Serbske šule stejachu w srjedźišću rozmołwy sakskeho kultusoweho ministra Christiana Piwarza (CDU) ze zastupjerjemi Domowiny a Serbskeho šulskeho towarstwa wčera w Drježdźanach.

Drježdźany (SN/at). Wuměnili su so wosebje wo pedagogiskim koncepće za serb­sko-němsku dwurěčnosć „2plus“ a prawidłownym zhromadnym dźěle mjez kultusowym ministerstwom a serb­skimi parterami. Rozjimali su dale wobsadźenje wučerskich městnow na serbskich šulach z „přidružnikami“ a situaciju serbšćiny na Serbskej fachowej šuli za socialnu pedagogiku w Budyšinje. Kaž Serbske Nowiny zhonichu, bě tež šulerski transport k serbskim šulam tema.

Za Katharinu Jurkowu bě to prěnja wosobinska rozmołwa jako předsydka SŠT z ministrom Piwarzom. „Wón je jara wotewrjeny za zhromadne dźěło ze SŠT a Domowinu, tež hdyž je trjeba, zo wosebitu situaciju na serbskich šulach hišće bliže zeznaje“, wona našemu wječornikej rjekny. Při ewaluaciji 2plus ma předsydka SŠT „za wosebje wažne, staršich sobu zapřijeć, to smy ministrej hišće raz zbližili“.