Přiwćicy/Wojerecy (SN/bn). Prózdninski dyrdomdej z Bookii-pisakom poskićuja lětsa na dwěmaj městnomaj. Wutoru, 13. februara, wotměje so w Serbskim projektowym běrowje w Přiwćicach druhi „Bookii klub“. Na wobdźělnikow „čakaja pisane zajimawostki“, kotrež staj rěčnej motiwatoraj Domowiny Marija Šołćic a Lucian Kaulfürst „zdźěla hromadźe nadźěłałoj“, kaž w zdźělence wobeju organizatorow rěka. Mjez druhim hodźi so z pomocu mjenowaneho nastroja „na přikład něšto wo dudach, zahrodce abo francoskej jědźi zhonić“. Znatu knihu „Swět wokoło nas“ je Šołćic „z mnohimi swójskimi idejemi dale wuwiwała. Tak su wjele nowych nadawkow na zakładźe knihi nastali. Tute su w prózdninskich zešiwkach zhromadźene.“ Kaž na lońšim „Bookii klubje“ wěnuja so nimo toho tež na lětušim wospjet tworjenju z hlinu. Tydźeń po zarjadowanju w Přiwćicach wuhotuja „Bookii klub“ we Wojerowskim Domowinskim domje. Motiwatoraj „wjeselitaj so na přizjewjenja zajimcow“, a to pak telefonisce pod čo. 035932 120131 abo z mailku na l (Přiwćicy) resp. pod čo. 03571 601613 abo z mailku na (Wojerecy).

Hižo dźewjaty raz přeprošuje šěroki zwjazk institucijow na powołanske wiki Zukunftsnavi. Wo nowosćach a planach lětušich wikow informowachu zamołwići wutoru.

Budyšin (SN/MG). Lětsa hišće raz wšo po zwučenym – tole bě tenor nowinskeje rozmołwy w rumnosćach studijneje akademije. W zawodnych słowach rozłožowaše dr. Romy Reinisch, přirjadnica w krajnoradnym zarjedźe, zo „su wiki centralny dźeń za šulerjow, studentow a wučomnikow, kotřiž chcedźa so wo poskitkach w regionje informować.“ Nimo zawodow pak poskićuje Budyska wotnožka agentury za dźěło tež indiwiduelne powołanske poradźowanje we wosobinskich rozmołwach.

Astrocentrum Łužica móhł so wo rozkćěw cyłeho regiona postarać – perspektiwa za młodych ludźi w domiznje

Sakska ma so stać z krajom wědomosće, wšako hightech-stejnišćo hižo je. Zakłady za to su minjene lěta ze zaměstnjenjom puć rubacych předewzaćow kładli. Husto rěči so w medijach wo Silicon Saxony, štož pokazuje na wěsty podźěl z hospodarstwom splećeneje wědomosće. Loni stej so dalšej wulkej předewzaći wědomosće přidružiłoj. Jedne z njeju je Němski centrum za astrofyziku (DZA), kotryž serbsce oficialnje Astrocentrum Łužicarěka. Zaběra so z grawitaciskimi žołmami – tež za hospodarske zaměry. Nimo toho spytaja jeho wědomostnicy z pomocu grawitaciskich žołmow wuswětlić zakłady a pozadk swětnišća. Dopóznaća z toho pomhaja při wuwiwanju nowych technologijow a modernych datowych systemow.

Za swoje zaměry su wědomostnicy DZA w serbskej Hornjeje Łužicy, w Delanach, optimalne wuměnjenja namakali. Loni su dóstali zelenu swěcu za swój ­projekt a lětsa doskónčne přizwolenje njesnadneje sumy spěchowanskich srědkow.

Drježdźany/Budyšin (SN/MiR). Podźělne dźěło mjez wučerjemi je w Sakskej snadnje stupało. Po informacijach Zwjazkoweho statistiskeho zarjada dźěłaše w šulskim lěće 2022/2023 po cyłej Sakskej dohromady 40,8 procentow wšitkich wučerjow a wučerkow na powšitkownje kubłacych šulach podźělnje. To je wo nimale jedyn procent wjace, hač lěto do toho. Po cyłej Němskej je kwota wyša – 42,3 procentow – najwyša w běhu zašłych dźesać lět. Kaž Sakski krajny zarjad za šulu a kubłanje (LaSuB) na naprašowanje SN zdźěli, njeje móžno konkretizować, kelko wučerkow a wučerjow na serbskich a serbšćinu wuwučowacych šulach z mjenje hodźinami dźěła. Zarjad nima za to diferencowanu móžnosć absolutne ličby zwěsćić.