Drježdźany (dpa/SN). Po wjace hač dwěmaj lětomaj z wobmjezowanjemi zhladuje sakska turistiska branša pozitiwnje do přichoda. Něhdźe 5,9 milionow ludźi je lětsa hač do oktobra swobodny stat wopytało, zdźěli wčera krajny turistiski zwjazk. Tole je plus 57 procentow porno samsnemu časej loni. Přiwšěm je ličba niša hač lěta 2019, štož bě do pandemije.

Přidatnje k wobmjezowanjam je so ruski nadpad na Ukrainu w branši wuskutkował, wuswětli prezident krajneho zwjazka Jörg Markert. Tež pandemija je hłuboke slědy zawostajiła a problemy branše, k čemuž słušeja pobrachowacy fachowcy, přiwótřiła. „Sćěhi dyrbja turistiske předewzaća kaž tež přez komuny a towarstwa zmištrować“, wón wuswětli.

Předewšěm měsac julij bě za branšu zwjeselacy. Tak su swjatki podobnje wjele ludźi na wopyt do swobodneho stata přišli­ kaž w lěće 2019. „Po wjace hač dwěmaj lětomaj pandemije so turistiska branša pomału zaso zhraba“, Markert podšmórny.

Přirodoškitny wulkoprojekt Łužiska jězorina ze swojimi nimale 6 000 hektarami skića z jónkrótnymi ekosystemami zakład za mnohe družiny zwěrjatow a rostlin. Powšitkownowužitna towaršnosć Łužiska jězorina zwr je za regionalnu přirodoškitnu kónčinu zamołwita. Ta je přeco zaso cil ludźi, kiž wobswět zanjerodźeja. Tež negatiwna bilanca, štož wodu nastupa, přinjese problemy ze sobu. Z jednaćelom dr. Alexanderom Harterom je so Silke Richter rozmołwjała.

Knježe Dr. Hartero, ilegalne woženje wotpadkow do přirodoškitneho areala přeco zaso wobkedźbujemy.

Hdyž dźensa wječor Budyske Wjacławske wiki kónča, je zdobom Lothar Noack posledni raz na tutym podawku přitomny. Ze smějacym a płakacym wóčkom rozžohnuje so wón ze swojimi Budyskimi kupcami, kotřiž běchu jemu wot lěta 1991 swěrni.

Lothar Noack njeje wšitke lěta jenož budku na Wjacławskich wikach měł. Wón je swoje nohajcowe twory zdobom kóždy štwórtk na tudyšich tydźenskich wikach předawał. W januarje swjeći 70. narodniny a poda so na wuměnk. Tróšku to jeho styskny. Wšako je rady do Budyšina přijěł, atmosfera tu je so jemu wosebje lubiła. Lothar Noack móže to derje přirunować, wšako běše tež na druhich tydźenskich wikach ze swojim sortimentom zastupjeny.

Drježdźany (dpa/SN). Swobodny stat Sakska chce přichodne lěta 600 milionow eurow za spěchowanje technologijow nałožować. „Dźakowano europskim a sakskim spěchowanskim srědkam je Sakska na spěchowanje techologijow přichodne lěta derje nastajena“, rjekny hospodarski minister Martin Dulig (SPD) wčera w Drježdźanach poćahujo so na wobzamknjenje kabineta wutoru. 503 miliony eurow su z Europskeho fondsa za regionalne wuwiće, zbytnu sumu płaći swobodny stat. Pjenjezy chcedźa hač do kónca 2027 přewostajić. Kaž ministerstwo zdźěla, zwyša maksimalnu přiražku na předewzaće wot 20 000 eurow na 40 000 eurow.

Wobrot wo štwórćinu postupił

Kamjenc (dpa/SN). Producenća zežiwidłow a picy kaž tež napojow w Sakskej su w prěnich dźesać měsacach lěta porno samsnej dobje 2021 wyši wobrot docpěli. Wjace hač 80 zawodow w swobodnym staće z nimale 13 500 sobudźěłacymi je 4,9 miliardow eurow nahospodariło, kaž je Statistiski krajny zarjad w Kamjencu wčera wozjewił. To je štwórćina wjace hač loni w samsnej dobje. Nimale pjećina cyłkowneho wobrota pochadźa z wikowanja z wukrajom.