Bywši wučomnicy su nětko młodźi rjemjeslnicy
74 młodych rjemjeslnikow přija zańdźeny pjatk w Budyskim Dźiwadle na hrodźe swoje powołanske wuswědčenje. Pjećo najlěpši běchu wuslědk „derje“ docpěli.
Budyšin (SN/MiR). Tři lěta wuknjenja su skónčene. Wokrjesny rjemjeslniski mišter Frank Scholze přepoda młodym žonam a mužam z dwanaće wšelakich powołanjow wuswědčenja. Mjeztym je wjetšina z nich swój prěni mzdowy šek w rukomaj dźeržała, dokelž běchu hnydom po wukubłanju dźěło namakali. Mjez nimi su tež štyrjo Serbja. Bosćij Šołta z Hórkow skutkuje w swojim wukubłanskim zawodźe Fuchs a Girke tzwr w Ottendorfje-Okrilli jako moler a Fabian Kocor z Chrósćic w Njebjelčanskej kormjerni swini jako rěznik. Johannes Jurš z Miłoćic bě w předewzaću Ligneus tzwr w Ottendorfje-Okrilli powołanje blidarja nawuknył. Mjeztym pak dźěła jako ćěsla w Kinsporku. Chrystof Hrjehor z Konjec dźěła jako wuwučeny třěchikryjer w zawodźe nana Měrćina Hrjehorja w Konjecach.
Wuprawa šulerjow na wosebitu městnosć wjedła
Ekskursija wšitkich wuknjacych Chróšćanskeje zakładneje šule wjedźeše wčera dopołdnja do Hórkow k ródnemu domej Jurja Chěžki, kotrehož mjeno jich kubłanišćo nosy. Tam su woni na serbskeho basnika spominali.
Hórki (SN/MiR). Lětsa budźe tomu 30 lět, zo nosy Chróšćanska šula mjeno „Jurij Chěžka“. Wčerawša wuprawa, kotruž běše šula zhromadnje z Kamjenskej župu „Michał Hórnik“ a Rěčnym centrumom WITAJ spřihotowała, běše wosebite zarjadowanje wšitkim chowancam kubłanišća. Wórša Wićazowa, kotraž jako wuměnkarka dale w Chrósćicach wuwučuje, je wjace hač połsta hólcam a holcam kaž tež jich wučerjam Jurja Chěžku na jara zabawne wašnje jako wjesneho hólčeca a młodostneho z wulkim nadarjenjom zbližiła. „Wón zamó wšo to, štož bě w přirodźe a wokolinje widźał, do rjanych słowow splesć a tak wosebite basnje tworić“, Wórša Wićazowa rozłoži.
50 lět po maturje na Serbskej rozšěrjenej wyšej šuli zetka so ...
Serbšćinu chcedźa dale poskićeć
Wojerowski Johanneum integruje rěč wosrjedź wulkeje mnohotnosće
„Wšitko pruwujće, dobre dźeržće“ rěka napis w jědźerni Wojerowskeho Johanneuma. Pódla namolowaneje Janskeje cyrkwje steji tam citat na sćěnje w serbskej, jendźelskej, francoskej, ruskej, łaćonskej a grjekskej rěči. Tak pokazuje so bohatosć rěčow na křesćanskim gymnaziju, kotryž swjeći tele dny swoje 25lětne wobstaće.
Andreas Kirschke je so z jeho nawodu Günterom Kieferom rozmołwjał.
Kotru rólu hraje serbska rěč na wašim kubłanišću?
G. Kiefer: Serbšćina ma wysoku hódnotu. Wona je wot lěta 1992 kruće do šulskeho programa zapřijata. W přijimanskich rozmołwach za nowych šulerjow je wona kóžde lěto tema. To rěka, prašamy so šulerjow a staršich zaměrnje za jich zajimom za serbšćinu. Wabimy za rěč a pohnuwamy gymnaziastow, ju wuknyć. Wot wšeho spočatka maćernorěčna Serbowka, wučerka Andreja Ryćerjowa ze Šunowa, pola nas serbšćinu podawa. Chcemy tež přichodnje wučbu dołhodobnje a stabilnje z njej planować.
Městno wšelakorosće, tolerancy a wotewrjenosće
Ze swjedźenskej Božej słužbu we Wojerowskej Janskej cyrkwi zhladowaše tamniši křesćanski gymnazij Johanneum wčera na 25 lět wobstaća.
Wojerecy (AK/SN). Křesćanski gymnazij Johanneum we Wojerecach je na přichod derje přihotowany. To podšmórny sobuzałožer šulskeho nošerskeho towarstwa Martin Schmidt wčera na swjatočnosći składnostnje 25lětneho wobstaća Johanneuma. „Motiwacija Ewangelskeje cyrkwje šleskeje Hornjeje Łužicy, w lěće 1992 tule swobodnu šulu załožić, bě sadźić znamjo za tolerancu, swětawotewrjenosć a wšelakorosć“, wón rozłoži. „Dźěše wo akceptancu wšelakich duchownych, politiskich a kulturnych nastajenjow.“ Załoženje gymnazija bě 1992 signal nadźije po namócnosćach přećiwo cuzym nazymu 1991 w měsće.
Kak ideje zwoprawdźić?
Sylny protest
Budyšin (LB/SN). Přećiwo planam sakskeho statneho ministerstwa za kultus, wutworić krajny zarjad za šulu a kubłanje, přiběra protest. Tole wujewi tež wčerawša diskusija wo naležnosći, na kotruž bě Sakski zwjazk wučerjow do Budyskeho hotela „Best Western“ přeprosył. Mnozy wučerjo kaž tež wjacori zapósłancy sakskeho sejma, wjesnjanosća hornjołužiskich komunow, krajni radźićeljo, nawodźa šulow a předsydźa zwjazkow a towarstwow běchu přišli.
Po planach kultusa, kotrež předstaji předsyda Zwjazka sakskich wučerjow Jens Weichelt, chcedźa zamołwići wobstejace pjeć regionalnych wotnožkow Sakskeje kubłanskeje agentury zredukować na tři – a to w Kamjenicy, Drježdźanach a Lipsku. Z dotalneju wotnožkow w Zwickauwje a Budyšinje matej nastać referataj. Tak njezmějetej hižo žanu kompetencu rozsudźeć, tež w serbskich naležnosćach nic. Nowy zarjad ma 1. januara 2018 skutkować započeć.
Plany kultusoweho ministerstwa su wčera wótrje kritizowali. Třo z něhdźe 70 přitomnych su žurlu z protesta dočasnje wopušćili.
We wobłuku projekta so z namocu rozestajeli
W njezwučenym projekće su so wuknjacy 8. a 10. lětnika Radworskeje wyšeje šule „Dr. Marja Grólmusec“ dźensa rano na emocionalne wašnje z temu namóc we wšěch jeje fasetach rozestajeli.
Radwor (CS/SN). Jara zadźiwanych bě dohromady 86 młodostnych, jako zhonichu, zo běchu runje dźiwadźelnikow dožiwili. Pjeć ludźi wšelakoreje staroby, rozdźělneje barby kože a wšelakoreho politiskeho zmyslenja su jim swoje nazhonjenja z namocu předstajili. Tak je neonaci mějićela aziatiskeho zakuskoweho předawanišća bił, dokelž bě tón jeho maćeri wupowědźił. Šulerka je tołstu sobušulerku mobowała a ju tak do samomordarstwa honiła. Wučer je šulerjej plistu dał, dokelž njemóžeše ignorancu šulerjow hižo znjesć. Młoda žona je přećiwo wumocowanju zakročiła a so při tym sama zrani. A barbny bu nadpadnjeny, je pak sam k werbalnej namocy chilał.
Serbska rěčna šula ma nazymu dźěłać započeć
Hišće Serbska rěčna šula prawje njedźěła, byrnjež termin prěnjeje wučbneje hodźiny za 1. awgust předwidźany był. Mjeztym su přihoty dale šli. Nětko je zaměr, wuwučowanje po nazymskich prózdninach zahajić.
Powołanske akademije sylnić
Sydom stejnišćow sakskich powołanskich akademijow dóstanje jednotne wonkowne mjezwočo. Serbski narok Budyskeje akademije njebu dotal dosć wobkedźbowany.
Budyšin (CK/SN). Diana Karbe a Paul Schuster staj mjezypruwowanja złožiłoj. Wonaj studujetaj financny management na Budyskej studijnej akademiji. Praktiski dźěl wukonjataj we Wojerecach. Diana Karbe z Pančic-Kukowa skutkuje w Dźěłaćerskim dobroćelstwje Łužica, Radworčan Paul Schuster we Łužiskim centrumje za technologiju. Hdyž so za něšto tydźenjow, po semesterskich prózdninach, na wukubłanišćo wróćitaj, njebudźe wone hižo tajke kaž tón dźeń, jako běštaj so do praksy podałoj.
