Budyska Serbska fachowa šula a ­Křesćansko-socialny kubłanski skutk Sakska (CSB) stej póndźelu w Budyšinje kooperaciske zrěčenje podpisałoj, ­kotrež ma serbske kubłanje dźěći přisporjeć.

Budyšin (mbr/SN). Zo je kubłanje dźěći w serbskej rěči přewšo wažny a zamołwity nadawk, njeje nowostka. Zo pak kubłanišći za to kooperaciske zrěčenje podpisatej, je wosebitosć. Ideja za tym je, wuski mjezsobny dialog a wuměnu mjez praksu a wukubłanjom kubłarjow wutworić.

Relewanca tutoho nadawka bě wšitkim přitomnym na fachowej wuměnje před podpisanjom kooperaciskeho zrěčenja jasna. Wobdźělili běchu so wjednica fachoweje šule za socialnu peda­gogiku Barbara Jäckel, zamołwita za wukubłanje kubłarjow Alexandra Blosl-Lehmann, jednaćel CSB Marko Kliman, zamołwity za wobłuk kubłanje Ronny Škoda, wjednica Budyskeje serbskeje ­pěstowanje Grit Henčlowa a fachowa poradźowarka CSB Chrystina Pašcyna.

Za serbske šule maja hinaše měritka płaćić hač za němske – kaž frakcija ­Zelenych w krajnym sejmje wojuja ­łužiscy zastupjerjo strony za serbske ­rjadownje.

Budyšin (SN/mb). Hagen Domaška pochadźa z „němsce asimilowaneje serbskeje swójby“, kaž direktny kandidat Zelenych we wólbnym wokrjesu Budyšin 4, do kotrehož tež Radwor słuša, a rěčnik serbskeho dźěłoweho zjednoćenstwa swojeje strony praji. Dokelž pilnje serbsce wuknjacy ze swójskich nazhonjenjow wě, „kak ćežko je, sej serbšćinu wróćo dobyć“, so jemu zecnje, hdyž hlada na wuwiće w jadrowych rěčnych kónčinach. „Krajny zarjad za šulu a kubłanje (LaSuB) a kultusowe ministerstwo měłoj na za­dwělowane wołanje ze serbskich stron, inkluziwnje šulskeje konferency w Radworju, z přichilenosću a podpěru reagować. Město toho njezrozumliwe rozsudy přesadźujetej“, měni Domaška.

Tohodla jeho kolega Matthias Höhle, direktny kandidat we wólbnym wokrjesu Budyšin 2 a předsyda Budyskeho wo­krjesneho zwjazka Zelenych, zjima: „Šulska politika CDU je tu absolutnje zaprajiła. To dźe zaso na kóšty našeje serbskeje mjeńšiny.“

Bukecy (SN/mb). W lisće Bukečanskemu wjesnjanosće Thomasej Meltce stej Bukečanska Bjesada a serbska drastowa skupina na winowatosć spěchowanja serbšćiny po wustawkach gmejny dopominałoj. Přičina lista je njejapke rozpušćenje Witaj-skupiny w pěstowarni „Sonneneck“ w Bukecach ze stron nošerja AWO Budyšin (Serbske Nowiny su wo­spjet rozprawjeli).

Zastupjerjo Bukečanskeje Bjesady, drastoweje skupiny a staršich su hižo štwórtk wječor wo dalšim postupowanju wuradźowali, kaž Mato Krygaŕ informowaše. Wšitcy wobdźěleni běchu sej pře­zjedni, zo budźe zwoprawdźenje serbskich projektow pod tuchwilnymi wuměnjenjemi dale a ćeše. Tohodla su sej starši kaž tež zastupjerjo skupinow dorěčeli, so w tutej naležnosći z listami na wjesnjanostu gmejny wobroćić. Zasadnje wobsteji tež zwólniwosć, so na rozmołwach z nošerjom wobdźělić. Ale jenož hdyž je AWO woprawdźe zwólniwe, Witaj w Bukecach dale wjesć a wotpowědne wuměnjenja w pěstowarni za to stworić.

Budyska župa a Rěčny centrum WITAJ (RCW) so za dalše kubłanje dźěći po modelu Witaj w Bukecach angažujetej. Župa zdobom situaciju serbskich dźěći na Radworskej zakładnej šuli šwika.

Budyšin/Bukecy/Radwor (SN/mb). „Zludani a přesłapjeni“ su čłonojo předsydstwa župy „Jan Arnošt Smoler“ na wčerawšim posedźenju na trójny bolostny zasah do serbskeho kubłanja reagowali: zo „4. lětnik z maćernorěčnymi šulerjemi Radworskeje zakładneje šule so nawjeduje wot wučerki bjez maćernorěčnych kmanosćow (při tym připóznawamy jejeprócowanja, serbsku rěč nałožować)“, zo „so zakazuje, 1. lětnik samsneje šule po přeću staršich a prěnim zapokazanju šule zarjadować“, a zo „Witaj-skupinu w Bukečan pěstowarni dla njedosahaceje ličby wobdźělnikow začinja“. Jasna wotmołwa, kotruž je županka Leńka Thomasowa w mjenje župneho předsydstwa zjawnosći sposrědkowała: „To je zahuba! Podpěramy bój staršich, kotřiž sej žadaja, wutworić samostatne kubłanske cyłki za maćernorěčne dźěći, zdobom za tajke, kiž su zwólniwe, sej serbšćinu dostojnje přiswojeć.“