Forum njebudźe

štwórtk, 04. nowembera 2021 spisane wot:
Chrósćicy (SN/MiR). Lětuši fachowy dźeń 2plus měješe so tónle pjatk a so­botu w Chrósćicach wotměwać. Dźensa bu zarjadowanje Sakskeho ministerstwa za kul­tus a Budyskeho stejnišća Krajneho zarjada za šulu (LaSuB) w kooperaciji z Rěčnym centrumom WITAJ wotprajene. Přičina je tuchwilu sylne wupřestrěwanje infekcijow. To zdźěli zamołwity za naležnosće serbskich šulow pola LaSuB Bosćij Handrik. Zarjadowarjo pak chcedźa poskitki fachoweho dnja přiwšěm spřistupnić. Tak maja so planowane rozmołwne koła a dźěłarnički kaž tež za­rja­dowanje za wjesnjanostow, šulskich nawodow, gmejnskich radźićelow a dalšich zajimcow nachwatać abo bórze jako online-poskitk přewjesć. Wšitke informacije wo dalšim postupowanju maja so na internetnej stronje wozjewić. Impulsowe přednoški kaž tež podcasty a móžnosć swójske měnjenje zwura­znić abo prašenja stajeć, su zajimcam tam dale­ k dispoziciji. Na internetnej stronje ma so bórze tež wobłuk­ za wuměnu serbskorěčnych wučbnych materialijow zarjadować.

W muzeju stawizny města zeznali

pjatk, 29. oktobera 2021 spisane wot:
Dźěći Chróšćanskeho horta wopytachu tutón tydźeń Budyski měšćanski muzej. Muzejo­wa pedagogowka rozłoži holcam a hólcam zwisk mjez hudźbu a molerstwom. W mjeńšich skupinkach podachu so po wšelakich rumnosćach a wotkrychu sej stawizny města a jeho wobydlerstwa. W krótkim času móžachu jenož mały dźěl měšćanskeho muzeja zeznać. Zawěsće starši namjetej swojich dźěći za dalši wopyt muzeja rady sćěhuja. Foto: Katrin Wokowa

Lětanski simulator předstajili

wutora, 26. oktobera 2021 spisane wot:
Nowy lětanski simulator dźěłoweho zjednoćenstwa Sim’n’Fly Choćebuskeho Maxa Steenbeckoweho gymnazija měješe kónc tydźenja na tamnišich nazymskich wikach premjeru. Gymnaziasća běchu z hosćom na wustajenišću Wjelcejskeho lětanišća a lětanskeje šule Sprjewja-Nysa-lět a předstajichu tam dwusedłowe ultralochke ­lětadło. Při tym su samoprograměrowanu sceneriju Rańskeho jězora a noweho přistawa předstajili. Přichodnje maja wopytowarjo Choćebuskeho lětanišćoweho muzeja lěpšinu z lětanskeho simulatora měć. Na našim foće „leći“ nawoda dźěłoweho zjednoćenstwa Jörg Mannl (naprawo) z wopytowarjom Uwe Buchanom w simula­torje k Rańskemu jězorej. Foto: Michael Helbig

Kónčne wuswědčenja přepodali

srjeda, 20. oktobera 2021 spisane wot:
We wobłuku swjedźenskeho zarjadowanja su minjeny pjatk w Budyskej „Krónje“ 138 absolwentkam a absolwentam statneje studijneje akademije kónčne wuswěd­čenja přepodali. Wjeršk bě spožčenje absolwentskich mytow za wobłukaj technika a hospodarstwo. Myto za techniku dósta Robin Dittrich (2. wotlěwa), tule z Wolfgangom Fröbu wot firmy LTB, kiž jeho w praksy podpěruje. Lindźe Hausch (3. wotlěwa) spožčichu ­myto za hospodarstwo. Dale na wobrazu widźeć staj Lore Schöffel wot ­Budyskeje ­lutowarnje, kiž pjenježne myto sponseruje, a prof. Gerald Svarovsky, předsyda přirady Budyskeho kubłanišća a sponsor pokalow absolwentow. Foto: Holger Hinz

Prawy puć

wutora, 19. oktobera 2021 spisane wot:
Z wulkim zajimom sym so minjeny kónc tydźenja ze swójbu na zetkanju serbskich swójbow z Hornjeje a Delnjeje Łužicy wobdźěliła, kotrež bě Serbske šulske towarstwo organizowało. Přiznawam wšak, zo njemóžach sej tak prawje předstajić, što móhł wotmysł zetkanja być. Tola po tym zo je nam organizatorka z Delnjeje Łužicy wotběh rozłožiła, běch wćipna. Započachmy z njewšědnym interaktiwnym předstajenjom wobdźělnikow w hornjo- a delnjoserbskej rěči. A tu so pokaza, zo njejsmy jeno ze wšelakich kónčin přijěli, ale mamy tež wšelake předstawy, štož serbsku identitu nastupa. Zakładne prašenje, kotrež sej při tym stajich, běše: Što mje poprawom jako Serbowku wučinja – rěč, domizna, ­tradicija? A kak to Serbja z druhich kónčin widźa? Rěč, kotraž je mi wažna, pola ­kóždeho na prěnim městnje njesteji. Při­wšěm čujachmy so wšitcy zwjazani. Tele kónctydźenske zetkanje mi cyle jasnje pokaza, zo je tajka wuměna złoto hódna. Dale tak! Božena Šimanec

Poradźeny kónc tydźenja

wutora, 19. oktobera 2021 spisane wot:

Wodowe Hendrichecy (SN/bš). Něhdźe 60 serbskich dźěći a jich staršich je so ­minjeny kónc tydźenja na prěnim zetkanju serbskich swójbow z Hornjeje a Delnjeje Łužicy wobdźěliło. Hač z Bad Freienwaldy, Drježdźan abo Janšojc, hač z ćahom abo awtom – witajo ideju su sej wone rady do Wodowych Hendrichec dojědźechu. Projekt Serbskeho šulskeho towarstwa steješe pod hesłom „Kokoška na nazymskim pućowanju“ a bě spěchowany přez załožbu za serbski lud.

Nowy semester zahajeny

póndźela, 18. oktobera 2021 spisane wot:

Europska uniwersita Viadrina pak wjace hač tysac studowacych zhubiła

Frankfurt nad Wódru (RD/SN). Z nimale 5 000 studowacymi je Europska uni­wer­sita Viadrina Frankfurt nad Wódru dźensa do nazymskeho semestra 2021/2022 startowała. Wo tym informowaše pre­zidentka Viadriny prof. dr. Julia von Blumenthal minjeny štwórtk na nowinarskej konferency. Tež hdyž poslednje za­pisanja hišće běža, wo­znamjenja podata ličba drastiski spad. Dokładnje 6 020 studowacych bě w nazymskim semestrje 2019/ 2020, poslednim do koronapandemije, na Frankfurtskim wysokošulskim kubłanišću zapi­sanych. Hižo tehdy bě Viadrina wo tójšto wot rekordneje ličby zdalena, docpěteje w lěće 2016 ze 6 716. Přičiny hoberskeho spada nimo korony mjenowali njejsu.

Nazymska zaběra w internaće

štwórtk, 14. oktobera 2021 spisane wot:
Nazyma je takrjec tež do internata Budyskeho Serbskeho gymnazija zaćahnyła. Chłódne wjedro je wčera wobydlerjow internata wabiło, sej zhromadnje kirbsowu poliwku zwarić a sej ju k wječeri zesłodźeć dać. Wariłoj stej ju Janika Koberec a Salome Bjeńšec. Tajke aktiwity zwonka šulskeje wučby su spomóžne za mjezsobny poměr a přinošuja k dobrej atmosferje w internaće. Foto: Weronika Cyžowa

Lipsk (SN/JBo). Na Instituće za sorabi­stiku Lipšćanskeje uniwersity su wčera nowych studentow witali. Dohromady dźewjeć nowačkam přeješe nawoda instituta prof. Edward Wornar dobry start do noweho žiwjenskeho wotrězka.

Za studij wučerstwa su so šěsć hornjoserbskich a jedna delnjoserbska studentka rozsudźili. Mjez nowačkami je runje tak jedna hornjoserbska studentka a jedyn student z Pólskeje, kotrajž wotnětka w Lipsku sorabistiku na magistra stu­dujetaj. Prof. Wornar rozłoži přitomnym studentam a studentkam kaž tež hosćom wažnosć słowjanskich rěčow k rozumjenju serbšćiny. Z Łužicy běchu sej před­syda Domowiny Dawid Statnik, kubłanska referentka třěšneho zwjazka Kathrin Suchec-Dźisławkowa, sobudźěłaćerka Rěč­neho centruma WITAJ Manuela Smolina, předsydka Serbskeho šulskeho towarstwa Katharina Jurkowa a z Budy­skeje wotnožki Krajneho zarjada za šulu a kubłanje zamołwity za serbske kubłanišća Bosćij Handrik dojěli. Tež prof. Goro Christoph Kimura z Japanskeje, kiž tučas­nje w Lipsku bydli, bě wčera přitomny.

Wuspěšne certifikacije

srjeda, 29. septembera 2021 spisane wot:

Choćebuz (MN/SN). Na wuspěšnje přewjedźenu certifikaciju hornjo- a delnjoserbskeje rěče zhladuje Rěčny centrum WITAJ (RCW) lětsa w Hornjej a Delnjej Łužicy. W Budyšinje wotměwa so certifikacija w rytmusu nalěto a nazyma, w Delnjej Łužicy změja za to w nazymje dwaj terminaj.

Korony dla njebě móžno hornjołužiski termin w nalěću dodźeržeć, wotpowědne pruwowanja su w juliju nachwatali. W Hornjej Łužicy bě so dohromady dźewjeć kandidatkow a kandidatow pru­wo­wać w niwowach A2, B1 a B2 dało. Třo z nich běchu stipendiaća Załožby za serb­ski lud na Lipšćanskej uniwersiće, tamni běchu eksterni zajimcy. Wšitke wobdźělnicy a wšitcy wobdźělnicy su pruwowanja wuspěšnje złožili.

Serbska debata

nowostki LND