Bórkowy (SN/mb). Nawodnica zakładneje a wyšeje šule „Mina Witkojc“ Bórkowy Manuela Śichanowa je na pisomne naprašowanje našeho wječornika zdźěliła, zo za naprašowanja a rozmołwy k dispoziciji njesteji. Mamy so na šulski zarjad wobroćić, kiž pak zašły tydźeń na pisomne naprašowanje tohorunja wotmołwił njeje. Anonymnemu listej wučerjow wo prawicarskim psychoteroru na šuli (SN su rozprawjeli), pozdatnje wot rektorki tolerowanym, su so mjeztym šulerjo ze spisom přizamkli a wobkrućili, zo su neonacije wotpowědnje wustupowali. Wučerjow-wotpósłarjow prěnjeho lista wšelake braniborske medije znaja.
Jenož časopisej „Zeit“ je rektorka tydźenja skrótka prajiła, zo je wumjetowanjow dla zludana, dokelž wěrnosći njewotpowěduja. Tola mjeztym medijam wotmołwy wotpokazuje. Po wuprajenjach kubłanskeho ministerstwa zarjad naležnosć tuchwilu pruwuje, tež móžne disciplinariske konsekwency. Něhdyši wučer šule Uwe Gutschmidt widźi móžne „přeńdźenje přećiwo winowatosćam zastojnstwa“, wšako by nawodnica zarjad sčasom informować dyrbjała.
Wojerecy (AK/SN). Wjesele su šulerki Aileen Nevoigtec, Lisbeth Pötzschec a Paula Mjetašec zhromadnje z kubłarkami horta Wojerowskeje zakładneje šule „Handrij Zejler“ zawčerawšim wopyt z Worklec wočakowali. Petra Kupcyna měješe jim šěsć serbskich katolskich swjedźenskich drastow za holcy přepodać. Připołdnju je Kirsten Böhme z Wjacsławkec drastoweho domu potom serbske ewangelske Wojerowske drasty přinjesła. „Tole su prěnje narodne drasty za hort, kotrež dźensa dóstawamy“, wuswětli nawodnica horta w nošerstwje CSB Nadine Wojtkowiak. Cyłkownje 210 dźěći do horta chodźi.
Choćebuz (SN/mb). Uwe Gutschmidt, něhdyši wučer w Bórkowach, je na busowym zastanišću w telewizijnym přinošku sćelaka RBB spóznał, zo dźe wo tamnišu šulu „Mina Witkojc“. Wučerjo tutoho – we wusyłanju njemjenowaneho – kubłanišća su anonymnje medije w Braniborskej informowali, kak skupina prawicarsko-ekstremistisce nastajenych młodostnych a jich „sobuběharjow“ z psychiskej a fyziskej namocu, nacistiskimi hrónčkami a ze znamjenjemi, kotrež so přećiwo wustawje měrja, žiwjenje na šuli wobćežuja (SN rozprawjachu). Woni twjerdźa, zo je kolegij wučerjow njepřezjedny w tym, kak měli reagować.
Jako jenička serbskorěčna projektna šula UNESCO so Ralbičanska wyša šula we wšelakich wobłukach angažuje. Jedyn tajki je přiroda. Tele dny dźěłachu šulerjo blisko Ralbic w tamnišim farskim lěsu.
11lětna Měrkowčanka Mirjam Wenclec wobdźěli so ze swojej prěčnej pišćałku na njedawnych „prózdninach z instrumentom“ Serbskeho ludoweho ansambla w Budyskej młodowni. Jeje instrument ma wona hižo přeco jara rady a je tuž přewšo wjesoła přez to, zo smě jón nětko hižo połdra lěta hrać. Do toho je wězo dyrbjała blokowu pišćałku hrać, ale to jeje wjeselo na nětčišim instrumenće njepomjeńšuje. Wjesele wona powěda, zo wšak čas na blokowej pišćałce scyła tajki hłubjeny njebě, wšako nawukny wona tak noty čitać.
Zwučowała je Mirjam w jutrownych prózdninach w klasiskim orchestrje. Na zakónčacym koncerće pak njeje wona jeno w orchestrje piskała, ale tež solowej kruchaj „Crazy Thing“ a „Bourree“ suwerenje přednjesła. Zhromadnje ze sobušulerku bě so na poskitku wobdźěliła. Hewak wšak wona přewjele druhich dźěći njeznaješe. Problem pak to za nju njeje. Wona ma wulke wjeselo na hudźenju a to je to najwažniše.
Choćebuz (SN/at). Start projekta za wožiwjenje delnjoserbšćiny „Zorja“ pobrachowacych zajimcow dla njezwrěšći. Nawopak: 21 ludźi je so hač do 30. měrca, kónca přizjewjenskeho časa, požadało. Woni móža sej předstajić, wot 1. septembra w běhu dźesać měsacow w Dešnje delnjoserbsku rěč nawuknyć.
Za projektoweho nawodu Maksimiliana Hasackeho je to zwjeselace. Wšako běchu do toho tež skeptiske hłosy słyšeć. W prěnim lětniku maja městna za wosom do dźesać kursistow. Wužiwaja-li wšitke, je za kóžde městno tróšku wjace hač dweju zajimcow. Mjeztym je proces wuzwolenja zahajeny. Hasacki w Braniborskim serbskim radiju na to skedźbni, zo su so zajimcy „z indiwidualnym projektom“ přizjewili. Tón budu nětko we wosobinskich rozmołwach předstajić, při čimž zdobom wo swójskim zwisku k Serbstwu a wo předznajomosćach w delnjoserbšćinje rozprawja. „Najwažniše je, kotru motiwaciju woni maja so wobdźělić a serbsku rěč běžnje wobknježić“, projektowy nawoda wuzběhny.
A štóž lětsa wuspěcha nima, móže so klětu znowa za přichodny kurs požadać.