Turin/Berlin (dpa/SN). Ministrojo za klimu, energiju a wobswět wodźacych zapadnych industrijnych narodow, su so na zeńdźenju G7 w Italskej na zakónčenje zdobywanja energije z brunicy hač do lěta 2035 dojednali. To piše zwjazkowe ho­spodarske ministerstwo wčera wječor w nowinskej zdźělence. Němska je so rozsudnje za tajke dojednanje z jasnym da­tumom zakónčenja zasadźowała.

W lěće 2020 je so zwjazkowe knježerstwo na zakónčenje zdobywanja energije z brunicy zakonsce hač do lěta 2038 zawjazało. Amplowa koalicija je so 2021 na to dojednała, zo zakónčenje „po móžnosći“ hižo 2030 zwoprawdźi. Za brunicowy rewěr w Sewjerorynsko-Westfalskej je tutón termin jasny. W brunicowych kónčinach wuchodnych zwjazkowych krajow je wjetšich wobmyslenjow hladajo na zakónčenje do lěta 2038.

Hladajo na to, zo na lońšej klimowej konferency UN podobny wuslědk móžny njeběše, wopisa britiski statny sekretar za energiju Andrew Bowie dojednanje jako „historiske“.

Woprašowanje wujewja dwěle ludźi na lěpšinach elektriskeje mobility

Mnichow (dpa/SN). Špatne powěsće za elektromobilitu: Dale a mjenje wobydlerjow Němskeje ma wotpohlad, sej přichodny króć elektroawto kupić. Jenož 17 procentow by tole hišće chcyło, institut Allensbach zwěsća, kiž bě naprašo­wanje w nadawku Němskeje akademije techniskich wědomosćow přewjedł. Lěta 2021 bě jich hišće 24 procentow. Wuslědki su wčera wozjewili. Jedna z přičinow móhła po měnjenju instituta pobrachowaca abo špatna informacija być.

Mjez ludźimi su wulke problemy akceptancy, rjekny Renate Köcher wot Allensbachskeho instituta. Dźěle wobydlerstwa wobhladuja elektromobilitu jara skeptisce. Najwažniše dypki kritiki su wysoke kóšty, starosće snadneje distancy dla a dwěle, zo su elektroawta woprawdźe wobswětej přichilene. „Cyłkownje je widźomne, zo su wobmyslenja chětro stabilne. Jenož dźěl ludźi je změnu techniki na tutym polu minjene lěta zro­zumił.“

Młodźi ludźo so často lochce nimaja. Tež na wčerawšej debaće w Maastrichće bě mi sčasami tróšku žel, jako widźach, kak ­dyrbješe so Maylis Roßberg prócować, zo bychu druzy kandidaća ju na wědomje brali. Při tym pak běchu jeje argumenty dosć dobre: Angažement za mjeńšiny, za klimu, za zhromadnu Europu. Tež fachowje měješe wona častohdy runje telko knowhowa kaž koleginy a kolegojo druhich stronow. Na čim je potajkim klacało? Pola Roßberg snadź na starobje, pola druhich kandidatow pak na respekće. Młoda žona bě zmužite wuznaće za Europu wotedała, bě awtentiska. Tole by sebi wot druhich politikarjow na podiju tež přał. Wosebje amtěrowaca prezidentka komisije EU, Ursula von der Leyen, běše w swojim wustupowanju tajka, kajkež sym to wot dołholětnych politikarjow zwučeny: Zymna, wotpokazowaca, někak přehładka. Přeju sej w přichodźe politikarjow, kotřiž su skerje kaž Maylin Roßberg: cyle jednorje čłowjesce. Maximilian Gruber

Berlin (dpa/SN). Załožer awtotwarca ­Tesla Elon Musk njeje so po přeprošenju předsydki AfD Alice Weidel na rozmołwu wo aktualnym politiskim wuwiću w Němskej hišće přizjewił. Tole je rěčnik Weidel na naprašowanje medijow zdźělił. Stronska a frakciska předsydka AfD bě Muska do swojeho běrowa w Berlinje přeprosyła, ručež ma Musk chwile. Tam chce wona z nim wo podawku w Hamburgu diskutować, dokelž jedna so po jeje słowach wo „tójšto znjeměrnjowacych podawkach“, wona internetnje piše.

Weidel poćahowaše so na internetnu powěsć, w kotrejž reagowaše Musk na kónctydźensku wot islamistow organizowanu demonstraciju w Hamburgu z wjace hač tysac wobdźělnikami. Namołwjeć, knježerstwo powalić, je zawěsće tež w Němskej ilegalne, Musk wo demonstra­ciji rjekny, na kotrejž žadachu sej wobdźělnicy mjez druhim załoženje kalifata w Němskej. Demonstracija bě wjele kri­tiki zbudźiła. Politikarjo žadaja sej razniše postupowanje. Wulkopósłanc zjednoćenych arabskich emiratow w Němskej piše: „Njepředstajomne: To su ludźo, kotřiž su w Němskej nowu domiznu našli.“