Čorny Chołmc (AK/SN). „Nad myjnicu wisa špihel“, Ruth Brězanowa pomału a jasnje serbsce čita. W Čornochołmčanskim Frenclowym domje nawjeduje Kulowska wučerka na wuměnku kurs serbšćiny za kubłarki a dalšich zajimcow. Na zašłym­ zetkanju zaběrachu so wobdźělnicy z rumnosćemi w bydlenju.

Malešanscy šulerjo přirodu filmowali

pjatk, 06. septembera 2019 spisane wot:

Stróža (SN/pdź). „GreenCut – Młodźina filmuje mnohotnosć přirody“ rěka wobswětowy projekt, kotryž tučasnje po cyłej Němskej přewjeduja. Za nim tči powšitkownowužitne towarstwo Gespa z. t., kotrež skutkuje na wšelakore wašnje na polach kubłanja, globalizacije a zhromadneho wuwića přichodowych konceptow. Projekt GreenCut, spěchowany wot zwjazkoweho zarjada za přirodoškit, skići něhdźe 30 skupinam zwjazkoweje republiki w běhu šěsć lět móžnosć, so jedyn tydźeń dołho intensiwnje a interaktiwnje z přirodu rozestajeć.

Jedna z wuzwolenych skupin je rja­downja 9 A Malešanskeje Wyšeje šule. Wot wutory do dźensnišeho je 23 šulerjow pod nawodom wučerki za biologiju Petry Hein biosferowy rezerwat Hornjołužiska hola a haty přeslědźiło. Sobudźěłaćerjej towarstwa Gespa spřistupništaj jim za to modernu techniku – přepytowanske nastroje, kamery we wšěch wulkosćach a samo trut (Drohne). Nadawk mjenujcy jenož njebě, holu a haty za za­jimawymi insektami, ptakami a dalšimi zwěrjatami přeslědźić, ale je tež filmować.

Zajutřišim, pjatk, w 19.30 hodź. dožiwi musical Worklečanskeje wyšeje šule „Quo vadis – dokal dźeš?“ w Chróšćanskej „Jednoće“ prapremjeru. Wčera stej tam režiserka Lisa Čornakowa a Sandra Viola Gellert (wotlěwa) rekwizity a jewišćowy wobraz přiho­towałoj. Druzy natwarichu runočasnje wšu trěbnu techniku. Foto: Feliks Haza

Na serbske korjenje njezabudu

wutora, 03. septembera 2019 spisane wot:

Ze swjedźenskimi kemšemi su njedźelu popołdnju w Rakečanskej ewangelskej cyrkwi swjedźenski tydźeń składnostnje dźesaćlětneho wobstaća Pawołskeje šule zahajili.

Rakecy (SN/mwe). W lěće 2009 z jednej rjadownju 5. lětnika wutworjena ma Pawołska šula dźensa wjace hač 150 šulerjow wot 5. do 10. lětnika. Kubłanišćo přisłuša ewangelskemu šulskemu towarstwu Budyskeho wokrjesa, w kotrymž maja tež Ewangelska srjedźna šula a powołanski gymnazij w Husce kaž tež Budyska Pěstowarnja swj. Michała swoje krute městno. Do Rakečanskeje šule chodźa přewažnje holcy a hólcy po wjesnej kaž tež Njeswačanskej a Wulkoždźarowskej zakładnej šuli. Mjez pjatnaće wučerjemi je wot tohole šulskeho lěta tež młody pedagoga Michał Kral z Róžanta.

Małe škrički nadźije

wutora, 03. septembera 2019 spisane wot:
Rakečanska Pawołska šula swjeći tele dny dźesaćlětne wobstaće. Ně, serbšćinu tam njepodawaja, ale najebać to na kubłanišću serbske korjenje začuwaš. Šulerjo přichadźeja ze wsow, hdźež běchu we 80tych lětach hišće aktiwne Domowinske sku­piny, hdźež wotměwachu so ryzy serbske zarjadowanja a swjedźenje. Njetrjebaš dołho přemyslować, što je z toho zwostało. Njetrjebaš tež wróćo zhladować a so wulce prašeć, čehodla tomu tak je. W ně­hdy ryzy serbskich swójbach je so naša maćeršćina zhubiła. Ćim bóle měli sej wuwědomić,­ kak wažne małe kroki su, małe škrički nadźije, sej serbskosć tež w Rakecach znowa do wědomja zwołać. A tak je swjedźenski tydźeń někotremužkuli z wučerjow a staršich přičina, tež na swoje serbske korjenje myslić. A snadź­ móhli z toho impulsy wurosć, na šuli serbšćinu podawać a staršim „serbskich wu­wróćow“ do swědomja rěčeć serbsku rěč wozrodźić. Měrćin Weclich

Dźakujemy so, ćeta Borbora!

póndźela, 02. septembera 2019 spisane wot:
Po 45 lětach powołanskeho skutkowanja je so wjelelětna kubłarka Njebjelčanskeje pěstowarnje „Barbojte kamuški – Jan Skala“ Borbora Čornakowa tele dny na zasłuženy wuměnk podała. Swojej „ćeće Borborje“ předstajichu dźěći mały program, mjez druhim ze spěwom, za nju spisanym. W mjenje Křesćansko-socialneho kubłanskeho skutka jako nošerja dźakowaše so jeho jednaćel Peter Neunert za spušćomne dźěło kubłarki w zajimje jej dowěrjenych dźěći. Nawodnica kubłanišća Viktorija Brězanowa­ zwjaza swój dźak z překwapjenku, mjenujcy z tortu w formje wutroby, kotruž je hromadźe z dźěćimi Borborje Čornakowej přepodała. Foto: Ute Große

Wodowe Hendrichecy (SN/BŠe). Wuknjacy Radworskeje wyšeje šule přebywaja tuchwilu we Wodowych Hendrichecach. Mjeztym zo je to za 10. lětnik zakónčaca jězba, w mjeńšich lětnikach wo to dźe, so mjez sobu lěpje zeznać. Za tych, kotřiž su runje hakle do 5. lětnika přišli, je to přiležnosć, sej nowe mjezwoča na ku­błanišću spřistupnić. Za to­ skići dźěćace wočerstwjenišćo Querxenland we Wodowych Hendrichecach dobre móžnosće. A tak pućuja šulerjo po blišej wokolinje abo so w kupjeli hnydom wokoło róžka wochłódnjeja.

Zwučuja za prěni musical šule

srjeda, 28. awgusta 2019 spisane wot:
Hólcy a holcy 6. do 10. lětnika Worklečanskeje wyšeje šule „Michał Hórnik“ přebywaja tuchwilu w šulskim wjesnym domje w Bórku při Budyskim spjatym jězoru. Tam zwučuja we wobłuku „šule w zelenym“ hišće hač do pjatka za 1. šulski musical „Quo vadis – dokal dźeš?“. 77 šulerjow je na nim wobdźělenych. Woni spěwaja, rejuja a hudźa. Nimo toho staraja so tež wo techniku a jewišćowy wobraz. Kruch rockoweje a popoweje hudźby spisali su wučerjo Syman Bjarš, Beno Hojer a Diana Šołćina. Režiju­ přewzała je Lisa Čornakowa. Premjera musicala budźe 6. septembra w Chróšćanskej „Jednoće“. Foto: SN/Hanka Šěnec

Ministerstwo myta wupisało

srjeda, 28. awgusta 2019 spisane wot:

Drježdźany (SN). Sakske kultusowe ministerstwo je spočatk šulskeho lěta wupisało 5. sakske šulske myto. Hač do 30. nowembra móža so šule wo 22 000 eurow hódne myta prócować. Ministerstwo pyta kubłanišća, kotrež so swojich wurjadnych projektow abo wuwićowych konceptow dla wot tamnych rozeznawaja. Projekty maja trajne być, poćah k šulskemu programej měć a nimo wulkeje ličby šulerjow a wučerjow tež staršich a eksternych partnerow zapřijeć.

Kultusowy minister Christian Piwarz (CDU) šule namołwja, swoje dźěło wjetšej zjawnosći předstajić. Prěni króć změja štyri myta w hódnoće 4 000 eurow w kategorijach zakładna, spěchowanska, wyša šula kaž tež gymnazij a powołanske šule. Po 2 000 eurach dotěrowane su wosebite myta „Europa na šuli“, „Mjezykulturalita“, kotrejž podpěruje Daetz-załožba, a „Wosobina čini šulu“, sponserowane wot kubłanskeje załožby Heraeus.

Šule móža so direktnje za myto požadać. Štyrnaće najlěpšich chcedźa jurorojo spočatk lěta 2020 wopytać. W meji wotměje so swjatočne mytowanje. Dalše informacije pod www.schulpreis.sachsen.de

Ralbicy (SN/JaW). Lektorka za dźěćacu lite­raturu a wuhotowar w Ludowym nakładnistwje Domowina (LND) Weronika Žurowa a Tomaš Šołta staj dźensa dopołdnja wosebity projekt ze 7. lětnikom Ralbičanskeje wyšeje šule zahajili. Pod hesłom „Naša serbska kniha“ ma hač do spo­čatka decembra nastać cyle nowa kniha z cyle nowymi wot šulerjow sa­mospi­sa­nymi fabulemi, zdźěli Weronika Žuro­wa na naprašowanje. Zaměr je, dźěći ze­znajomić z dźěłom a powołanjemi w nakładnistwje kaž tež wobdźělić so na na­staću serbskeje knihi wot spisa­nja při­­­noškow a zdźěłanja ilustracijow hač k ho­towej ćišćanej publi­kaciji. Šula bě wupisa­nje projekta LND dobyła. Na­mje­towała a přizjewiła je direktorka kubła­nišća Milenka Koberowa rjadownju z temu fabule. Dźensa staj so sobudźě­łaćerjej LND, lektorka Weronika Žurowa a wuhotowar Tomaš Šołta, we wobłuku wučby serbšćiny – tam so mjenujcy z fabulemi za­bě­raja – dźěćom najprjedy raz předstajiłoj a jim wotběh a jednotliwe kroki projekta a terminowy plan rozło­žiłoj.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND