Dohlad do swojeje dźěławosće je Serbski institut zajimowanej zjawnosći znowa z institutnym dnjom wčera w Budyskim Serbskim domje podał. Wosebje wćipni běchu mnozy hosćo na wuwjedźenja wědomostnicow wo „wuslědkach ewaluacije koncepta ,2plus‘ a wliwje wobchadneje rěče na komunikatiwnu kompetencu šulerjow 9. lětnika“.

Budyšin (SN/at). „Předmjet ewaluacije je rěčny koncept ,2plus‘ a nic ludowa serbšćina katolskich wsow. Kak eficientnje je so koncept přesadźił?“, prašeše so Jan Malink, bywši předsyda Maćicy Serbskeje a serbski superintendent na wuměnku, po přinoškach dr. Jany Šołćineje, dr. Leńki Šołćic, Jana Bogusza a sobudźěłaćerki Rěčneho centruma WITAJ Manuele Smolineje nastupajo horjeka mjenowanu temu. Institutnik a rěčny trenar delnjoserbskeho projekta „Zorja“ Gregor Wieczorek chcyše wědźeć, hač su dopóznaća strachi za spad rěčneho niwowa wobkrućili, hdyž maćernorěčni a njemaćernorěčni šulerjo serbšćinu po samsnym koncepće nawuknu. Spokojacu wotmołwu dóstałoj njejstaj.