych, kotřiž medije radšo w digitalnej formje wužiwaja“, praji Sara Mičkec.

Na poslednjej Maćičnej akademiji lěta wčera wječor w Budyskim hosćencu „Wjelbik“ porěča Friedrich Pollack ze Serb­skeho instituta wo 300. narod­ninach Lipšćanskeho Serbskeho prědarskeho towarstwa Sorabija.

Budyšin (SN/CoR). Hižo z nadpisma wčerawšeje prezentacije bě wučitć, zo ma historikar Friedrich Pollack kruty wotpohlad, hišće njespokojace wědomostne slědźenje wo najstaršim serbskim zjednoćenstwje a snano tež najstaršim towarstwje scyła na nowu runinu pozbě­hnyć. Wšako steješe před 300. jubilejom w spinkomaj „něhdźe“. „Je to wunamakana tradicija, zo bu Sorabija 10. decembra 1716 załožena. Eksaktny datum njeje jasny, skerje jedna so wo załoženski proces, kotryž bě 1717 dokónčeny“, rozłoži ně­hdźe pjatnaće zajimcam z Kamjenca pochadźacy referent, kiž je runje swoje doktorske dźěło wo róli serbsko-protestantiskeho duchownstwa w zažnym nowowěku zapodał.