Budyšin (JK/SN). Hižo wjacore lěta wotewri Serbski gymnazij zhromadnje z tamnišej serbskej wyšej šulu zajimowanemu publikumej na předwječoru pokutneho dnja durje kubłanišća. Tež lětsa tomu tak bě. Hdyž běchu dopołdnja šulerjo a wučerjo hišće mjez sobu, njemějachu po wučbje hač do zažneho wječora wjele chwile, sej raz wotpočink popřeć. Stajnje zaso přichadźachu zajimowani starši abo přiwuzni šulerjow, zo bychu sej přehlad wo kubłanju swojeho dorosta kaž tež wo metodach a móžnosćach sposrědkowanja wědy stworili. Načasne metody zbudźichu wulki zajim, wosebje, hdyž šulerjo sami tute předstajichu a z wučbnej wědu w cyłku prezentowachu. Wučerjo běchu w tym padźe jenož dohladowacy personal, ale mějachu na mnohe prašenja staršich wotmołwjeć.