Z wudaća: srjeda, 18 januara 2017

Berlin (dpa/K/SN). Měsacaj do kónca zastojnstwa je zwjazkowy prezident Joachim Gauck dźensa zastupnikow politiki, hospodarstwa, kultury a zjawnosće na hród Bellevue přeprosył. K rozžohnowanju jimaše so wón hišće raz słowa a so prašeše „Kajki napohlad ma wón měć, tón naš kraj.“ Při tym spinaše wobłuk k swojej nastupnej narěči 12. měrca 2012. Tehdy bě demokratiske wuwiće Němskeje hódnoćił a skrótka so hižo wěnował změnam towaršnosće z připućowanjom syłow migrantow. 12. februara wuzwoli Zwjazkowa zhromadźizna nowu hłowu stata, dokelž nochcyše Joachim Gauck za dalšu periodu zastojnstwa hižo kan­didować.

Zhorjelc (SN). Čłonojo dźěłarnistwa IG metal, kotřiž su w Zhorjelskim zawodźe Bombardiera přistajeni, diskutowachu wčera wo protestnych akcijach, zo bychu ćišć na nawodnistwo kanadiskeho koncerna wukonjeli. Tón bě kónc minjeneho lěta připowědźił, 5 000 dźěłowych městnow po cyłym swěće, mjez druhim tež w Zhorjelcu, wotstronić. „Hač do měrca chcemy z koncernom wo zawěsćenju produkciskeho stejnišća diskutować. Jeli njekooperuje, pokazamy jemu čerwjenu kartu“, podšmórny wčera šef IG metal wuchodneje Sakskeje Jan Otto.

Sobustawajo dźěłarnistwa tłóča na bórzomne rozrisanje. Wjacori jara dobri fachowcy pytaja hižo za druhim dźě­łowym městnom, štož njemóže sej zawod dowolić. Tohodla su sej přistajeni přezjedni, stawk dale rozšěrić.

Jutře chce so šef Němskeho zwjazka dźěłarnistwow Reiner Hoffmann w Budyskim zawodźe Bombardier wo aktualnym połoženju wobhonić.

Přichodni kubłarjo z fachowcom čile diskutowali

Budyšin (CK/SN). W decembru hakle bě němske knježerstwo zakoń wo inkluziji wobzamknyło. Kak ćežko drje budźe jón zwoprawdźić, bě wobsah přednoška w Budyskim powołanskošulskim centrumje. Što přesadźenje zakonja dokładnje woznamjenja, njeje hišće jasne, wšako je to wěc krajow, kaž Jurij Štrbenk zawče­rawšim wuswětli. Rodźeny Słowjenc je w swojej domiznje studował, jako hudźbny terapeut dźěłał a so na wjacorych studijach wobdźělił. Wot lěća 2015 nawjeduje wón hojenskopedagogiske a integratiwne dźěćace dnjowe přebywanišćo na Budyskej Daimlerowej z 20 sobudźěłaćerjemi, kotrež je w nošerstwje Hornjołužiskeje pomocy k žiwjenju a za swójby z.t. Diplomowy pedagoga za rehabilitaciju je eksperta a po słowach dr. Hubertusa Šenka ze Serbskeje fachoweje šule za socialnu pedagogiku „teoretikar a praktikar w jednej wosobje“. Jurij Štrbenk přednošowaše póndźelu w awli Budyskeho powołanskošulskeho centruma za hospodarstwo a techniku wo tym, što inkluzija za kubłarja woznamjenja.

K mjezynarodnemu dnjej joggingowych cholowow chce jedna z Mnichowskich kupnicow wšěm sekt wudać, kotřiž jutře w treningowych cholowach nakupować přińdu. Wabjenska akcija zbudźa wulki wothłós: Wjace hač 2 000 ludźi je připrajiło, zo přińdźe; 8 000 je w interneće swój zajim signalizowało. Poprawny dźeń joggingowych cholowow je sobotu. Kupnica pak chce tołkańcy zadźěwać, dokelž­ tam sobotu swójby nakupuja.

Konja z wodoweho basenka wuswobodźiła je wohnjowa wobora w Choćebuzu. Kóń bě wčera z pastwy w Depsku ćeknył a do poola skočił. 19 kameradow pool wuklumpa a namjeta do njeho słomjane walčki, po kotrychž móžeše skoćo skónčnje basenk zaso wopušćić. Wšón čas su wohnjowi wobornicy chribjet konja z ćopłej wodu wohrěwali. Wšako traješe akcija něhdźe tři hodźiny.

To je woprawdźe spodźiwne wuwiće, kotrež smy minjene lěta nastupajo alarmowanje wohnjowych wobornikow we wuchodnej Sakskej dožiwili a nětko znowa dožiwjamy. Před lětami mějachmy w Budyšinje, Zhorjelcu, Běłej Wodźe, Lubiju a dalšich městach wuchowanske dispatchernje, kotrež běchu kóžda za swój teritorij zamołwite. Poněčim pak je dźeń a bóle centralizowachu, tak zo nasta we Wojerecach wulka wuchowanska centrala, kotraž je mjeztym za wšu wuchodnu Saksku zamołwita. Dóńdźe-li pak na přikład k wulkemu njewjedru, kaž loni znajmjeńša dwójce, maja so decentralne škričkowanišća wutworić, potajkim mjeńše jednotki, kajkež podobne hižo mějachmy. A w nich skutkuja potom dobrowólni wobornicy,­ kotřiž při zasadźenjach wězo pobrachuja. Takle so statne zarjadnišćo swojej zamołwitosći wuwinje.

Marian Wjeńka

W Erftstadće pola Kölna wotewrěchu minjeny kónc tydźenja wustajeńcu, w kotrejž dokumentuja sćěhi wudobywanja brunicy. W kónčinje maja dwě wuhlowej jamje, Garzweiler a Hambach, kotrymajž dyrbjachu hižo tójšto wsow woprować. W tym zwisku su sej Budyskeho fotografa Jürgena Maćija přeprosyli, zo by ze swojimi fotami łužiski wid na ničenje krajiny přez brunicu přinošował. Na wotewrjenju wustajeńcy předstajichu tež knihu BRUNICA, kotraž je w LND wušła. Foto: Jürgen Maćij

Praha (ČŽ/K). Čěski prezident Miloš Zeman wuhotuje tež lětsa zaso na Praskim hrodźe hromadźe z mandźelskej Ivetu tradicionalny karitatiwny bal. Wosobny swjedźeń budźe pjatk, 20. januara, po zwučenym wašnju w Španiskej žurli a susodnych rumnosćach, informowaše rěčnik hłowy stata Jiří Ovčáček medije kraja. Za zastupny lisćik na ekskluziwne zarjadowanje dyrbi hósć 8 000 krónow płaćić. Z nim wšak je jeho wobsedźer awtoma­tisce na zboha „šćedriwej tomboli“ wobdźěleny, Ovčáček přispomni. Kajke nahladne myta su tónkróć wočakować, pak wón njepřeradźi. Loni su wopytowarjo bala móhli dobyć wječer z prezidentskim porom, wulět na olympiske hry do Rio de Janeira, lěto darmotneho wužiwanja Škody Fabia a dalše drohotne myta. Wwunošk bala dóstanje Zemanec załožba. Z njej prezident mjez druhim pomha Fondsej wohroženych dźěći, prěnja dama kraja ze swojeje strony podpěruje na přikład starownje.

Na balu, na kotryž wo­čakuja něhdźe 400 prominentnych, wustupja spěwarjo Petra Janů, solisća Petr Kolář, Janek Ledecký kaž tež Michal David.­