Podstupim/Mužakow (SN/MiR). Areal kołowokoło jednaćelnje Němsko-pólskeho geoparka UNESCO Mužakowski zahork ma nowy napohlad dóstać. Tele dny su za to přihotowanske dźěła zahajili. Aktualny projekt wopřijima dale koncepciju wustajeńcy wo geoparku.
Projekt chcedźa zwoprawdźić z pjenježnej podpěru braniborskeho ministerstwa za hospodarstwo. Te přewostaji gmejnje Dolina Nysy a Małksy 450 000 eurow ze srědkow politiskich stron a masowych organizacijow bywšeje Němskeje demokratiskeje republiki (NDR), tak mjenowane PMO-srědki. „Sym přeswědčeny, zo stanje so geopark dale a woblubowaniši“, rjekny braniborski hospodarski minister Jörg Steinbach (SPD).
Drježdźany/Budyšin (SN/MiR). Wodźenska skupina 2plus sakskeho ministerstwa za kultus (SMK) je wčera pod nawodom jeho referentki Kerstin Wittig online wuradźowała. We wobłuku wjacore hodźiny trajaceho wuradźowanja zaběrachu so zastupjerjo Domowiny, Rěčneho centruma WITAJ, Budyskeje a Radebeulskeje wotnožki krajneho zarjada za šulu a kubłanje (LaSuB) kaž tež Serbskeho šulskeho towarstwa ze stawom ewaluacije koncepta 2plus. Prjedy hač budu wuslědki wozjewjene, je trjeba so dale z dotalnymi wuslědkami rozestajeć.
Spěchowanski program „Partnerstwo za demokratiju Budyskeho wokrjesa“ podpěruje ludźi a iniciatiwy, kiž zasadźeja so za zhromadne žiwjenje połne respekta. Podpěru dóstawaja při tym ze zwjazkoweho programa „Demokratisce žiwi być!“.
Wojerecy/Biskopicy (SN/MiR). Za swój aktualny projekt „Na jenakej runinje“ wabi Partnerstwo za demokratiju Budyskeho wokrjesa w němskej a serbskej rěči. Sandra Schäfer, kotraž zajimcow poradźuje, wuswětla: „Namołwjeni, nam swoje ideje z mjenowaneho wobłuka podać, su wobydlerjo, iniciatiwy a towarstwa w měsće Wojerecach a we wokolinje. Runje tam su hišće mnozy ludźo, kotřiž serbsce rěča, štož rady připóznawamy. Tuž informacije tež w serbskej rěči posrědkujemy.“ Za dwurěčnosć wuprajił je so wosebje přewodźenski wuběrk programa „Partnerstwo za demokratiju“.
Rěčny centrum WITAJ je loni 20. róčnicu załoženja swjećił. Bosćan Nawka je so z nawodnicu RCW dr. Beatu Brězanowej wo jubileju, stawiznach a perspektiwach wotrjada Domowiny za wožiwjenje, spěchowanje a rozšěrjenje serbskeju rěčow rozmołwjał.
Knjeni dr. Brězanowa – 20 lět, to je šwarna doba. Što Wam jako prěnje do myslow přińdźe, zhladujeće-li na prěnjej lětdźesatkaj skutkowanja RCW?
Worklecy (SN/MiR). Šulerjo dweju rjadownjow 6. lětnika Serbskeje wyšeje šule „Michał Hórnik“ Worklecy běchu wčera chětro napjeći. Wědźachu, zo maja, ně, zo chcedźa wosebity nadawk spjelnić. Su so tuž na wopyt z Ludoweho nakładnistwa Domowina wjeselili.
Lektorka Weronika Žurowa a zhotowjer Tomaš Šołta rěčeštaj ze šulerjemi wo zhromadnym projekće „Naša serbska kniha“. Ze stron kubłanišća budu jón wučerjej za serbšćinu Šćěpan Wjeńka a Katka Bukowa kaž tež wučerka za wuměłske kubłanje Claudia Čornakowa přewodźeć. „Z projektom jako LND swój wotpohlad dale wjedźemy, zwisk do šulow nawjazać a šulerjow wo nastaću serbskeje literatury informować“, zwurazni Weronika Žurowa, „zdobom chcemy jich zajimować za powołanja, kotrež móža pozdźišo w nakładnistwje wuknyć a wukonjeć. A nimo toho nam wo to dźe dźěći do pisanja tež literarnych tekstow zmužić.“ Zo by so to wšo radźiło, chcedźa šulerjo přichodne tydźenje w swojich wsach pytać za wosebitymi městnosćemi, kaž su to typiske statoki, małe a wulke haty, pomniki abo kamjenje a dalše.