Mjeze wsu a městom

wutora, 26. apryla 2022 spisane wot:
Dźěći a młodostni, kotřiž su jako ćěkancy do Němskeje přišli, maja po móžnosći spěšnje dóstać składnosć, na šuli wuknyć. Zo pak husto blisko swojich bydlenskich městnow njewuknu, ale zo dyrbja z busom hač do zdalenišeje šuli jězdźić, – to so mi cyle njewujasni. Wosebje nic, hdyž maja bliske šule wuměnjenja kaž šula w měsće, nastupajo předewšěm personal a šulerske kapacity. Někotre ukrainske dźěći ­a ukrainscy młodostni, kotřiž maja jako připóznaći ćěkancy šulu wopytać a na wsy bydla, dyrbja jězdźić wšědnje do Budyšina do šule, byrnjež we wsy šula je. Wěm, přebytk w měsće ma předewšěm za młodych wuknjacych přijomne stronki, štož zabawu a zaběru po šuli nastupa. Rozumju pak tež tych, kotřiž so wo integraciju ćěkancow w swojich bydlišćach prócuja a chcedźa, zo by so to tež na polu kubłanja radźiło. Tuž sej přeju, zo bychu młodźi nowi wjesni wobydlerjo móhli wopytać blisku serbsku šulu a při wšěm dóstali składnosć sej žiwjenje w městach wotkryć. Milenka Rječcyna

Roboterej puć pokazali

štwórtk, 21. apryla 2022 spisane wot:
Wosebity prózdninski poskitk dožiwichu dźensa Alexander, Timo a Noah w Budyskej měšćanskej bibliotece, kotraž poskića prěni raz móžnosć, so z roboterom ­Ozobot zeznać. Z barbnym kodom programěrowany mały roboter z pomocu sensorow wšelake barby spóznawa. Tak móžachu wobdźělnicy roboterej šćežku narysować, po kotrejž potom jězdźeše. Nawoda poskitka Aaron Laber, kotryž zdokonja tučasnje dobrowólnu socialnu słužbu w Budyskej měšćanskej bibliotece, běše dźěćom při tym po boku. Biblioteka je robotery přez regionalnu matematisko-technisku syć MINOS kupiła a chce je w dalšich projektach zasadźić. Foto: SN/Božena Šimanec

Budyšin (SN/MiR). Za durjemi žurle Serbskeho domu a biblioteki Rěčneho centruma WITAJ w Budyšinje knježi wulka ćišina. Njewšědne to začuće, wšako su prózdniny a za durjemi přebywaja dźěći. Samo jako Bianka Rachelic rumnosć wopušći, šćebotanje słyšeć njeje. Nawopak, dźěći, kotrež dožiwja na ferialnym kursu RCW wosebity serbskorěčny rum, wěnuja so z wulkej koncentraciju swojim nadawkam. Bianka Rachelic a Lydija Matikec studujetej na Lipšćanskej uniwersiće wučerstwo, Bianka za gymnazij a Lydija za wyšu šulu. Runja jimaj wuwučuje ­na kursu RCW Christiana Bukec, kotraž studuje wučerstwo za zakładnu šulu na Drježdźanskej Techniskej uniwersiće. Wšitke tři wěnuja so dźěćom wot 1. do 6. lětnika, kotrež zaběraja so wot wčerawšeho hač do pjatka z tym, so w serbskej rěči wukmanjeć a ju dožiwić. Za to su přichodne wučerki zhromadnje z Michaelu Hrjehorjowej, kotraž je ze stron RCW za projekt zamołwita, wotpowědny program přihotowali. Dwójce je so wona do toho ze studentkami zetkała a jim koncept kursa předstajiła.

Wóskowanje dźěl šulskeho projekta

srjeda, 13. apryla 2022 spisane wot:
Šulerjo Wulkodubrawskeje zakładneje šule su wčera hromadźe z Marlis Konjechtec z towarstwa Radiška jejka wóskowali. Wona je jim techniku a mustry pokazała, małe wuměłske twórby hromadźe wobarbichu. Su-li hotowe, přihotuja je wučerki za wubědźowanje Spěchowanskeho kruha za serbske ludowe wuměłstwo a pósćelu je do Budyšina. 1. a 2. lětnik wóskowaštej tež dźensa, jutře debitej 3. a 4. lětnik jejka. Wóskowanje słuša do šulskeho projekta, w kotrymž zaběraja so wšitcy šulerjo zakładneje šule ze serbskej rěču, z kulturu a nałožkami. W meji wopytaja Krabatowy młyn a w juniju zeznaja serbske instrumenty wot hudźbnikow SLA. Foto: Katja Liznarjec

Wodowe Hendrichecy (SN/MiR). 52. króć su so serbšćinarjo wubědźowali wo najlěpše wukony. Mjeztym zo so něhdy šulerjo­ 6. a 8. lětnika na olympiadu zet­kachu, je wubědźowanje mjeztym hižo wjacore lěta stajnje za šulerjow 6. lětnika wjeršk šulskeho lěta. Lětsa bě so wot přizjewjenych 50 šulerjow a šulerjow ze serb­skich a serbšćinu wuwučowacych šulow 43 na wurisanju we wočerstwjenišću KIEZ we Wodowych Hendrichecach wobdźěliło. Z nimale kóždeje šule běchu wučerjo serbšćiny abo w swojich fachowych předmjetach w serbskej rěči wu­wučowacy wučerjo sobu jěli, zo bychu na jednym boku swojich šulerjow po­ho­njeli, na druhim pak w jury jich wukony posudźowali. Lětsa běchu prěni króć wuzwolili naj­lěp­šu skupinu, kotraž bě zhromadnje přihotowała plakat a prezentaciju. W cyłku wojowaše sydom skupin wo dobyće. Zaběrali běchu so wobdźělnicy z temu „Pčołka“. Trěbnu wědu posrědkowała je jim pčołarka Daniela Ćemjerjowa z Worklec. Poručiłoj běštej temu fachowej poradźowarce za serb­šćinu Katka Bukowa a Milenka Ertelowa hižo na 51.

Pisomne nadawki zmištrowali

štwórtk, 07. apryla 2022 spisane wot:
Na lětušej olympiadźe serbskeje rěče, zarjadowanej wot Serbskeho šulskeho towarstwa, dopokazaja šulerki a šulerjo serbskich a serbšćinu wuwučowacych šulow swoje wukony w serbšćinje. Hólcy a holcy, kotřiž wuknu w 6. lětniku, maja nadawki spjelnić, kotrež zaběraja so z temu „Pčołka“. Wot wčera do pjatka přebywaja woni we wočerstwjenišću we Wodowych Hendrichecach. Dźensa su pisomne nadawki spjelnili. Jutře, po ertnym pruwowanju, maja wobdźěleni wučerjo wukony serbšćinarjow wuhódnoćić. Krótko do připołdnja dóstanu wšitcy wobdźělnicy a wobdźělniče ­wopisma wobdźělenja a mały dar. Foto: Michaela Młynkec

Porjedźenka

srjeda, 06. apryla 2022 spisane wot:
W přinošku „Wulka swójbna schadźowanka“, wozjewjeny póndźelu, 4. apryla, na 4. stronje Serbskich Nowin, je so nažel zmylk stał. Županka Kamjenskeje župy „Michał Hórnik“, kotraž je zdobom nawodnica Radworskeje Serbskeje wyšeje šule „Dr. Marja Grólmusec“, rěka Diana Wowčerjowa. Prosymy wo wodaće za misnjenje.

Budyšin (MaU/SN). Na lětušim 18. čitanskim wubědźowanju Rěčneho centruma WITAJ minjenu sobotu na žurli Serbskeho muzeja Budyšin wobdźělichu so wosom šulerkow a sydom šulerjow 3. lětnika. Někotři běchu so na swojej šuli w castingu přesadźili, a tak z podpěru wučerja abo wučerki kaž tež doma ze staršimi zwučowali. Druhim běchu wučerjo poručili so přizjewić a so na wubědźowanje přihotować. Wurisanje dobyłoj staj z rjadu dźewjeć serbskich wobdźělnicow/kow Paul Čuška z Worklec a z rjadu šesćoch, kotřiž serbšćinu wuknu, Helena Piwarcec z Wojerec. Měritka, po kotrychž jury, kotrejž­ přisłušachu Manuela Smolina, Sylwija Wjeńcyna, Ludmila Wićazowa, Janina­ Mikławškowa a Lucijan Kubica posu­dźowaše, njeběchu připosłucharjam wozjewili.

Porjedźenka

póndźela, 04. apryla 2022 spisane wot:
W přinošku Serbskich Nowin z 31. měrca „Mysli dale na dobro Serbstwa“ jewi so njezbožownje přełoženy citat, skomolacy poprawne wuprajenje. Prawje ma rěkać: „Njemóžemy wuspěch Witaj-modela jenož měrić po docpětej rěčnej kwaliće dźensa, ...“. Redakcija prosy wo wodaće za misnjenje.

Wulka swójbna schadźowanka

póndźela, 04. apryla 2022 spisane wot:

Chrósćicy (SN/MiR). Něhdźe 400 dorosćenych a dźěći bě wčera popołdnju do Chróšćanskeje Jednoty přichwatało. Rěčny centrum WITAJ bě zhromadnje z Kamjenskej župu „Michał Hórnik“ přeprosył na mjeztym 11. swójbnu schadźowanku. Wulke bě wjeselo nad tym, so skónčnje zaso zetkać móc. Jenož mało přitomnych bě nahubnik wužiwał. Tohodla liča někotři přitomni z tym, zo přichodne dny ličba z koronu inficěrowanych w serbskich wsach zaso přiběra.

nowostki LND