Chrósćicy (MiR/SN). Nowe medije zeznać a je zmysłapołnje wužiwać, běše tema, z kotrejž su so dźěći w Chróšćanskim horće, kotryž je w nošerstwje Serbskeho šulskeho towarstwa, tele dny zaběrali. Projektowy sobudźěłaćer SŠT Michał Cyž je wobdźělnikam prózdninskeho poskitka wotpowědnu wědu sposrědkował. „Holcy a hólcy su spěšnje spóznali, na kak lochke, zdobom pak wužadace wašnje móža sej z pomocu kompjuterowych programow sami hry w digitalnym formaće tworić “, tak Michał Cyž. Wón po­twjerdźi zaměr SŠT, na medijo-pedagogiskim polu kubłanja skutkować, na kotrehož prěnim městnje steji nałožowanje serbšćiny. Při tym bě jemu wažne młodym zajimcam wuwědomić, zo je hižo tójšto z pomocu a zasadźenjom serbskeje rěče móžne.