Serbscy gymnaziasća wuspěšni byli
Wostrowc (JŠt). Na lětušej 6. sakskej bohemiadźe běchu šulerjo Budyskeho Serbskeho gymnazija wospjet wuspěšni. Ella Lois Schulze a Johana Hadankec wobsadźištej wobě 1. městno. Jakub Mark wubědźi sej druhe a Elias Kummer 3. městno.
Na bohemiadźe wobdźěleja so šulerjo 6. lětnika, kotřiž čěšćinu wuknu. Kónc septembra dopokazachu woni swoje kmanosće we Wostrowskim (Ostritz) zetkawanskim centrumje Marijiny doł. Konkurenca mjez wobdźělnikami běše wulka. Zastopnjowani běchu woni na zakładźe Europskeho referencneho ramika za rěče do jednotliwych skupin. W hódnoćenskich skupinach wot A1 do B1+ wubědźowachu so najlěpši čěšćinarjo z 53 šulow. Nimo Serbskeho gymnazija Budyšin běchu woni ze sydom dalšich kubłanišćow Sakskeje.
Holcy a hólcy mějachu pisomne (tekst a tekstowe nadawki) a ertne (dialog a zhotowjenje prezentacije) pruwowanje złožić. Dialog přewjedźechu zhromadnje z maćernorěčnymi šulerjemi-dźewjatkarjemi z čěskeho Turnova. Wječor nazwučowachu zhromadnje čěski spěw „Byl jeden pán“, kotryž sta so z hymnu lětušeje bohemiady, a zanjesechu jón k zakónčenju wubědźowanja.
Serbšćinu wuknjacy šulerjo na slědach Ćišinskeho
Pančicy-Kukow (SN/MiR). Z basnjomaj „W Lipju“ abo „Lećće z časom“ a dalšimi Jakuba Barta-Ćišinskeho zaběrachu so šulerjo 9. a 10. lětnika. „Zapřijeli smy šulerjow ze serbskich a serbšćinu wuwučowacych šulow Hornjeje Łužicy“, rjekny regionalna rěčnica Domowiny za Kamjensku župu „Michał Hórnik“ Katharina Jurkowa. Jako posledni we wobłuku štyri dny trajaceho projekta wobdźělichu so srjedu šulerjo-serbšćinarjo wyšich šulow „Korla Awgust Kocor“ Kulow, „Dr. Marja Grólmusec“ Radwor a „Dr. Marja Grólmusec“ Slepo. Na pjeć stacijach su sobudźěłaćerjo Kamjenskeje a dalšich župow kaž tež Rěčneho centruma WITAJ młodostnym basnika zbližili. Poboku běchu jim studenća a přichodni studenća wučerstwa. Pomhałoj běštej iniciatoram fachowej poradźowarce za serbšćinu Katka Bukowa a Milenka Ertelowa. Tak móžachu jednotliwe stacije, přiměrjene rěčnym kmanosćam šulerjow, přihotować a přewjesć. Wjetšina młodostnych, tež hdyž serbšćinu jako cuzu rěč wuknu, zrozumichu jadrowe wuprajenja, kotrež jim přewodnicy na stacijach posrědkowachu.
Šulerjo swoju prěničku zestajeli
Na dotalnych nadawkach dale dźěłać
Z rozprawu poda předsydka Serbskeho šulskeho towarstwa Ludmila Budarjowa na lětušej hłownej zhromadźiznje sobotu w Budyšinje dohlad do dźěławosće SŠT a do přichodnych nadawkow.
Nowinka z RCW
Budyska Serbska zakładna šula swjeći jubilej
Budyšin (SN/MiR). Budyska Serbska zakładna šula swjeći w tymle tydźenju wosebity jubilej. Před dźesać lětami běchu z Budyskeho Třělnišća do Serbskeho šulskeho a zetkawanskeho centruma na Friedricha-Listowej přećahnyli. Zdobom je tomu 20 lět, zo pěstuje kubłanišćo partnerstwo ze zakładnej šulu w Jablonecu nad Nisou. Spominaja dale tež na 70lětnu róčnicu załoženja Serbskeje wyšeje šule w Budyšinje. To wšitko bě přičina přihotować a přewjesć „Swjedźeń na šulskim dworje“. „Tónle cyłotydźenski podawk je wažny za skrućenje socialneho cyłka na šuli a wobohaća zhromadne dožiwjenja šulerjow a wučerjow zwonka wučby. Zdobom je to dobra přiležnosć styki słowjanskim přećelam pohłubšić“, rjekny šulska nawodnica Annette Natušowa. Póndźelu je Achim Lipič ze šulerjemi t-shirty z napisom Serbska zakładna šula Budyšin a lipowym łopješkom poćišćał. Wutoru su dźěći 1. a 2. lětnika po Humboldtowym haju pućowali. Šulerjo 3. a 4. lětnika wopytachu wšitke městnosće, na kotrychž je Budyska serbska šula wot załoženja sem wuwučowała. Dźensa a jutře wobdźěla so wšitcy na sportowym swjedźenju resp.
Čuja so doma a z kliniku zwjazani
Na medicinskej powołanskej fachowej šuli Łužiskeho jězorinoweho klinikuma bě lětsa 17 šulerjow swoje wuswědčenje dóstało. Wot 2. septembra maja tam 26 nowych wučomnikow.
Wojerecy (SN/mwe). Absolwenća móža so nětko pruwowani strowotniscy a hladarjo chorych mjenować a so tuž na swój wšědny powołanski dźeń nastaja. Šulske wjednistwo, nawodźa praksow, hladanska direktorka kaž tež medicinski direktor domu jim wutrobnje k tomu gratuluja. Zdobom so něhdyšim wučomnikam za jich angažement we wobłuku wšelakich projektow w praktiskim wukubłanju dźakuja. Pjatnaće absolwentow je dźěłowy poskitk Wojerowskeje kliniki přiwzało a wostanu tak domej swěrni.
Byrnjež maćeršćina medicinskeho personala z kriterijom přistajenja njebyła, sej we Wojerecach česća, zo tam chorobne sotry a dalši tež serbsce rěča. Po wuprajenju šule je mjez nowymi hladarkami młoda Serbowka.
Mjez sobu so zeznali
Serbske šulske towarstwo na swjedźeń sporta a zabawy prosyło
Hórki (SN/MiR). W Choćebuzu bě bus hižo rano napoł wosmich wotjěł. Dźěći ze Žylowskeho dnjoweho přebywanišća „Mato Rizo“ a Choćebuskeje „Wile Kunterbunt“ wužichu tuž składnosć, hišće połdra hodźinki w busu drěmać. Hakle w dźewjećich dźě dyrbjachu njedaloko Hórkow z njeho zaso wulězć.
Próca so wudaniła
Rěčny kurs kubłarki a dalšich zajimcow pozbudźa
Čorny Chołmc (AK/SN). „Nad myjnicu wisa špihel“, Ruth Brězanowa pomału a jasnje serbsce čita. W Čornochołmčanskim Frenclowym domje nawjeduje Kulowska wučerka na wuměnku kurs serbšćiny za kubłarki a dalšich zajimcow. Na zašłym zetkanju zaběrachu so wobdźělnicy z rumnosćemi w bydlenju.
