Slepo (CK/SN). Hort Němsko-serbskeho šulskeho centruma w Slepom ma wotnětka swójske mjeno. Minjeny pjatk staj Slepjanski drjeworězbar Tomas Schwarza a rěčnica Domowiny za Slepjanski region Diana Maticowa zhromadnje z dźěćimi we wobłuku swjatočnosće w sportowej hali banćiki při skulpturje „Błudnički“, kotraž njedaloko zachoda do horta přichadźacych wita, roztřihałoj. Něhdźe ­štyri metry wysoka postawa je zdobom dźesata stacija serbskeje šćežki powědkow, kotraž tuchwilu w Slepom nastawa. Na płoće šulskeje ležownosće ma za něšto tydźenjow slědować tafla. Tak móža so tež wonkowni zajimcy wo błudničkach informować.

Zhromadnje z dźěćimi podachu so kubłarjo a kubłarki do swěta powědkow a počachu so za błudnički zajimować. Fosforeskowace swětleška wodźa ludźi po bahnu. „Runje tak chcemy tež my być dźěćom pokazowaki, chcemy jim być ­poboku pomocliwi a wobchad połny mjezsobneho respekta pěstować“, rjekny Christin Becker.

Hory (JK/SN). Rěčny centrum WITAJ (RCW) je cyłodnjowsku kubłansku wuprawu za kubłarki a kubłarjow pěstowarnjow a hortow wšelakich nošerstwow zarjadował. Wospjetny poskitk wjedźeše tónkróć do Horow pola Wojerec. Kubłarki ze šěsć dźěćacych dnjowych přebywanišćow zetkachu so w tamnišim kubłanišću „Lutki“. W nim kubłuja dźěći w dwěmaj žłobikowymaj a třoch pěstowarskich skupinach po metodźe Witaj. Wjednica dźěćaceho dnjoweho přebywanišća Petra Sulkowa a tři serbske kubłarki rozprawjachu hosćom wo swojim rěčnokubłanskim dźěle a wo mnohich kulturnych podawkach w běhu lěta, na kotrychž hraja serbska rěč, kultura a zwjazanosć z ludźimi we wsy wažnu rólu. Tak je to mjez druhim při pěstowanju nałožkow kaž při camprowanju, kotrež je typiske za Wojerowski region. Kubłarki rozprawjachu dale wo rěčnej situaciji w regionje. Byrnjež so w swójbach – hač na jednotliwe wuwzaća – jenož němsce rěčało, so tola wšitke dźěći na serbskorěčnym kubłanju w žłobiku a pěstowarni wobdźěla. Mjenje samozrozumliwosće pokazuje so w slědowacym šulskim kubłanju.