Z wudaća: póndźela, 22 meje 2017

Podstupim/Budyšin (SN/JaW). Znowawobsadźenje městna direktora Budyskeho Serbskeho instituta so dale dliji. „Powołanske jednanje běži“, rjekny direktor Załožby za serbski lud Jan Budar na njedawnej nowinarskej konferency w Budyskim Serbskim domje. Po informacijach Budarja městno najzašo klětu 1. januara wobsadźa. Dotal předleži jeničke požadanje za nawodnistwo institucije.

Łaz (bn/SN). Składnostnje 20. posmjertnin wusahowaceho serbskeho komponista Jana Pawoła Nagela přeprosychu wčera­ Spěchowanske towarstwo Doma Zejlerja a Smolerja, Łazowska ewangelska cyrkej kaž tež Budyske hudźbne nakładnistwo ENA na přez Załožbu za serbski lud spěchowane wopominanske zarjadowanje do Łazowskeho Božeho domu. Farar Matthias Gnüchtel witaše něhdźe 60 zajimcow, mjez nimi swójbnych a kolegow Nagela, w „kolebce serbskeje kultury“, kaž wjes mjenowaše. Mjez druhim poda wón swójske dopomnjenki a wuzběhny „wjelelětnu serbsko-němsku měrliwu zhromadnosć“, kotraž měła swětej z přikładom być. Günter Wjenk ze spěchowanskeho towarstwa rysowaše dwurěčnje swój wosobinski poćah ke komponistej a jeho žiwjenski puć. Liana Bertók, jednaćelka nakładnistwa ENA a ini­cia­torka wčera prezentowaneje noweje cejdejki z twórbami Nagela, rozprawješe serbsce a němsce wo zwoprawdźenju projekta. Wona předstaji sobuskutkowacych, kotrychž jako „swojowólnych perfekcionistow“ wopisa, a poskići jim přiležnosć so słowa jimać.

Mejemjetanje bě jedyn z wjerškow 43. wjesneho swjedźenja w Němcach. Dźesać porow młodostnych rejwaše tam sobotu wokoło meje. Holcy běchu katolsku swjedźensku drastu woblečene. Při napřemoběhu pachołow bě Max Kollay najspěšniši a wuzwoli sej Emelie Zelderec za kralownu. Program wjesneho swjedźenja sobu wobohaćili su holcy a hólcy Wojerowskeje Zakładneje šule „Handrij Zejler“, kotřiž přednjesechu tohorunja serbske pěsnje a basnje. Foto: Ulrike Herzger

Na wjacorych městnach Hornjeje Łužicy su kónc tydźenja mejemjetanje swjećili. We Wotrowje činja to hižo wjacore lěta na swojim nowym sportnišću za wosadnej cyrkwju.

Wotrow (aha/SN). Mejemjetanje při přijomnym wjedrje sobotu nawječor bě wulkej ličbje wjesnjanow kaž tež wjacorym ze susodnych wsow přewšo rjane dožiwjenje. Na swjedźenskej łuce skićeše so jim spodobny wobraz, jako zarejwa dohromady 38 porow dźěći a młodostnych znate serbske rejki.

Nalětni koncert chóra Lipa na klóšterskej zahrodźe w 110. jubilejnym lěće

Pančicy-Kukow (CRM/SN). Z wjele lubosću k wěcy a zdobom ze zwučenej wustojnosću běše chór Lipa tež tónraz swój nalětni koncert na klóšterskej zahrodźe přihotował. Wčera popołdnju njewuhotowa jeno sam wulki dźěl programa, ale bě sej z dujerskej kapału Horjany zaso partnerow přeprosył. „Mjez chóristami pak je nětkole cyły rjad młodych maćerjow a nanow z małymi dźěćimi“, zwěsći wuměłska nawodnica Jadwiga Kaulfürstowa. Tak je naležnosć, zo so šwarna črjódka dźěći kaž tež wnučkow spěwarkow a spěwarjow počasu do chóroweho žiwjenja zapřijima. Wčera wuwabi prěni tajki pospyt respekt přihladowarstwa a wězo tež wjele wjesela wšěch wobdźělenych. Přetož hladajcy horda bě dźěćina Lipjanow, směć na wulkim jewišću pod nawodom „praweje“ dirigentki spěwčkaj přednjesć. Tež štyrjom hólcam je so solowy wustup derje poradźił.

Kamele wosrjedź města

Połčnica. Lědma swojim wočam wěrić chcychu wobydlerjo sobotu wječor w Połčnicy. W bydlenskej štwórći wuhladachu woni kamelej, a wonej sej tam woměrje łopjena štoma słodźeć daštej. Kaž so pozdźišo wukopa, běštej skoćeći z cirkusa ćeknyłoj, kotryž měješe w bliskosći swój stan natwarjeny. Sobudźěłaćerjo za štyrinohačomaj­ hižo pytachu a su jej do­sahnyli, prjedy hač přiwołani policajscy zastojnicy přijědźechu.

Njeswačidło (LR/SN). Składnostnje Mjezynarodneho dnja muzejow wotmě so wčera w Njeswačidle 13. muzejowy swjedźeń. Wo lěta 2004 załoženy domizniski muzej stara so skupina zajimcow tamnišeho Towarstwa přećelow domizny a kultury. Jich nawoda Arnd Lehmann móžeše wčera hižo 36. wosebitu wustajeńcu wotewrěć. Wona wopřijima něhdyšu medicinsku techniku. Widźeć su na přikład nastroj k měrjenju krejneho ćišća, wšelaki operaciski grat, utensilije za hladanje chorych a nastroj za terapiju z kislikom z lěta 1930. Wustajer Wolfgang Krusch z Drježdźan bě loni hród a park w Nje­swačidle wopytał a zwiski k tamnišemu domizniskemu muzejej nawjazał.

Oberlichtenau (AK/SN). Nowa trajna wustajeńca bibliskeje zahrody w Oberlich­tenauwje pola Połčnicy wěnuje so po­chadej, stawiznam, rozšěrjenju a skutkowanju biblije. „Wot Kanaana do Sakskeje – Expo testamente“ rěka jeje tema. Zběrka­ pochadźa wot Bonnskeho teologi a ­publicista Francoisa Traudischa. Wona wopřijima nimo chronologiskich informaciskich taflow tójšto napodobnjenjow antikskich namakankow, originalne rukopisy a wšelke modele. „Tale zběrka je jón­krótna. Wona bě zakład za mnohe wustajeńcy biblijow po wšej Němskej. Nětko wostanje original pola nas“, podšmórny iniciator bibliskeje zahrody Maik Förster sobotu na wotewrjenju. „Pře­hladka naše wobsahi wudospołnja a wobohaća.“

Brüssel (dpa/SN). Němska z tym liči, zo budu jednanja z Wulkej Britaniskej wo wustupje kraja z EU přewšo wobćežne. Poprawom móžetej wobě stronje jeno přěhrać, rjekny statny minister za europske naležnosće Michael Roth dźensa w Brüsselu. Njeńdźe wo to, Wulku Britanisku za dźělenje wot EU chłostać, wón rjekny. Wažne je, zo ma 27 zbywacych krajow EU zhromadne měnjenje.

Start rakety wobkrućili

Seoul (dpa/SN). Kaž Sewjerna Koreja wobkruća, bě najnowši start rakety „perfektny“. Mócnar Kim Jong Un je mjeztym přikazał, serijowu produkciju rakety zahajić a brónjowy system nastajić. Raketa je pječa kmana, atomowe brónje nosyć a teritorij USA docpěć. Po informacijach Južneje Koreje je Sewjerna Koreja wčera raketu startowała, kotraž zamóže wja­core sta kilometrow daloko lećeć. Rezo­lucija Bjezstrašnostneje rady UNO tajke raketowe pospyty zakazuje.

Madźarojo demonstrowali

Jerusalem (dpa/K/SN). Wopytawši Sawdi-Arabsku, hdźež bě prezident USA w Riadźe na wjeršku 50 statnikow islamskich statow wabił za jich skutkowniše wobdźělenje na boju přećiwo mjezynarodnemu terorizmej a monarchiji, brónje za miliardy dolarow předał, je Donald Trump dźensa na swojim prěnim wo­pyće Israela. Tam chce wón wožiwić tři lěta chromjacy měrowy proces mjez Israelom­ a Palestinu. Docpěć chce to z rozmołwami z israelskim premierom Benjaminom Natanjahuwom a prezidentom Palestinjanow Mahmudom Abbasom. Israelski wěstotny kabinet bě krótko do Trumpoweje wizity schwalił rjad wolóženjow za Palestinjanow, kaž twarske dowolnosće za nich w Kraju zapadnje Jordana. Hraničny přechod Allenby k Jordaniskej ma cyły dźeń wotewrjeny być.