Šulerjo Chróšćanskeje Serbskeje zakładneje šule „Jurij Chěžka“ su wot lońšeje nazymy njesćerpnje na jewišćowu hru sobušulerjow čakali. Wčera dožiwichu woni na jewišću wjacezaměroweje hale „Jednota“ wosebitu „Błudnu šulu“.

Drježdźany (SN). Dohromady 163 šulerkam a šulerjam je sakski kultusowy minister Christian Piwarz (CDU) wčera wuznamjenjenje za wosebje dobre kónčne wuslědki realnošulskeho wotzamknjenja přepodał. Mjez nimi běchu tež dwaj šulerjej Worklečanskeje, jedyn Ralbičanskeje a jedyn Radworskeje šule. Jim přepodachu tež gratulaciske wopismo ministerskeho prezidenta Michaela Kretschmera (CDU). „Na swoje wurjadne wuslědki móža šulerki a šulerjo hordźi być. Tute wukony su runje tak hódne kaž wuslědki maturantkow a maturantow. Bohužel to hišće wšěm jasne njeje“, wuzběhny Piwarz. Wulce dźakowaše so Piwarz tež wučerkam a wučerjam, kotrež k dobrym wuslědkam přinošuja. Lětsa běše dohromady 21 137 šulerkow a šulerjow swoje šulske wukubłanje na realnošulskim abo hłownošulskim niwowje zakónčili. Mjez 163 najlěpšimi bě 110 młodych žonow a 53 młodych muži. Loni bě jich hišće 170 najlěpšich šulerkow a šulerjow, byrnjež mjenje šulu zakónčili. Zo by šulerka abo šuler predikat jara derje dóstał, njesmě w žanym předmjeće špatnišo hač z dwójku wotzamknyć.

Radwor (SN/mb). Za póndźelu je wjednica Serbskeje zakładneje šule Radwor zhromadźiznu staršich šěsć serbskich a 19 němskich dźěći zwołała, dokelž je zjednoćenje dotalneju dweju rjadownjow do jedneje „njewobeńdźomne“, kaž wona w přeprošenju pisa. Po našich informacijach pak so njepřizwolenje serbskeje rjadownje w 4. lětniku ze stron krajneho zarjada za šulu a kubłanje (LaSuB) sakskemu šulskemu zakonjej spřećiwja. Wón mjenujcy předwidźi, zo LaSuB wo tworjenju rjadownjow po wothłosowanju z nošerjom šule rozsudźi, štož je tule gmejna Radwor. Wjesnjanostka pak njebu informowana. Wotmołwjejo na prašenja SN rěčnik LaSuB na jednym boku twjerdźi, zo šula jenož jednu rjadownju planuje, na druhim boku, zo je LaSuB „wšě naprawy“, potajkim tež wotrjadowanje wučerkow, z kultusowym ministerstwom wothłosował.

Wot zastupjerja kultusoweho ministerstwa je sej zapósłanc AfD Frank Peschel na kromje posedźenja krajneho sejma žadał, zo njech serbsku rjadownju hnydom přizwola. A kubłanskopolitiska rěčnica SPD Sabine Friedel je ministerstwo wo stejišćo prosyła.

Norbergowa: Ličbu wučerjow na gymnaziju redukować na serbowacych

Dr. Madlenje Norbergowej spožčichu srjedu tydźenja w Choćebuzu Myto Miny Witkojc. Swoju dźaknu narěč je za to wužiła, zo by situaciju serbskeho ludu předewšěm na polu kubłanja wosebje w Delnjej Łužicy analyzowała.

Česćeny knježe statny sekretaro, česćeny knježe superintendento, česćene knjenje a knježa, lubi serbscy přećeljo.

Dźensa tule stać, zawjazuje mje k wěstemu nadawkej: Hdyž so móžnosć skići, měć tajkile zajimowany publikum, nochcu šansu skomdźić, zo bych někotre mysle k połoženju serbskeho ludu podała – takrjec krótku narěč narodej.