Jednohłósnje na dobro „2plus“
Radwor (SN/MkWj). Gmejnska rada w Radworju je so wčera wječor jednohłósnje za zachowanje serbskeje wučby po modelu „2plus“ w swojej dotalnej formje w Radworskej šuli wuprajiła. W njezjawnym dźělu wčerawšeho posedźenja gmejnskeje rady hłosowachu radźićeljo za pokročowanje dotalneho dwurěčneho koncepta. Hladajo na wobstejace problemy, kotrež tuchwilu tež w medijach diskutuja, běchu sej woleni zastupnicy wěsći, zo rozrisanja potrěbnosćam přiměrja. Wjesnjanostka Madelaine Rynčowa je připowědźiła, zo chcyła so z listom na politisce zamołwitych wobroćić a sej dalewjedźenje „2plus“ žadać.
Gmejnski radźićel Tomaš Rječka, kiž Radworsku gmejnu jako nošerja tamnišeho kubłanišća w šulskej konferency zastupuje, zdźěli Serbskim Nowinam wuraznje, zo steja radźićeljo jednohłósnje za wažnym dwurěčnym kubłanišćom. Dnjowy dypk „Pozicija gmejny k modelej 2plus w Radworskej šuli“ běchu na spočatku wčerawšeho posedźenja z dnjoweho porjada wzali a do njezjawneho dźěla přestorčili. SN wčera wo problemje rozprawjachu.
Swjeća 65. jubilej załoženja kubłanišća
Worklecy (SN/MiR). Worklečanske dźěćace dnjowe přebywanišćo „K wódnemu mužej“, kotrež je w nošerstwje gmejny, swjeći tónle tydźeń 65. jubilej swojeho załoženja. „Hižo w lěće 1942 běchu we wsy pola Neterjec prěnje přebywanišćo za dźěći załožili. Tehdy je Liza Šubertowa pjerachow hladała“, wě wjelelětna kubłarka Mónika Lejnartowa, kotraž so rady ze stawiznami kubłanišća zaběra. Dźensa stara so 19 kubłarkow a dwaj kubłarjej wo dźěći wot jednoho do dźesać lět.
W lěće 1956 su na Čórlichec statoku žnjensku pěstowarnju zarjadowali. 1960, štyri lěta pozdźišo pak wotewrě pěstowarnja na Hłownej dróze 48 tam, hdźež tež dźensa dźěći wšědnje přebywaja, swoje durje. Po wulkim přetwarje w lěće 1993 a rozšěrjenju twara w lěće 2009 maja dosć městnow a dobre wuměnjenja. To wšitko su ze stajnym angažementom wobydlerjow a gmejnskich radźićelow na dobro dźěći zdokonjeli. Tež na to chcedźa jutře spominać.
Wjace hač 300 eurow popłatka za studentow
Drježdźany (SN/MG). Studowanje budźe za studentki a studentow, kotřiž su w Drježdźanskim studentskim skutku organizowani, dróše. Dokelž Sakska studentske skutki mjenje podpěruje, dyrbja za studentow móžnosće pytać, kak móhli falowace financielne srědki wurunać. Na posedźenju zarjadniskeje rady Drježdźanskeho studentskeho skutka minjeny štwórtk su čłonki a čłonojo powyšenje wo dohromady něhdźe 15 eurow wobzamknyli, aktualnje płaća studentki a studenća něhdźe 112 eurow za studentski skutk. Dohromady płaća studowacy w Drježdźanach ze wšěmi popłatkami nětko wjace hač 300 eurow na semester. Tole je moderatne powyšenje, wšako bě sej jednaćel skutka hišće před něšto časom žadał, zo měli popłatk „wot tuchwilu 97,50 eurow wo 47 eurow powyšić, zo bychmy wšě posłužby dale poskićeć móhli“.
Wuznamny serbski běhar a spušćomny Sokołčan
Minjeny pjatk čitach w rubrice krótkopowěsćow Serbskich Nowin zrudnu powěsć wo smjerći znateho serbskeho běharja Jurja Nuka.
Před někotrymi lětami zetkach jeho w Budyšinje a prašach so: „Jurjo, što čini běhanje?“ Sportowc srjedź wosomdźesatych lět mi wotmołwi: „Tež, hdyž mi wšitko boli, běhanje je moje žiwjenje.“ Móžu jeho zrozumić, wšako je tutón sport jeho žiwjensku wolu a žiwjensku radosć sobu postajił. Wobdźiwach jeho krutu wolu kaž tež jeho zmužitosć, so we wysokej starobje dračować, zo by na wubědźowanjach seniorow pódla był. Njemóžu na tutym městnje wšitke jeho wuspěchi a myta minjenych lětdźesatkow mjenować. Strona njeby dosahała.
Kak wuwiće rěče lěpje planować?
Choćebuz (SN). Na přeprošenje Serbskeho instituta (SI) so štwórtk a pjatk zastupjerjo dwanaće mjeńšinowych rěčow zapadneje a srjedźneje Europy w Choćebuzu zetkaja, zo bychu so wo metodach „planowanja rěče“ wuměnili. Přihotował je mjezynarodnu konferencu wotrjad za regionalne wuwiće a škit mjeńšin SI. Ze syće za serbšćinu a regionalnu identitu ZARI wobdźělitaj so Cordula Ratajczakowa a Julian Nyča. Nic jenož fachowcow wězo wotmołwa na prašenje zajimuje: Što móže serbska Łužica z rewitalizacije wohroženych rěčow w regionach druhich mjeńšinow wuknyć? Přizjewili su so tež friziscy a delnjoněmscy kolegojo.
Měto Nowak ze SI: „Planowanje rěče je za zastupjerjow wšěch mjeńšinowych rěčow w Němskej hišće njeznaty kraj. Ćim wažnišo je za rěče kaž hornjo- a delnjoserbšćinu, nazhonjenja druhich zapřijeć.“ Konferenca w jendźelskej rěči słuži wuměnje fachowcow. Na dnjowym porjedźe steji sydom fachowych přednoškow, mjez druhim z Waliziskeje, Irskeje, kupy Man, Ladiniskeje a Bretoniskeje. Zarjadowanje budźe so online wusyłać (hlejće internetnu stronu SI).
Prěnja Serbiniada
Budyšin (SN/MiR). Pod hesłom „Serbšćina zwjazuje“ wotměwaše so dźensa w Budyskim Serbskim muzeju prěnja Serbiniada. Zhromadny projekt Serbskeho instituta, Serbskeho muzeja, Serbskeho šulskeho towarstwa (SŠT) z pedagogiskim projektom LUCIJA a Rěčneho centruma WITAJ chce rěčne zrozumjenje a sposrědkowanje rěče spěchować. Załožba za serbski lud ideju spěchuje. Před lětomaj wědomostnica dr. Jana Šołćina z instituta a wučerka Alena Hiccyna ze SŠT ideju zrodźištej.
W muzeju je so dźensa rano 40 šulerjow 8. lětnika ze serbskich a serbšćinu wuwučowacych šulow z Hornjeje a Delnjeje Łužicy kaž tež ze Slepoho zetkało. Zaměr „premjery“, kaž dr. Šołćina dźensniši projekt mjenowaše, je, zo so šulerjo, kotřiž njejsu maćernorěčni serbscy, z dalšej serbskej rěču kaž tež ze Slepjanskej narěču zaběraja. Zdobom zeznaja woni zwiski k druhim słowjanskim rěčam, kaž k pólšćinje, rušćinje, čěšćinje, ukrainšćinje a słowakšćinje. W prěnim rjedźe pak twori projekt zwiski mjez młodostnymi, kotřiž we wšelakich kónčinach Łužicy serbšćinu wuknu.
Tradicije mjez młodymi Serbami a Bretonami hajić
Budyšin (SN/MiR). Mjezynarodnu wuměnu wo wšelakich tradicijach pěstować je hižo za čas dźěćatstwa a młodosće wažne. Jedyn tajki dopokaz je mjeztym wjacore dźesatki trajacy zwisk serbskich šulow do Bretoniskeje. Tutón tydźeń witaja na Worklečanskej wyšej šuli „Michał Hórnik“ 19 a na Budyskim Serbskim gymnaziju 22 bretonskich młodostnych. Šulerjo z Bretanje wuknu na tamnišich šulach w projekće DIWAN bretonšćinu, kiž słužeše serbskemu projektej WITAJ jako přikład. Yvonne Bulišowa, wučerka za francošćinu a katolsku nabožinu na gymnaziju, zwěsći: „Centralny zaměr zetkanja je, zo zeznawaja naši šulerjo runje tak kaž bretoniscy młodostni druhu mjeńšinu.“ W prěnim rjedźe rěča šulerjo francosce a němsce a jeli dale njewědźa tež jendźelsce. Do Budyšina su sej šulerjo 8. a 9. lětnika z města Quimper dojěli.
Moje jutrowne wuznaće
Kóžde lěto zaso wjeselimy so na jutry, štož rěka, zo zawěsće z redakcije nowiny prašenje přińdźe, hač njeby so hodźało, něšto wo čěskim poćahu k tutomu swjedźenjej pisać. Ale što hišće pisać? Před dwěmaj lětomaj smój z Kryštofom Peršínom w naju rozmołwje prajiłoj, zo my Češa serbske jutry tak znajemy, kaž je Serbja njeznaja. Wšako žadyn Serb na přikład spěwanje křižerjow na starym słowjanskim hrodźišću njesłyši a energiju njedožiwi, kotraž na tajkim městnje tučasnosć z dawnej zašłosću zwjazuje. A to jenož nětko, za čas młodeho nalěća, hdyž so zyma rozžohnuje, słónčko hakle swoju ćěrjacu móc hromadźi a so łuki a štomy hišće njezelenja a njepupkuja. Tehdom, před dwěmaj lětomaj, su mi někotři prajili, zo budźeće spytać, tajke ranje nad Wotrowom dožiwić. Je so wam poradźiło?
Šula za delnjoserbsku rěč a kulturu w Choćebuzu je minjeny kónc ...
Wutworja dźiwadłowu skupinu
Skupina zajimčow je poskitk Serbskeho šulskeho towarstwa (SŠT) pod hesłom „Knihi a klankodźiwadło“ knihowała. Dalekubłanje w Serbskim kubłanskim srjedźišću LIPA w Smjerdźacej běše přewšo intensiwne dožiwjenje.
