Drježdźany (SN/MiR). Drježdźanske towarstwo Stup dale pyta dalše dźěći, kotrež chcedźa w sakskej stolicy na šuli serbšćinu wuknyć. Hač do 13. junija móža starši wotpowědny formular na internetnej stronje towarstwa wupjelnić. Tež starši małych dźěći abo ćěšenkow su prošeni so přizjewić. Wšako dyrbi a chce towarstwo trajnu potrjebu dopokazać. 14. junija mjenujcy změja dalšu rozmołwu z tamnišim regionalnym zarjadom sakskeje kubłanskeje agentury. Ćežišćo wuradźowanja budźe diskusija wo přichodnym prawidłownym wuwučowanju maćernorěčneje wučby serbšćiny w sakskej stolicy. W šulskim lěće 2016/2017 poskića prěni króć popołdniši kurs na 108. zakładnej šuli w měšćanskim dźělu Strěžin, a to we wobjimje jedneje do dweju hodźin wob tydźeń. To ma so dale wjesć, tež hdyž so dopołdniša wučba kruće zakótwi, zdźěli předsyda towarstwa dr. Andreas Kluge. Na wokolnik z lětušeho februara z próstwu, swoje dźěći za wučbu serbšćiny přizjewić, je 23 přizjewjenjow dóšło. Třećina tychle dźěći chodźi hižo do šule. Za přichodne lětniki maja kóždy króć tři do pjeć přizjewjenjow.

Na dworje Serbskeho šulskeho a zetkawanskeho centruma Budyšin su wčera olympiski woheń zapalili. Z chorhoju ćehnjechu dźěći Serbskeje zakładneje šule na dwór, hdźež je šulska nawodnica Annett Natušowa na tónle wosebity projekt witaše. Wšitcy­ šulerjo 1. do 4. lětnika zaběraja so tónle a přichodny tydźeń we wobłuku předmjety přesahowaceje wučby z temu olympiada. Tak přewjedu mjez druhim tež běh­ spon­sorow. Foto: Gabriela Bajtlowa

Njewjedrow zašłych dnjow dla chětro zapusćenu zahrodku Wojerowskeje zakładneje šule „Handrij Zejler“ Při Worjole su nětko znowa zwosadźeli. Tam maja nětko zaso něhdźe 50 tomatowych, kirbsowych a dalšich rostlin, kotrež je sponsor přewostajił. Dźěl nažnjatych płodow přewostaja pozdźišo šulskemu hortej, tamny dźěl móža sej šulerjo kupić. Foto: Heinz Hirschfeld

Drježdźany (SN). Zahoritosć za rjemjeslnistwo po wšěm zdaću dale přiběra. Tak je so 725 młodych muži a žonow za wukubłanje w rjemjeslniskim powołanju rozsudźiło a wukubłanske zrěčenje w Drježdźanskim komornym wokrjesu podpisało. Cyłkownje je to nětko hižo 106 wjac zajimcow hač loni w samsnym času, štož je přirost 17 procentow. „Zhladujemy pozitiwnje na ličby. Při­wšěm je to jenož mjezystaw, štož nochcemy nadhódnoćić a njemóžemy tuž hišće wodychnyć“, zdźěli hłowny jednaćel Drježdźanskeje rjemjeslniskeje komory dr. Andreas Brzezinski. Tak chcedźa nětko najprjedy raz pozitiwny trend wužiwać a dale zaměrnje zhromadnje ze zawodami, wokrjesnymi rjemjeslnistwami za wukubłanje w rjemjeslniskim powołanju wabić.“

Sobotu, 18. junija, chcedźa zamołwići pod hesłom „rjemjeslnistwo w centrumje“ w Drježdźanskej cityjowej galeriji z něhdźe dwaceći zawodami na wuchodźe Sakskeje a z dalšimi partnerami wukubłanske móžnosće předstajić.