Přednošuje wo Africe
Lejno. Jan Nuk z Radworja přednošuje dźensa wječor w 19.30 hodź. w Lejnjanskim Kubicec hosćencu, a to wo swojich dožiwjenjach a nazhonjenjach w Africe. Čłonojo Zwjazka serbskich rjemjeslnikow a předewzaćelow kaž tež wšitcy dalši zajimcy su wutrobnje witani.
Socialne poradźowanje
Budyšin. Jutře, štwórtk, 20. apryla, přeprošuje zapósłanc Lěwicy Sakskeho krajneho sejma a Budyskeho wokrjesneho sejmika a prawiznik Hajko Kozel na socialne poradźowanje do wobydlerskeho běrowa Lěwicy w Budyšinje na Šulerskej dróze 10. Poradźowanje započnje so w 13.30 hodź. a je tež w serbskej rěči.
Dwójce w samsnej nocy so paliło
Porchow. Na dojězdźowanskim parkowanišću blisko Porchowa (na S 94) je so dźensa w nocy tam wotstajeny Ford dospołnje wupalił. Třinaće kameradow Porchowskeje wohnjoweje wobory woheń zhašachu a z wotpowědnym ješćom płomjenja podusychu. Awto bě tam dawno hižo wotstajene, samo jedne koleso falowaše. Policija z toho wuchadźa, zo je woheń něchtó zamiškrił.
Ledźborecy. Jenož něšto kilometrow zdalene paleše so dwě hodźinje pozdźišo w Ledźborecach (Taschendorf) drjewjana hromada při bróžni. 17 wohnjowych wobornikow z Hornjeho Wujězda, Wulkeho Wosyka a Panec je woheń sčasom zhašało a tak wjetšej škodźe zadźěwało.
Trjebinska gmejna móže napjateho financneho połoženja dla jenož mało inwestować. Tole podšmórny komornica Carmen Petrick hladajo na njedawno wobzamknjeny etat 2017/2018.
Trjebin (AK/SN). „W inwesticiskim planje steji něhdźe 20 000 eurow wudawkow. Naše naprawy su za Trjebinski kěrchow, nowu popjelnicowu připrawu pod štomami, w gmejnje trěbny defibrilator za prěnju pomoc a nakup hydrawliskeho hamora za Trjebinsku wohnjowu woboru“, Carmen Petrick rozłoži. „Wjace njemóžemy wokomiknje činić.“
Njezměnjene wostanu dotalne dawkowe sadźby. Ležownostny dawk wučinja tuchwilu za ratarske ležownosće a lěsy 307,5 procentnych dypkow. Ležownostny dawk za wobtwarjene a wobtwarjenske ležownosće leži pola 412,5 procentnych dypkow. Přemysłowy dawk wučinja 400 procentnych dykow. Wulke poćežowanje za Trjebinski hospodarski plan je wokrjesny wotedawk. Tak płaći gmejna Zhorjelskemu wokrjesej lětsa 156 000 eurow. Klětu je to hižo 165 000 eurow. We woběmaj lětomaj płaći komuna po wšěm zdaću přeco 15 000 eurow přemysłoweho wotedawka.
Budyšin (SN). Aktualnu delnjoserbsku inscenaciju Jurja Kocha „Sergej“, kotraž změje 21. apryla w Hochozy premjeru, móža sej zajimcy na zjawnej generalce w Budyšinje wobhladać, a to štwórtk, 20. apryla, w 19.30 hodź na probowym jewišću 2. Zastup je darmotny. Přihladowarjo njech wužiwaja jewišćowy zachod wulkeho domu NSLDź na Seminarskej.
Nowe pućowanske hěty
Bóšicy (SN). W Bóšičanskej gmejnje budu wosom nowych pućowanskich hětow nastajić. Kaž wjesnjanosta Stanij Ryćer (Rjemjesło Bóšicy) praji, je regionalne předewzaće hěty sponserowało. Prěnja hižo steji, tamne chcedźa hač do kónc meje nastajić. Tež stara wodarnja na Horje dóstanje nowe městno k podstajenju.
Hižo wjacore tydźenje je Torsten Gütschow šeftrenar regionalneho koparskeho ligista Budissy Budyšin. Po fazy zeznajomnjenja z mustwom a zamołwitymi kaž tež po prěnich dypkowych hrach, je so Hanspeter Benad z nim za Serbske Nowiny rozmołwjał.
Što sće pola Budissy jako prěnje činił, kajki bě Waš start?
T. Gütschow: Su mje tu w Budyšinje jara derje přiwzali. Kuriozne bě, zo sym w Babelsbergu hnydom na trenarskej ławce sedźał. Njejsym z mustwom do tuteje hry trenować móhł.
Z mustwomaj RB Lipsk II a FC Schönberg staj prěnjej zestupnikaj z regionalneje ligi wěstaj. Nětko je zachowanje klasy za cyłk Budissy Budyšin poměrnje wěsty.
T. Gütschow: Haj, wulki ćišć je najprjedy raz preč. Sym pak tu nastupił, zo wostanu jedne do dwě mustwje w tabulce za nami.
Na kotrych pozicijach trjeba Budissa zesylnjenja?
T. Gütschow: W nadběhu smy chětro njestrašni, ale tež na druhich pozicijach dyrbimy so zesylnić. Najlubšo by mi było, hdyž dóstanjemy wot zady hač doprědka 6 do 7 nowych hrajerjow.
Po tym zo přěhrachu mužojo ST Marijineje hwězdy spočatk sezony tójšto hrow, so w minjenym času poněčim zhrabachu. W póstnym času mějachu hnydom trójce hrajny dźeń. Wšitke poměrnje wuspěšnje zmištrowachu.
SJ Budyšin sewjer – ST Marijina hwězda 2:1 (25:18, 21:25, 15:6)
ST Marijina hwězda – MSV Budyšin 04 IV 2:0 (29:27, 25:23)
Spočatk měrca dyrbjachu klóšterscy hrajerjo do Budyšina. Přećiwo faworitej SJ Budyšin sewjer běše dobyće drje móžne, kaž hustohdy w tutej sezonje pak koncentracija w tie-breaku popušći. W prěnjej sadźbje so domjacy spěšnje wotsadźichu a ju tež zasłužbnje dobychu. Druha sadźba započa so runje nawopak. Hosćo Marijineje hwězdy mějachu lěpši start, worachu mało zmylkow a sadźbu tohorunja zasłužbnje dobychu. W tie-breaku wotedachu nimale wšitke dypki přez njezbožowne přiwzaća. Tuž njemóžachu hru scyła natwarić a strašnje dypkować.
Hač na poslednje městno bě žurla w hosćencu „Při torhošću“ w Dźěži (Diehsa) wobsadźena, jako powita hosći, mjez kotrymiž bě tež wjele Budyšanow, znaty sportowy reporter Marcel Reif. Dwě hodźinje wotmołwješe na prašenja moderatora Andreasa Lüpera, a to na šarmantne a lóštne wašnje. Marcel Reif poda dohlady za kulisy koparskeho reportera. Na kóncu sportoweho foruma bu Marcel Reif z wulkim přikleskom rozžohnowany. Po tym steješe něhdyši šefkomentator sćelaka SKY za někotre prašenja sportoweho reportera Serbskich Nowin Hanspetera Benady k dispoziciji.
Kak tomu, zo je tajki znaty a woblubowany sportowy reporter do małeje wsy, do Dźěže, přijěł?
M. Reif: Su mje tu to Dźěže přijomnje přeprosyli a přesdwědčili.
Sće kónčinu znał a snano hižo raz tu był?
M. Reif: Ně, sym prěni raz tu, kónčinu docyła njeznaju.
Što je so Wam najbóle lubiło?
M. Reif: Krajina, měr a přećelni ludźo.
Sće tu snano kulinarisku chłóšćenku namakał, kotraž je Wam wosebje słodźała?
Saratow (B/SN). Katolska cyrkej w Ruskej je po słowach noweho předsydy tamnišeje biskopskeje konferency dale na podpěru wukrajnych měšnikow pokazana. „Trjebamy duchownych a rjadnikow z krajow, hdźež njeje tajki wulki njedostatk měšnikow kaž pola nas“, prosy ze Sakskeje pochadźacy biskop Clemens Pickel. W jeho Saratowskim biskopstwje „Sankt Clemens“ na juhozapadźe Ruskeje je 90 procentow duchownych z wukraja, Pickel rozłožuje. Wón přewozmje 2. meje nawod episkopata a naslěduje dotalneho předsydu, Moskowskeho arcybiskopa, italskeho rjadniskeho duchowneho Paola Pezzija.
Kontakty do Pólskeje zesylnić
Zhorjelc (B/SN). Zhorjelske biskopstwo chce swoje zwiski do Pólskeje zesylnić. „Chcemy wšitko činić, zo bychmy wotpowědowali zawjazkej bamža Jana Pawoła II., być z mostytwarcom, rozjasni Zhorjelski biskop Wolfgang Ipolt. Biskop rjekny tole po wopyće susodneho pólskeho biskopstwa w Legnicy.
Biskop Feige k metodistam