Ze 4. Serbskej debatu we Wojerecach rjad lětsa zakónčili – prašenjow je nadal mnohich a wotmołwow hišće wjac

Prolog

Žurla „Vis-à-vis“ we Wojerecach. Rynki stólcow so pomału pjelnja. Wotboka přišeptnje mi něchtó: „Dźensa je najmjenje ludźi přišło.“ Něhdźe 40 jich přiwšěm je, 30 ludźi so přez livestream wobdźěla. Hladaja wćipnje na podij, za kotrymž je na sćěnowinje widźeć: 4. Serbska debata. Tema dźensa: Štó zastupuje serbski lud? Přichod politiskeje participacije.

Participacija, što da to nětko zaso je? Mały ekskurs: za cuzym słowom chowa so jako serbski přełožk wobdźělenje abo tež sobupostajowanje. Debata ma potajkim wuslědźić, štó móhł serbski ludźik w přichodźe na parkeće wulkeje politiki zastupować.

Budyšin (SN/MiR). Słowje „napjatosć“ a „wjeselo“ wopisujetej začuća wobdźělnikow a wopytowarjow zarjadowanja w Budyskej Smolerjec kniharni minjenu sobotu najlěpje. Rěčny centrum WITAJ je na swoje mjeztym 20. čitanske wubědźo­wanje šulerjow 3. lětnikow ze serbskich a serbšćinu wuwučowacych zakładnych šulow přeprosyło. Najlěpši šěsnaćo sedźachu mjez swojimi towaršemi a towarškami, staršimi a přiwuznymi a radowachu so nad motiwaciju, kotruž jim nawodnica RCW dr. Beata Brězanowa posrědkowaše. Předsydka jury a wotrjadnica RCW Manuela Smolina předstaji jury, w kotrejž ­nimo njeje Sylwija Wjeńcyna (wučerka w Pančicach-Kukowje), Edit Mrózec (wučerka w Kulowje), Janina Mikławškowa (lektorka w Ludowym nakładnistwje Domowina) a Rejzka Wjeńcyna (dobyćerka prěnjeho wubědźowanja w lěće 2004) ­sobu skutkowachu. Na wšitkich wubědźowanjach je dohromady wjace hač 320 dźěći z 92 swojich najlubšich serbskorěčnych dźěćacych knihow čitało. Faworića běchu titule „Wroblik Frido“, „Knot Knut“ a „Bur Žur“ kaž tež „Pućowanje małeho pampucha“.

Wjace hač dwaceći šulerjow 12. lětnika Budyskeho Serbskeho gymnazija je dźensa dopołdnja swoje pruwowanje w předmjeće stawizny w serbskej abo w němskej rěči pisało. Šulski nawoda René Wjacławk je młodostnym wotběh rozłožił a jim wulki wuspěch přał. Jutře wotměje so pruwowanje w předmjeće biologija, 23. apryla w matematice. Dźeń pozdźišo maja šulerjo w chemiji posledni pruwowanski termin za přirodowědne předmjety. Dnja 25. apryla pisaja maturanća poslednjej pisomnej pruwowani w němčinje a w serbšćinje. Foto: SN/Bojan Benić

Na Worklečanskej wyšej šuli chcedźa poměr wuknjacych k njej skrućić

Hórnikowe dny na Worklečanskej wyšej šuli su šulerjow, wučerjow a referentow krótko do jutrow do wosebiteho cyłka zjednoćili. Milenka Rječcyna je so ze šulskej nawodnicu Dianu Šołćinu rozmołwjała.

Šulerjo Michała Hórnika zasadnje znaja. Wón je w běhu kóždeho šulskeho lěta na wšelake wašnje tema wuwučowanja. Z kotreje­ přičiny sće tajke dny wuhoto­wali?

D. Šołćina: Tale tema je so za šulske lěto poskićiła, dokelž mamy 190. posmjertne narodniny a 130. posmjertniny Hórnika. A naša šula lětsa jeho mjeno 30 lět nosy. Tuž smy ideju zrodźili, zo tute lěto „Hórnikowe lěto“ pomjenujemy. Tuž su so wšitke dźěłarnički projektnych dnjow wokoło Michała Hórnika wjerćeli. Spočatk šulskeho lěta smy 1. septembra při pomniku Hórnika na jeho posmjertne narodniny spominali.

Z kotrych poskitkow sće na Hórnikowych dnjach čerpali?