Smječkečanaj Alwin a Albert Cyž staj loni na Serbskim gymnaziju w Budyšinje maturowałoj. Za zahajenje studija so hnydom njerozsudźištaj. Jako dwójnikaj měještaj samsny zaměr, w kulturnej instituciji Dobrowólne socialne lěto (FSJ) absolwować. Chrysta Meškankowa je so z młodostnymaj rozmołwjała.
Při zarjadowanjach składnostnje Łužiskeho hudźbneho lěća 2022 widźach Waju wospjet w akciji. Kak je k tomu dóšło?
Alwin: Po abiturje běchmoj njerozsudnaj kak dale. Tuž padny z bratrom zhromadny rozsud, najprjedy jónu we Łužicy wostać a tu za něšto zmysłapołnym pytać. Naju powabjenje w Kulturnym běrowje Budyskeho měšćanskeho zarjada běše wuspěšne.
Kajki mataj poćah ke kulturje a předewšěm k hudźbje?
