Nawodnicu rozžohnowali
Chrósćicy (LB/SN). Po 19 lětach nawodnistwa Chróšćanskeje pěstowarnje je so zašły pjatk Angela Młynkowa z kubłanišćam rozžohnowała a so na zasłuženy wuměnk podała. Po krótkim programje dźěći dźakowachu so jej za spušćomne skutkowanje w mjenje Serbskeho šulskeho towarstwa jako nošerja předsydka Ludmila Budarjowa, wjesnjanosta Marko Kliman (CDU), staršiska rěčnica Katharina Jurkowa, kubłarki a syła dźěći. Wone běchu za nju wulku knihu z dopomnjenkami spaslili.
Angela Młynkowa spominaše na wusahowace podawki za čas swojeho nawodnistwa, kaž programy z dźěćimi, wjacore wulke powodźenja pěstowarnje a na dalekubłanja pola narodnych mjeńšin kaž Bretonow we Francoskej abo Ladinjanow w Italskej.
Ralbičenjo hosćićeljo lětušeho UNESCO-campa
Budyšin/Ralbicy (SN/mwe). Serbska wyša šula Ralbicy je hosćićelka lětušeho UNESCO-campa, kotryž so hač do jutřišeho pjatka w Budyšinje a Ralbicach wotměwa. Jako jedne z dwanaće projektowych kubłanišćow UNESCO w Sakskej zamołwja delanske za wobsah pod hesłom „Do přirody a kultury serbskeje hornjeje Łužicy so zanurić“. Kóžda UNESCO-šula – mjez druhim z Lipska, Plauena a Žitawy – je po jednym koordinatoru a štyrjoch šulerjach 5. do 9. lětnika na projektnym campje wobdźělena.
55 hosći přebywa w Budyskej młodowni a je sej zawčerawšim po witanju po měsće dundajo Budyšin wotkryło. Samsny wječor prezentowachu wšitke šule na prěnjej dźěłarničce swoje aktualne wuslědki projekta „přiroda a starosćiwy wobchad z njej“.
Kak wobhladniwje Jan Šołta z Konjec ze swojimi pčołkami wobchadźa, nazhonity pčołar šulerjam wčera rozłoži. We wobłuku dźěłarničkow su holcam a hólcam kaž tež jich přewodźerjam w Ralbičanskej šuli pokazali, kak jutrowne jejka debja a sački tykaja, a předstajichu jim serbsku narodnu drastu. Wučer Uwe Macka wjedźeše hosći po wsy a poby z nimi na Ralbičanskim kěrchowje.
Spektakl Royal
Přeće znowa słyšeć było
Čas jeje skutkowanja čas wulkich změnow był
Po štyrceći lětach jako nawodnica Radworskeho katolskeho dźěćaceho domu so Monika Bukowa na wuměnk podała
Ličba 40 ma wěsty symboliski charakter wosebje hladajo na křesćanske stawizny. Mjenje abo bóle připadnje je tule ličbu tež Monika Bukowa docpěła, kotraž bě Radworski katolski dźěćacy dom „Alojs Andricki“ štyrceći lět dołho nawjedowała. Kónc februara poda so wona na zasłuženy wuměnk. Čas jeje wjelelětneho skutkowanja pak bě zdobom čas změnow, kotrež je wuspěšnje zmištrowała.
Wot puća so nihdy njewotsaliła
Nowy partner
Choćebuz (SN). 53. centralna olympiada serbskeje rěče za šulerjow a šulerki 6. lětnika Delnjeje a Hornjeje Łužicy budźe wot 8. do 10. apryla we Wodowych Hendrichecach. Měsac do toho stej předsydka Serbskeho šulskeho towarstwa Ludmila Budarjowa a nawodnica Dźěłanišća za serbske kubłanske wuwiwanje Choćebuz ABC dr. Christiana Piniekowa kooperaciske zrěčenje podpisałoj. SŠT je nošer wubědźowanja. ABC jako krajna institucija Braniborskeje budźe SŠT prěni króć oficialnje nastupajo delnjoserbske nadawki za olympiadu podpěrać a chce tež na městnje z fachowo-pedagogiskim a rěčnym přewodom prezentna być.
Zetkanje je zymski wjeršk
Najbóle wopytana swójbna schadźowanka dotal
Chrósćicy (MaU/SN). Swójbna schadźowanka w Chrósćicach wuwiwa so na wulki zymski wjeršk. Wosebje dźěći a jich starši maja termin kruće do kalendra zapisany, wšako móža so tón dźeń mjez sobu zetkać a bjesadować. Dźěći pak wužiwaja zarjadowanje za to, so zabawjeć. Tomu běše tež wčera popołdnju tak. Budyski Rěčny centrum WITAJ a Kamjenska župa „Michał Hórnik“ běštej na wotměnjawe popołdnjo do Chróšćanskeje „Jednoty“ přeprosyłoj. Wot 15 hač do 18 hodź. knježeše w hali kaž tež w rumnosćach Serbskeje zakładneje šule „Jurij Chěžka“ čiłe žiwjenje. Cilowa skupina zarjadowanja su dźěći wot nul do dwanaće lět zhromadnje ze swojimi swójbnymi. Na wšě 400 ludźi wčera přichwata. „Tak je lětuša swójbna schadźowanka z dotal wotměwacych so najbóle wopytana“, zwěsći regionalna rěčnica za teritorij župy Katarina Jurkowa. Budyšanka Franciska Krawcowa rjekny: „Smy mjeztym druhi króć na swójbnej schadźowance byli. Mi so zarjadowanje jara spodoba. Bydlimy w Budyšinje. Naju syn ma tule składnosć zwiski k wjesnym dźěćom nawjazać a wobstejace skrućić.
Wučerjow spěšnišo do słužby dóstać
Drježdźany (SN/JaW). Sakske kultusowe ministerstwo chce z rjadom změnow pruwowanskeho porjada za studentow wučerstwa spěšnišo a zdobom wjac móžnych nowych wučerjow do powołanja dóstać a do praksy pósłać. Zdobom chce tak studentow samych kaž tež wysoke šule wolóžić. Wo tym rozprawja kultus na swojich internetnych stronach. Płaćiwosće nabyć ma změnjeny pruwowanski porjad w Sakskej hižo lětsa spočatk apryla, kaž z medijoweje zdźělenki ministerstwa wuchadźa.
