Domiznowědne temy mytowane
Drježdźany (SN/MiR). Mjez dobyćerjemi lětušeho Sakskeho myta za přeslědźenje domizny su tež štyri temy z poćahom na Łužicu. Spěchowanske myto za młodźinu w hódnoće 500 eurow přija Leon Babucke z Radebeula za DVD „Wulki přirodoškitny projekt łužiska jězorina“. Martha Hansetz, Ella Hauke, Finn Margraf a Leonore Schuster pod nawodom Iny Züchner z Wojerec dóstachu 500 eurow za zdźěłanje DVDje „Disco, Dada, DDR“. Čestne wopismo a knižny dobropis połsta eurow spožčichu Erhardej Dietmarej Lenzej ze Spitzkunnersdorfa za „Wjesnu chroniku Póckowy – Domiznowědne zwěsćenje wobstatka“, a Ralph-Klaus Winkler z Kinsporka je so zaběrał z pochowanišćom za wójnskich jatych w Kinsporku a z tamnišim lěhwom za jatych w lětach 1914 do 1919.
Myta w cyłkownej hódnoće 9 250 eurow je sakski statny sekretar za kultus Herbert Wolff zańdźeny pjatk w Drježdźanskim měšćanskim muzeju přepodał. Je to mjeztym jědnate wubědźowanje. Z počesćenjom hódnoći ministerstwo wurjadne wukony a zasłužby na polu sakskeho domiznowědneho slědźenja.
Prawe wurjekowanje sej wotposkać
Štóž rěč wuknje, přiswoja sej prawe pisanje słowa, kotrež w słowniku namaka. Ćešo je słowa prawje wurjekować. Za to maja wuknjacy delnjoserbšćiny na portalu www.dolnoserbski.de pod Nimsko-dolnoserbski słownik nětko nowu podpěru. Kliknyš-li pódla podateho serbskeho wuraza na symbol wótřerěčaka, zaklinči wurjekowanje.
Budyšin (SN/at). Kak su sobudźěłaćerjo delnjoserbskeho wotrjada Serbskeho instituta w Choćebuzu za tule posłužbu trěbne zwukowe dataje zdźěłali, wo tym je dr. Fabian Kaulfürst minjenu srjedu w Röhrscheidtowej bašće čłonam kuratorija a přiradźe slědźenišća, institutnikam a dalšim zajimcam přednošował.
Kita husličkarja wožiwili
Wulkotna premjera z překwapjacymi idejemi za serbskeho klasikarja
Za mnje najrjeńšo je, widźeć napjatosć młodych přihladowarjow na klankodźiwadłowych předstajenjach. Woči přeradźa jich wćipnosć. Woni chcedźa wědźeć, što so na jewišću stawa – a to hnydom a spěšnje. A njetraje dołho, zo su do jednanja dospołnje zanurjeni.
Tak bě tomu tež zańdźenu njedźelu popołdnju w Budyskim Dźiwadle na hrodźe, byrnjež skerje dorosćeni rynki stólcow pjelnili. Tam knježeštej bjesada mjez wulkimi a pišpot mjez małymi wopytowarjemi. Premjera inscenacije „Kito husličkar“ bě tak wabjaca, zo běše mała žurla na prěnim poschodźe hrajnišća hač na poslednje městno wobsadźena.
Són kaž w bajce
Institut za sorabistiku nowych studentow witał
Lipsk (LW/SN). Na Instituće za sorabistiku Lipšćanskeje uniwersity zahajichu zańdźeny štwórtk nowy semester z nastajenjom studijneho plana. Jednaćelski direktor instituta prof. Edward Wornar je nowačkow kaž tež studentow dalšich lětnikow witał a wšěm wjele wuspěcha w nowym akademiskim lěće wupřał.
Dźesać nowačkow je tón dźeń w instituće studować započało, z nich třo z Hornjeje a dwaj z Delnjeje Łužicy wučerstwo. Dalše předmjety za nich su matematika a jendźelšćina. Jedyn student zahaji swój masterski studij na polu delnjoserbšćiny (sorabistika). Mjez studowacymi je stipendiatka Załožby za serbski lud. Třo studenća započachu z bachelorskim studijom mjeńšinowych rěčow a wuknu serbšćinu wot zakłada.
Budźmy sćerpni
Zymski semester akademiskeho lěta 2017/2018 běži. Wot spočatka oktobra so studentam na uniwersitach po cyłej Němskej zaso hłowy kurja – tak tež na Instituće za sorabistiku Lipšćanskeje uniwersity. Tam su semester z dźesać nowačkami zahajili. Prof. dr. Edward Wornar, jednaćelski direktor instituta, je swojich chowancow wšitkich wosobinsce witał. A přijěli su na zarjadowanje tež hosćo z Łužicy.
Na Techniskej uniwersiće Drježdźany wobsteji wotnětka tohorunja składnosć, chodźić na seminary, złožowace so na serbske temy. Nawoda tamnišeho Instituta za slawistiku prof. dr. Christian Prunitsch njeje k zahajenju semestra studentow a łužiskich zajimcow ekstra witał. Tónle wosebity poskitk pak so lětsa prěni króć wotměwa. A kaž kóždy wě, hakle po třoch lětach rěčimy wo tradiciji. Budźmy potajkim trochu sćerpni, klětu pojědźemy snano tež na witanje studentow w Drježdźanskej TU. Milenka Rječcyna
„Milenka“ nětko bjez pomocnicy
Inwestuja do nimale 450 šulow
Sakski wobswětowy minister Thomas Schmidt a jeho kolega, minister za kultus Christian Piwarz (wobaj CDU), staj wčera w Drježdźanach přepodałoj inwesticiske plany za šule wokrjesam a bjezwokrjesnym městam.
Tematiku wuhlo maja tež w Čěskej
Lětuša stipendiatka Załožby za serbski lud na Instituće za sorabistiku na Lipšćanskej uniwersiće je Čechowka Tereza Hromádková. Porno druhim lětam, jako tam wjacori wukrajni zajimcy studowachu, je wona tónraz jenička z podpěru załožby. Studentka srjedźoeuropskich studijow na Praskej Karlowej uniwersiće pochadźa z čěskeje stolicy, hdźež je so 1995 narodźiła. We wobłuku studija nawukny wona hižo pólšćinu a madźaršćinu. Wosebje zajimuje so za stawizny wotpowědneju krajow. Tereza Hromádková rěči tež jendźelsce, němsce a serbsce. Nimo toho chce hišće samišćinu nawuknyć. „Serbšćinu wuknyła sym dotal něhdźe lěto z pomocu knihow. Wo Serbach a jich stawiznach je jej docent a wučer dr. Petr Kaleta – wón slědźi na polu serbskich stawiznow, wosebje NDRskeho časa kaž tež na polu mjeńšinowych rěčow – trěbne informacije posrědkował.
