Choćebuz (SN/MiR). Nawodnica Šule za delnjoserbsku­ rěč a kulturu Choćebuz Marja Elikowska-Winklerowa chce stawizny kursow delnjoserbšćiny za dorosćenych dale přeslědźić. Před 65 lětmi bě so prěni tajki kurs wotměł, wot 12. do 18. februara 1951 w błótowskich Bórkowach. „Mam tónle jubilej, kotryž smy mjeńšeho razu w Choćebuzu woswjećili, za wosebity“, rjekny Elikowska-Winklerowa na naprašowanje Serbskich Nowin. „Při wuwiwanju wosebiteho dźěłoweho materiala móžach nazhonić, zo wobsteji dale zajim na kursach­ del­njoserbskeje rěče, tež mjez młodymi dorosćenymi.“­ Přichodnje chce wona w rozmołwach z ludźimi na wsach dalše zajimawostki wo stawiznach wuwučo­wanja delnjoserbšćiny w tym wobłuku wuslědźić­ a dokumentować.

Choćebuska wotnožka Rěčneho centruma WITAJ chce klětu dalšich zajimcow za swoje zarjadowanja zdobyć, wosebje młodostnych, kubłarjow a wučerjow.

Choćebuz (SN/MiR). Na Choćebuski RCW čaka přichodne lěto cyły rjad naročnych nadawkow. Mjez druhim nastanu tam dalše nowe wučbne srědki, husto w ko-operaciji z dźěłanišćom ABC. „Přichodnje ma wuńć gramatiska přiručka. Wažne tež je, zestajeć wučbnicy za wuknjenje delnjoserbšćiny jako cuza rěč“, rozłožuje nawoda zarjadnišća dr. Viktor Zakar. „Dalši tajki projekt je wuwić nowu fiblu, dźěłowu knihu k alfabetizowanju w delnjoserbskej rěči.“ Dale a bóle starać chcedźa so sobudźěłaćerjo RCW wo to, serbsku bilingualnu wučbu a wučbu serbšćiny jako cuzu rěč na Choćebuskim Delnjoserbskim gymnaziju a na zakładnych šulach sylnić.