Znowa dobry wothłós na swójbny kónc tydźenja
Smochćicy (aha/SN). Hódny kubłanski kónc tydźenja je wot minjeneho pjatka do wčerawšeje njedźele Smjerdźečanske swójbne a kubłanske srjedźišćo LIPA za młode swójby w Smochčanskim Domje biskopa Bena přewjedło. Wothłós na mjeztym wosme tajke zarjadowanje přiběra, a móžna kapacita bě tónraz wučerpana. Wjace hač 50 wobdźělnikow – 13 staršiskich porow ze swojimi 27 dźěćimi – móžeše tam, kaž je druhi adwentny kónc tydźenja mjeztym z tradiciju, přijomnu serbsku zhromadnosć z kubłansce zajimawymi přednoškami za staršich dožiwić.
Mjeztym zo starši na přednoški słuchachu, starachu so štyri kubłarki wo wotměnjawu zaběru z dźěćimi. Wužiwachu z nimi rjane wjedro za wuchodźowanje a paslachu adwentnu a hodownu pychu. Samo hru wo swjatym Mikławšu nazwučowachu, za čož su so po předstajenju starši tež nazwučowarce Borborje Šeferowej, kotraž bě so tohorunja wo wotpowědne kostimy a rekwizity starała, ze sylnym přikleskom dźakowali.
Chcedźa akademije zjednoćić
Rektorojo kritizuja pobrachowacy wysokošulski status
Budyšin (UM/SN). Na terenje Budyskeje studijneje akademije tuchwilu twarja. 3,7 milionow eurow nałoži tam Swobodny stat Sakska za twar noweho labora, kotryž ma dotalne njedosahace rumnosće narunać. Zapósłanc krajneho sejma Marko Šiman (CDU) ma naprawu za „wažnu kročel, Budyšin jako kubłansku městnosć zesylnić a atraktiwitu stejnišća přisporjeć“.
Póńdźe wo wukubłanje a wo rěč
Lipsk ma wuznam jako wukubłanske městno serbskeje elity. Kónc tydźenja wotmějetej so w měsće nad Plesnu zarjadowani, na kotrymajž serbske prašenja nastupajo rěč a wukubłanje w srjedźišću steja.
Lipsk (SN/CoR). Zhromadnje z Němskim komitejom za regionalne a mjeńšinowe rěče EBLUL přeprosy Lipšćanski Institut za sorabistiku 2. decembra tam na projektowy seminar pod hesłom „regionalne a mjeńšinowe rěče w Němskej so předstaja“. Mjez tymi, kotřiž seminar rano z postrownymi słowami zahaja, staj nimo profesorow Lipšćanskeje uniwersity tež politikarjej Rico Gebhardt, předsyda frakcije Lěwicy w Sakskim krajnym sejmje, a Ralf Christoffers, předsyda frakcije Lěwicy w Braniborskim krajnym sejmje. Po tym so akademiske a politiske puće zaso tróšku dźěla, wšako přewjedujetej sakska a braniborska frakcija Lěwicy na tutym terminje 12. serbski dźeń, a to tohorunja w Lipsku. A tam ma wukubłanje serbskorěčnych wučerkow a wučerjow w srjedźišću stać.
Jubilejny wosušk wšón zjědźeny
10. adwentne wiki syły ludźi do Radworskeje „Slavije“ přiwabili
Radwor (SN/BŠe). Rjenje wupyšena hala „Slavia“, wóń horceho wina a wosuška kaž tež mnohe rjane paslenki su zawčerawšim a wčera syły ludźi do Radworja wabili. Wyša šula „Dr. Marja Grólmusec“ wuhotuje tam kóžde druhe lěto adwentne wiki – mjeztym dźesaty króć –, na kotrychž poskićachu lětsa dźesać „Radworskich metrow“ wosuška, napječeneho we Wotrowskej Bulankec pjekarni. A tón bě naposledk wšón zjědźeny.
Minjeny tydźeń běchu šulerjo najwšelakorišu dekoraciju a dariki spřihotowali, samo pychu z betona. Zo dźěći přewšo kreatiwnu hodownu pychu zhotowjeja, je mjez wobydlerjemi wokoliny hižo znate. Njezadźiwa tuž, zo tam zaměrnje chodźa, zo bychu sej adwentne wěncy abo stykane hałžki kupili.
Překwapili su šulerjo zaso z wuběrnje nazwučowanym hodownym musicalom „Sněholinka“. Dwurěčna hra, ze spěwami, akrobatiku a dźiwadłom bě mnohim wjeršk dohodownych wikow. Wjesnjanosta Wincenc Baberška (CDU) so tam kóždy raz jako rumpodich sobu wobdźěla. Tak chodźi wón po žurli a zwjesela dźěći ze słódkosćemi.
Dale tak!
Wšudźe wabja tuchwilu adwentne wiki. Kóžde druhe lěto wotměwaja tajke tež w Radworskej „Slaviji“, kotrež wuhotuje tamniša wyša šula. A zo so tale próca připóznawa, bě na ludźoch widźeć, kotřiž běchu wčera a zawčerawšim přichwatali. Tak njeběchu tam wopytowarjo jeno z wokolnych wsow, ale tež z Ralbic, Lejna abo Hórkow. Wučerjo a šulerjo z podpěru staršich su halu rjenje wupyšili a blida z kreatiwnymi poskitkami a wudźěłkami kryli, kotrež běchu w běhu tydźenja zhotowjeli. Wot wjacorych ludźi móžach słyšeć, zo su přewšo překwapjeni, što běchu tule na nohi stajili. Tež program z musicalom „Sněholinka“ žněješe wulki wothłós. Je derje, zo so tajke adwentne wiki poskićeja, wšako skrućeja zhromadnosć. Zdobom sylnja sebjewědomje šulerjow, kotřiž su so cyły tydźeń na dohodowny wjeršk přihotowali. Próca je so wudaniła! Dale tak!
Bianka Šeferowa
Wšitcy kaž lutki pilnje dźěłaja
Radworska wyša šula hotuje so na dźesate hodowne wiki
Radwor (SN/MWj). Cyle hinaše žiwjenje hač zwučene knježi tele dny na Radworskej Serbskej wyšej šuli „Dr. Marja Grólmusec“. Na normalnu šulsku wučbu tam hižo wot póndźele nichtó njemysli, wšako šulerjo a wučerjo z wulkej prócu swoje dźesate hodowne wiki přihotuja. W rjadowniskich rumnosćach woni pasla, šija, pletu, moluja, lěpja, pjeku atd.
Wotewrjene durje a małe wiki
Studenća zarjadej list pisali
Choćebuz (SN). Studenća serbšćiny za wučerstwo su so z listom na Choćebuski statny šulski zarjad wobroćili, kaž delnjoserbski rozhłós rozprawja. Pozadk su jich wočakowanja, zo móhli wot noweho šulskeho lěta klětu w februarje na Choćebuskim Denjoserbskim gymnaziju swój referendariat zahajić, wšako su serbscy wučerjo nuznje trěbni.
K tomu pak prawdźepodobnje njedóńdźe, byrnjež młodostni swój studij w Lipsku wuspěšnje zakónčili. Podłožki za próstwu wo referendarske městno su mjenujcy ministerstwu přepozdźe předleželi. Přičina toho je, zo njebě Lipšćanska uniwersita masterske wopisma potrjechenych studentow w prawym času wustajiła, kaž awtorka lista a studentka Colette Schampatisowa rozłoži.
Rada za serbske naležnosće Braniborskeje chce so nětko nadrobnje z naležnosću zaběrać a studentam pomhać. Palacu temu su mjeztym na dnjowy porjad přichodneho posedźenja poradźowanskeho gremija 29. nowembra w Podstupimje přiwzali.
Plon ma so stać maskotka
Projekt wo bajach wjedźe dźěći do Hórnikečanskeje energijoweje fabriki
Bohatosć łužiskeje krajiny na starych bajach bě Energijowej fabrice w Hórnikecach přičina so hłubšo ze serbskej powěsćowej postawu, z plonom/zmijom zaběrać. Tón ma so stać maskotka industrijoweho muzeja.
Přewšo poradźeny dźeń wotewrjenych duri
Nowa forma dnja wotewrjenych duri w Budyskim Serbskim šulskim a zetkawanskim centrumje je so radźiła. Posrědkować přichodnym šulerjam a jich staršim informacije wo wuknjenju a wuwučowanju bě prawy rozsud.
