Na zhromadnu konferencu

srjeda, 30. januara 2019 spisane wot:

Choćebuz (SN). Serbski sejm – na swojim zeńdźenju 12. januara we Wětošowje – a předsydstwo Domowinskeje župy Delnja Łužica na swojim posedźenju 22. januara w Choćebuzu stej namjetowałoj, kubłansku konferencu přewjesć. Zakład toho su njespokojace wuslědki ewalua­cije Witaj-projekta a z nimi zwjazany staw wozrodźenja delnjoserbšćiny.

„Zwažich­ sej tuž namjet, zhromadnje organizo­wanu kubłansku konferencu w Delnjej Łu­žicy přewjesć“, zdźěli čłon Serbskeho sejm­a Hanzo Wylem-Kell. „Wothłós na konkretny namjet k trěb­nemu a wot mnohich wočakowanemu zhromadnemu dźěłu mjez sejmom a Domowinu bě, kaž wočakowane, spočatnje rozdźělny.“

Hanzo Wylem-Kell so praša, „hač njeje najwjetši čas, w ekstencielnych prašenjach so doro­zumić a je zhromadnje rozrisać spytać­. Móžemy sej dowolić, idejow, přinoškow a pomocy so wzdać a porno tomu­ wosobinske animozity a lawny pěsto­wać. Njewěrju to a bych so tuž nad prěnjej zhromadnej kročelu, runje před po­zad­kom aktualneje nuzy, jara wjeselił.“ Wylem-Kell by tajke postupowanje měł za signal rozmacha a rozputanja swójskich potencialow.

Wyše šule bóle připóznate

srjeda, 30. januara 2019 spisane wot:

Přiwšěm njemóža wučerski personal na wšěch kubłanišćach zawěsćić

Drježdźany (SN/MiR). Dokument „Kubłanje w Sakskej w špihelu narodneho kubłanskeho rozprawnistwa 2018“ pokazuje na dobroty a njedostatki sakskeje kubłanskeje politiki. Prěni króć bě rozprawu slědźenski institut zdźěłał, to rěka eksternje, zwonka sakskeho ministerstwa za kultus. Leibnitzowy institut za kubłanske slědźenje a informaciju, kiž bě před něšto měsacami hižo narodnu kubłansku rozprawy zdźěłał, je nadawk přewzał, přepytować sakski kubłanski system, a wobswědča Sakskej dobre wuslědki. Tele dopóznaće zwurazni statny minister za kultus Christian Piwarz (CDU). „Je to sprawna rozprawa, kotraž sylnosće a słabosće sakskeho kubłanskeho systema jasnje pomjenuje“, rjekny minister. Wobkrućił bě to tež sakski statny sekretar Herbert Wolff na přepodaću zastojniskeho wopisma wučerjam zańdźeny štwórtk w Budyšinje. „Kubłanska rozprawa pokazuje nam sylnosće a słabosće. Naš zaměr je kubłanski system w cyłku doprědka přinjesć.

W hotowanju drasty so wukmanili

srjeda, 30. januara 2019 spisane wot:

Čłonojo Drježdźanskeho towarstwa Stup dale z.t. so prócuja dorosćenym zajimcam a swojim dźěćom wobstajnje nowe serbskorěčne rumy spřistupnjeć. Njedawno zaběrachu so z katolskej narodnej drastu a swjećachu ptači kwas.

Drježdźany (MŠw/SN/MiR). Towarstwo Stup dale z. t. je zańdźenu sobotu přeprosyło zajimcow na wosebitu dźěłarničku do sakskeje stolicy. Sydom młodych maćerjow a kubłarkow je so pod nawodom hotowańče Kristin Belkotoweje z Hózka w Drježdźanach-Łóškecach (Loschwitz) wobdźěliło na kursu wo hotowanju serbskeje drasty. Při tym zaběrachu so z katolskej swjedźenskej, družčej a njewjesćinskej drastu.

Wojerowski Lessingowy gymnazij je zańdźeny pjatk na dźeń wotewrjenych duri přeprosył. We Wojerowskej drasće witaštej šulerce­ wopytowarjow z chlěbom a selu. Na kubłanišću poskićeja profil serbšćiny, w kotrymž serbskorěčne znajomosće zajimcow­ wot 5. do 12. lětnika indiwiduelnje spěchuja. Foto: Robert Brinckmann

Worklecy (SN/MiR). Zańdźeny pjatk bě sakski statny minister za kultus Christian Piwarz (CDU) hósć Worklečanskeje Serbskeje wyšeje šule „Michał Hórnik“. Sćěhował je přeprošenje zapósłanca Sakskeho krajneho sejma Alojsa Mikławška (CDU), nawody kubłanišća, wučerjow a zastupjerjow staršich.

Wjesele ptači kwas swjećili

póndźela, 28. januara 2019 spisane wot:

Předšulske a hortowe dźěći politikarjow a přiwuznych překwapili

Radwor/Chrósćicy (SN/BŠe/MiR). Ptačokwasny program w Drježdźanskej statnej kencliji pokazać bě lětsa česć chowancow Radworskeho katolskeho dźěćaceho domu „Alojs Andricki“. Hižo někotre tydźenje běchu so předšulske dźěći na wjeršk přihotowali a su jón minjeny pjatk ministerskemu prezidentej Michaelej Kretschmerej (CDU) pokazali. Hižo wot ranja w šesćich započachu kubłarki holčki za wosebity dźeń serbsku narodnu drastu zwoblěkać. Prjedy hač podachu so dźěći z busom do stolicy Sakskeje, pokazachu wone swój program wuměnkarjam, dźědam, wowkam kaž tež staršim. Zdobom bě lětuši program posledni pod nawodnistwom Moniki Bukoweje. Po 44 lětach skutkowanja, něhdźe 40 lět z toho jako nawodnica dźěćaceho domu, poda so wona kónc februara na wuměnk. Naslědnistwo přewozmje potom Andrea Henichowa.

W Budyskej regionalnej wotnožce Sakske­ho krajneho zarjada za šulu a kubła­nje (LaSuB) přija wčera popoł­dnju 41 wučerkow a wučerjow wopismo zastojnika. Woni běchu jedna z prěnich­ skupin po wšej Sakskej.

Budyšin (SN/MiR). Mjez tymi, kotřiž su wčera do zarjada přišli, bě tež wučer serbskeho pochada. W štwórtej ze štyrjoch skupin móžeše Maćij Čižank, wučer Budyskeho Serbskeho gymnazija za něm­činu a stawizny, z rukow statneho sekretara Herberta Wolffa wopismo zastojnika přijeć. Do toho pak měješe runja swojim kolegam z pozběhnjenej ruku spřisahać, zo chcedźa zastojnistwo po najlěpšej wědźe a wědomju wukonjeć, wustawu wobkedźbować, prawo zakitować a prawdu napřećo wšitkim nałožować. Mnozy dodachu swojej přisaze „z Božej pomocu“. Maćij Čižank po swjatočnym akće rjekny: „Runje za sakski šulski system je to kročel doprědka, toho abo tamneho wučerja docpěć abo wróćo zdobyć. Wosobinsce so za mnje ničo njezměni, nastupajo swoje dźěło w šuli docyła ničo.“

Hdźe su serbske dźěći?

pjatk, 25. januara 2019 spisane wot:
Ptački kwasuja! Předewšěm činja to nětko zaso w pěstowarnjach a šulach. Tam na to dźiwaja, zo wosebje serbske dźěći nałožk w swojej maćeršćinje zwobraznjeja. Na tamnym boku wuměłcy Serbskeho ludoweho ansambla dźěćom kóžde lěto znowa spo­dobny program wuhotuja. A kedźbuja na to, zo přećam wučerjow a kubłarjow wotpowěduja. Ći pokazuja na to, zo njemóža wšitcy jich chowancy serbsku rěč na jewišću běžnje sćěhować. Přiwšěm serbšćina na wšěch ptačokwasnych zarjadowanjach SLA rólu hraje. A to je derje tak! Přiwšěm, před lětami mějachmy w Chróšćicach a Budyšinje wjace hač jeničce­ tři ryzy serbskorěčne předstajenja ptačokwasneho programa. Prašam so, hdźe su serbskorěčne dźěći wostali? Hdźe su te, kotrež wuknu jako njeserbske serbšćinu na maćernorěčnym niwowje, a to wot časa žłobika? Znajmjeńša šulerjo dyrbjeli teksty, kotrež su zwjetša lochce spisane, zrozumić, abo? Milenka Rječcyna

Ptački zaso kwasuja

štwórtk, 24. januara 2019 spisane wot:
Nětko zaso ptačokwasne ćahi ludźi po wšej Łužicy zahorjeja. Wčera hižo su dźěći Čornochołmčanskeje pěstowarnje „Krabat“ swjećili, a braška Matthes je ćah kwasarjow nawjedował. Njewjesta Finja a nawo­ženja Dante za nim kročeštaj. Na wjesnej žurli su woni zhromadnje ze wšěmi chowancami pěstowarnje, kotraž je w nošer­stwje Dźěłaćerskeho dobroćelstwa Łužica, swójbnym, wjesnjanam a mnohim dalšim hosćom krasny ptačokwasny program předstajili. Foto: Silke Richter

Serbske a serbšćinu podawace šule přeprošeja tuchwilu na dźeń wotewrjenych duri. Tak mějachu starši a jich dźěći składnosć, so zańdźenu sobotu po wšelkich kubłanišćach rozhladować.

Wóslink/Kulow/Radwor/Wojerecy (DJ/AK/MiR). Wopytowarjam Wóslinčanskeje Ewangelskeje srjedźneje šule njebě zańdźenu sobotu lochko parkowanišćo namakać. Wšako su sej mnozy tam do­jěli. Šulerjo běchu w jědźerni spodobny kulturny program přihotowali. Dźesat­karjo poskićachu tykanc a kofej. Starši, nětčiši a přichodni šulerjo kaž tež dalši přiwuzni wužiwachu přiležnosć rozmołwy. A rozhladowachu so po fachowych rumnosćach. Tam bě składnosć z wučerjemi, kotřiž fachowe předmjety wuwučuja, rozmołwjeć. Mjez wopytowarjemi bě tež wulka ličba něhdyšich šulerjow a jich staršich, štož zwuraznja wosebitu zwjazanosć šule ze staršiskimi domami. Tuž słuša dźak šulerjam, wučerjam a přistajenym Wóslinčanskeho kubłanišća, kotřiž so kóžde lěto znowa za to zasadźeja, zo je dźeń wotewrjenych duri wosebity wjeršk w běhu šulskeho lěta.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND