Z wudaća: srjeda, 18 januara 2017

Diesel kradnyli

Słona Boršć. We wulkim stilu diesel kradnyli su njeznaći w Słonej Boršći. Kaž tam zwěsćichu, běchu so njeznaći minjenej tydźenjej do tankoweho kontejnera zadobyli a z njeho kaž tež z nakładneho awta něhdźe 550 litrow ćěriwa wotklumpali. Škoda wučinja 620 eurow, nimo toho­ nasta 180 eurow wěcneje škody.

Wojerecy. Wosebity ptačokwasny projekt poskićitej swójbam Wojerowski hród a zwěrjenc 21. a 22. januara. Na hrodźe zhonja wopytowarjo zajimawostki wo tymle swjedźenju a jeho spěwach. Na wodźenju po zwěrjencu hosćom rozłoža, kak ptački woprawdźe kwasuja. Přizjewjenja pod

Stipendije za kurs čěšćiny

Budyšin. Za wobdźělenje na rěčnymaj kursomaj čěšćiny w Praze wot 28. julija do 25. awgusta a w Českich Budějovicach wot 21. awgusta do 8. septembra su stipendije k dispoziciji. Tute posrědkuje Rěčny centrum WITAJ. Nimo toho podpěruje studentow, kotřiž prócuja so wo studij­ w Čěskej. Zajimcy njech hač do 15. měrca w RCW swoje přizjewjenske podłožki wotedadźa (tel. 03591 550400, ). Dokładne informacije a přizjewjenske formulary su na internetnej stronje www.witaj-sprachzentrum.de přistupne.

24. september namjetowany

Berlin. Zwjazkowe knježerstwo CDU/CSU a SPD namjetuje 24. september jako termin wólbow zwjazkoweho sejma. Kabinet je dźensa wotpowědny naćisk nutřkowneho ministra Thomasa de Maizièreho (CDU) schwalił. Formelnje pak rozsudźi wo tym zwjazkowy prezident Joachim Gauck. Powšitkownje wočakuja, zo wón namjet knježerstwa sćěhuje.

Wulkoracija přećiwo cwólbje

Drježdźany. Z wulkoraciju je 600 policistow dźensa přećiwo mjezynarodnej cwólbje paduchow a potajerjow postu­powało. Při tym přepytachu 31 objektow w Drježdźanach, Lipsku a Halle. 15 Vietnamjanow a Georgičanow su zajeli. Woni běchu předewšěm žiwidła kradnyli, kotrež Vietnamjenjo w swojich wobchodach dale předawachu.

Greenpeace šwika koncern

Při tuchwilnych wjedrowych wobstejnosćach sněh derje rumowany

Budyšin/Radwor (SN/BŠe). Zymska słužba w Budyskim wokrjesu bě na zymu a na sněh jara derje přihotowana. Hižo zahe su zamołwići přihoty za zasadźenje zymskeje słužby zahajili. Tak su słužbne plany aktualizowali a składy ze sypanskej selu pjelnili. Techniku za zymsku słužbu su tohorunja přepruwowali a wudospołnili. Zdobom su sobudźěłaćerjo nadróžnych mištrownjow sčasom zymske płoty nastajeli, zo bychu puće před wjetšimi wějeńcami škitane byli. „Wšitke składy su derje pjelnjene. Spočatk zymy měješe wokrjes Budyšin 9 300 tonow sele k dispoziciji. Kóždy z minjenych třoch dnjow je zymska słužba něhdźe 300 tonow toho na puće sypała“, zdźěli nowinska rěčnica Budyskeho krajnoradneho zarjada Frances Lein.

Serbska přirada města Wojerec wojuje wo zachowanje stejnišća Handrija Zej­lerjoweje zakładneje šule Při Worjole na kromje města.

Wojerecy (AK/SN) Serbska přirada města Wojerec zhladuje na intensiwne lěto 2016, kaž jeje předsyda Dirk Nasdala podšmórnje. Ćežišća běchu mjez druhim Smolerjowe lěto, rěč spěchowace projekty za dźěći a młodostnych, koncept dołhodobneho zawěsćenja dwurěčneho popisanja wobchadnych taflow kaž tež bój wo zachowanje stejnišća Wojerowskeje Handrija Zejlerjoweje zakładneje šule. Přirada prócowaše so tež wo to, zawjesć pokazki stacijow we wokolnych busowych linijach tež w serbšćinje, kaž je w měšćanskim wobchadźe hižo maja. Zdobom skedźbnja gremij na serbskosć Čornochołmčanskeho Krababatoweho młyna a tam nastawaceho Jurja Brězanoweho domu. Serbskosć měła so při wuwiwanju cyłkowneho kompleksa dale wobkedźbować.

Ze spožčenjom Lessingoweho myta Swobodneho stata Sakskeje 2017 zaha­ja přichodnu sobotu 51. Kamjenske Lessingowe dny. Pod hesłom „Luther a Lessing – 500 lět reformacija“ poskića zajimcam wot 21. januara do 3. měrca dohromady pjatnaće wšelakich zarjadowanjow.

Kamjenc (SN/CoR). Wosobinsce zeznać móže zjawnosć lětušich lawreatow Lessingoweho myta – spisowaćelow Kurta Drawerta (hłowne myto), Annu Kaleri a Thomasa Freyera (spěchowanskej myće) – na tak mjenowanym narodninskim swjedźenju Lessinga njedźelu, 22. januara, dopołdnja w Kamjenskim měšćanskim dźiwadle. Hačrunjež njebudźe rozhłosowy sćelak MDR-Kultur mjeztym tradicionalnu rozmołwu z Michaelom Hametnerom live wusyłać, su znateho kulturnika přiwšěm za zarjadowanje zdobyć móhli.

Prěni raz je Lions-Club Budyšin wčera w tudyšim NSLDź Myto Kaeublera spožčił, a to pop-rockowej skupinje Silbermond. Tak njehódnoći jenož wuznam z Budyšina pochadźaceje band w Němskej, ale tež jeje towaršnostny angažement. Mjez druhim su so hudźbnicy přećiwo krótšenjam spěchowanskich srědkow Załožbje za serbski lud wuprajili, za zachowanje wobswěta a přećiwo hidźe na wukrajnikow. Z 5 000 eurami mytoweho pjenjeza chce Silbermond akciju towarstwa Cultures Interactive w Budyšinje pod­pěrać. Foto: SN/Maćij Bulank

Róžant (SN/JaW). Ze zjawnym listom je so gmejnska rada Ralbic-Róžanta móžneho powjetšenja Ralbičanskeje kormjernje swini na Budyskeho krajneho radu Michaela Hariga (CDU) wobroćiła. Z nim spytaja planowane rozšěrjenje zawoda wotwobarać. W spisu, kotryž Serbskim Nowinam předleži, mjenuja radźićeljo hišće raz swoje wobmyslenja. „Na teritoriju mamy hižo tři masowe plahowarnje skotu“, rěka w lisće, kotryž je 2. zastupowacy wjesnjanosta Michał Šołta (SWZ Delany) podpisał. Zdobom pokazuja na poćeženje smjerda dla. Tež přiběracej wobchad a poćežowanje wody z nitratom a z toho slědowacu špatnišu žiwjensku kwalitu tam tematizuja. Kaž w lisće dale rěka, je so zaćišć skrućił, zo je krajnoradny zarjad w naležnosći hižo rozsudźił, prjedy hač bě jednanje zakónčene. Tež fakt, zo je gmejna wjacore lěta najmłódša Sakskeje, móhł přez planowane rozšěrjenje kormjernje wohroženy być. Radźićeljo proša krajneho radu Hariga a zamołwite zarjady, powjetšenju kormjernje njepřihłosować a wolu wobydlerjow chutnje brać. Zjawny list gmejny je pod www.serbske-nowiny.de přistupny.

Zjawny list jako PDF

Berlin (dpa/SN). Cem Özdemir a Katrin Göring-Eckardt staj načolnaj kandidataj Zelenych k wólbam zwjazkoweho sejma. Wobaj politikarjej běštaj so wospjet za móžnu koaliciju Zelenych z CDU a CSU na zwjazkowej runinje wuprajiłoj. Göring-Eckardt dósta, byrnjež jako žona tak a tak nominowana, 70,63 procentow hłosow.­ Předsyda Cem Özdemir měješe z 35,96 procentami jara snadny předskok před Robertom Habeckom, kiž dósta jenož 75 hłosow mjenje. Lěwicar Anton Hofreiter nažnja 26,19 procentow.

Žněje kontrowersne reakcije

London (dpa/K/SN). Britiska premierka Theresa May je ze swojim připowědźenjom, kralestwo z europskich wikow wjesć, zbudźiła kontrowersne reakcije w kraju a we wukraju. Šefina šotiskeho knježerstwa Nicola Sturgeon pohrozy znowa z referendumom wo njewotwisnosći kraja. Z Brüssela a Berlina dósta May napominace hłosy. Wona wustupowaše w zasadnej narěči za dospołny łamk z Europskej uniju, bě pak za zrěčenje z EU wo swobodnym wikowanju.

Snowden wostanje w Ruskej

Strasbourg/Rom (dpa/K/SN). W štwórtym přeběhu je sej Europski parlament wčera z jednorej wjetšinu Italčana Antonija Tajanija za swojeho prezidenta wu- zwolił, na čož Italska wyska. Něhdyši ministerski prezident Silvio Berlusconi, kotrehož rěčnik bě Tajani swój čas był, zwurazni, zo jeho tale powěsć jako Italčana a šefa strony Forza Italia zwjesela a z hordosću napjelnja. Premier Paolo Gentiloni twitterowaše: „Prěni raz je Italčan prezident Europskeho parlamenta. Gratuluju Tajanijej.“ Wonkowny minister Angelino Alfano rěči wo „wulkotnej powěsći za Italsku a za europski lud“. Tajani bě jako kandidat Europskeje ludoweje strony šěsć kontrahentow wukałał.