Na Techniskej uniwersiće w Kamjenicy studuje 23lětna Serbowka Johanna Šurec wědomostnu fyziku, tuchwilu w druhim lěće. W cyłku třilětny bachelorowy studij je zakładny krok po puću k masterskemu studijej astrofyziki. Dokelž jón uniwersita w Kamjenicy w programje nima, dyrbi sej potom chcyjo-nochcyjo nowu uniwersitu pytać. „Dokal póńdu, to tuchwilu hišće njewěm“, praji wona. Swětnišćo fascinuje ju hižo z časa dźěćatstwa. Z tuteje fascinacije zrodźi so pozdźišo powołanski són, so z astrofyzikarku stać. W běhu lět njeje Johanna Šurec són spušćiła ale jón dale a chutnišo přepruwowała. Na kóncu gymnazialneho časa je so – tež hladajo na sylnej šulskej předmjetaj matematiku a fyziku – doskónčnje rozsudźiła, zo chce jón zwoprawdźić.